Rev 12 | TabIBTNT | STEP | Хъа завариин зурба лишан арайиз гъюру: ригъ алабхьнайи дишагьли, дугъан ликарикк – ваз, хъа кӏулʼин

‏ Revelation of John 12

Дишагьли ва аждагьа

1 Хъа завариин зурба лишан арайиз гъюру: ригъ алабхьнайи дишагьли, дугъан ликарикк – ваз, хъа кӏулʼин – йицӏикьюб хядракан вуйи таж. 2 Дишагьлийик бицӏир ка ва аьзиятариан чӏигъар апӏура; думу бицӏир апӏуз ктӏерццуз хъюгънайи.

3 Завариин жара лишанра арайиз гъюру: зурба цӏаси уьру аждагьа, ургуб кӏул али, йицӏуб кӏарч али ва кӏулариин ургуб таж али. 4 Дидин рижвну завʼан шубубпи пай хядар илжикуру ва жилиинди ахьру. Аждагьа, бицӏир апӏурайи дишагьлийиз къаршуди дугъу бицӏир гъапӏубси, итӏуз ккепӏну дийибгънайи. 5 Дугъу бай гъапӏу. Думу Бали рукьан чумакъихьди вари халкьариин гьюкум гъабхиди. Дугъан бицӏир Аллагьдихьна, Дугъан тахтнахьна гъахуру. 6 Хъа дишагьли ичӏи чюлиз гьергру. Душваъ дугъаз Аллагьди йишв ккабалгнайи. Дина дугъаз агъзурна кьюдваржна йирхьцӏур йигъан хураг гъабхиди.

7 Хъа завариин Мукаил малайикдина дугъан малайикари аждагьайихъди дяви ккебгъру. Аждагьайи дяви чан малайикар хъади апӏурайи, 8 хъа дурарихьан гъалиб хьуз гъабхьундайи ва завариъ дидин йишв гъудубгнийи. 9 Хъасин зурба аждагьа, дегь заманайин битӏ, иблис вая Сатана, вари дюнʼя улдубгуз гъибтрайиб, завариан жилиина ипнийи. Дидихъди чан малайикарра идирчнийи.

10 Хъа узуз аьршариъ гьамци кӏури зурба дих гъеебхьзуз: «Магьа хъубкьна уьрхювал ва кьувват,
васана ич Аллагьдин Паччагьлугъ, ва Дугъан ччим Кадатнайирин гьюкум,
гьаз гъапиш ихь чвйирин футнакар идипну,
Аллагьдин улихь йишвди-йигъди дурарилан футнийир апӏурайиб.
11 Ихь чвйир аждагьайиин,
Ччилан ифдиинди
ва чпин шагьидвалариинди гъалиб гъахьну.
Дурари аьжалин улихь чпин уьмур гьяйиф гъапӏундар.
12 Гьаци вуйиган шадвалин сес ипай, аьршар ва душван агьлар!
Язухъ ву жилин ва гьюлин!
Учвухьна яман хъял ади,
чан вахт хъубкьнайиб аьгъяди, иблис дуфна».

13 Аждагьайиз учв жилиина илдипну гъябкъиган, думу бай гъапӏу дишагьлийихъ хъебгру. 14 Дишагьлийиз чаз ичӏи чюлиъ улупнайи йишваз, аждагьа дяргърушваз ва шубуд йисна гьацӏаъ хураг хрушваз тӏирхуз, люкьран кьюб аьхю хлинцц тувру. 15 Дишагьлийин кьяляхъди, думу ккахъбан бадали, аждагьайи чан ушвниан зурба нир деебтуру. 16 Хъа жили дишагьлийиз кюмек апӏуру: диди чан ушвар арццру ва аждагьайи чан ушвниан деебту нир убхъуру. 17 Аждагьайиз дишагьлийикан яман хъял гъюру ва думу гъитну, дугъан имбу бицӏидарихъди, Аллагьдин табшуругъар уьрхрударихъди ва Исайикан шагьидвал апӏрударихъди дяви гъабхуз гъябгъюру. 18 Хъа аждагьа гьюлин гъирагъдихъ дугъубжвуру.