‏ Revelation of John 16

Аллагьдин хъял айи зах

1Хъасин узуз, Аьршарин Хулʼан аьхю дихниинди ургрид малайикариз кӏурайи дих гъеебхьунзуз:

«Гъарахай, ургуб гъабраъ айи Аллагьдин хъял дюнʼяйиина удубзай!»

2Сарпир удучӏвну, дюнʼяйиина чан гъаб удубзуру ва бухь ккайи учӏвру ва мурдал зийнар хуру. Дурар вягьши гьяйванатдин лишан кайи ва дидин суратназ икрам апӏру адмийириин алаънийи.

3Кьюрпири чан гъаб гьюлериинди удубзуру, ва шид майтин ифдиз илтӏибкӏуру – вари гьюлиъ айи чӏивишин йибкӏуру.

4Шубурпири чан гъаб нирариинди ва булагъариинди удубзуру, ва дурарра ифдиз илтӏикӏуру. 5Хъа штарин малайикди гъапиб гъеебхьзуз: «Уву гьякь вува,
эй Айир,
Гъахьир
ва Гирамир,
гьамци жаза гьадабтӏбаз:
6дурари гирамидарин ва пайгъамбрарин
ифи удубзну,
гьаддиз Уву
дурариз убхъуз
ифи тувунва –
дурар лайикь ву!»

7Хъа узуз, гъурбнар ургру йишвура фици кӏуйиш гъеебхьзуз: «Ав,
Агъа Аллагь,
вари хили Дибиснайир,
дугъри ва гьякь ву
Яв адабтӏурайи жаза!»

8Юкьурпири чан гъаб ригъдиинди улубзуру, ва ригъдиз чан цӏиинди адмийир ургуз гъитру кьувват тувру. 9Яман убцрушнаан адмийир ургуйи ва гьацдар бедбахтвалар гьау Аллагьдин ччвурназ агьрар апӏуйи. Аммаки дурар, чпин тӏулар гъитну, швумал гъахьундайи ва Дугъан ад гъапӏундайи.

10Хьурпири чан гъаб вягьши гьяйванатдин тахтниинди удубзнийи ва дидин паччагьлугъ мучӏушнаъ абхънийи. Адмийири, иццрушнаан чпин мелзариин кьацӏар алахьуйи, 11ва бедбахтваларна иццрушнар гьаъну кӏури Аьршарин Аллагьдиз агьар апӏуйи. Аммаки дурари чпин тӏулар дирчундайи, я гардандиъ гъидисундайи.

12Йирхьурпири чан гъаб машгьур нир Ефратдиинди удубзуру ва дидиъ айи шид, ригъ гьудубчӏвру терефариъ айи паччгьариз рякъ ачмиш хьуз, ебццуру. 13Узуз, аждагьайин ушвниан, вягьши гьяйванатдин ушвниан ва кучӏлин пайгъамбрин ушвниан чру гъюбариз ухшар айи шубуб чиркин рюгьяр удучӏвури гъяркъзуз. 14Мурар, аьламатар улупру жинарин рюгьяр ву: дурар, Аллагьдин, вари хилиъ Дибиснайирин зурба гъиямат йигъаз дявдиз гьязур йихьай кӏури, дюнʼяйин вари паччгьарихьна гъягъюру.

15«Магьа, Узу тӏафалси, хабарсузди гъидиза. Хушбахтавар ву ккилигурайир ва чан палтар уьрхюрайир, дицир гъяцӏалди гъягъидар, ва гьич саризра дугъан аьйибнан йишвар рякъидар!»

16Ва дурари паччгьар жугьуд чӏалниинди Армагедон кӏуру йишвʼина уч апӏуру.

17Хъа ургурпи малайикди чан гъаб гьавайизди удубзуру. Аьршарин Хулаъ, тахтнахьан гьамци кӏурайи зурба дих гъюру: «Тамам гъапӏну!»

18Хъа кьюркьлин цӏйир, гьарйир, гъугърумар ва жилар тӏурччвувалар шулу. Гьамкьан яманди жилар тӏурччвувал дюнʼяйиин адми гъахьихъанмина гъахьундайи. 19Машгьур вуйи шагьур шубуб йишваз гъутӏубкӏнийи, Аллагь гьясбикк ккадрурарин шагьрар ккадахьнийи. Машгьур вуйи Вавилон кӏуру меркез Аллагьди кӏваин гъапӏнийи ва дидиз Дугъу Чан пис хъял айи чяхрин зах тувнийи. 20Хъа вари островар гъудургнийи, дагълар дихъури имдайи! 21Завариан адмийириина йирхьцӏур килакьан айи мирккар гъургънийи. Гьамциб миркклин бедбахтвал гьапӏу Аллагьдиз адмийири хъа яман агьрар апӏуйи, гьаз гъапиш му бедбахтвал гизаф аьхюб вуйи!