Revelation of John 15
Ургур малайик ургуб бедбахтвал хьади
1Хъасин завариин узуз сабсана зурба ва аьжайиб лишан гъябкъюнзуз: ургур малайикдихь ургуб аьхиримжи бедбахтвал хьа. Гьамрариинди Аллагьдин хъял ккудубкӏурайи. 2Узуз цӏихьди дибикьнайи гюзгдиз ухшар али гьюл гъябкъзуз. Гьадму гюзгдин гьюлихъ вягьши гьяйванатдиин, дидин суратниин ва дидин ччвурнан числойиин гъалиб гъахьидар дугъужвнайи. Дурар Аллагьдин чюнграр хьади дугъужвнайи. 3Дурари, Аллагьдин гъуллугъчи Мусайин мяъли ва Ччилан мяъли апӏурайи: «Зурба ва аьжайиб вуяв ляхнар, Агъа Аллагь, вари хилиъ Дибиснайир!Дугъри ва гьякь вуяв рякъяр, халкьарин Паччагь!
4Шлиз, Агъа, Увхьан гучӏ хьибдар,
ва шли Яв ччвур адлу апӏидар?!
Гьаз гъапиш Уву сар вува, Гирамир!
Ва Яв улихь дахьди икрамназ!
Гьаз гъапиш Яв гьякьвал ачухъ гъабхьну!»
5Хъасин узуз гъябкъюнзуз: завариъ Аллагьдин Хал ачмиш дапӏну – Шагьидвалин Чадур, 6хъа душвʼан, ургуб бедбахтвал хьади, ургур малайик удучӏву. Дурариин марцци крабчӏру палат алийи ва дурари юкьвʼан гъизилин чӏулар идитӏнайи. 7Гьадму юкьрид гьяйванатарстарикан сари ургрид малайикарихьна, аьсрариан аьсрариз яшамиш шулайи Аллагьдин хъюлу ацӏнайи ургуб гъизилин гъаб туву. 8Хъа, Аллагьдин адлувалиан ва Дугъан кьудратнаан кумрахьди Аьршарин Хал абцӏру. Душвазди, сабан ургрид малайикарихь хьайи ургуб бедбахтвал ккудудукӏкьан гагьди, гьич сарихьанра учӏвуз гъабхьундайи.
Copyright information for
TabIBTNT