‏ Revelation of John 19

Халкьди аьршариъ Аллагьдиз мяълийир апӏура

1Хъасин узуз аьршариъ зурба гъварч адмийирин шадвалин гьарайнан гъугъ гъеебхьунзуз: «Аллилуя!
Уьрхювал, ад ва кьудрат
ихь Аллагьдихь хьа,
2гьаз гъапиш, дугъридар ва гьякьлудар ву Дугъан жазйир:
Дугъу Машгьур Кьяппайин, диван гъапӏну,
вари дюнʼяйиин чан алчагъвал артмиш гъапӏиган;
Дугъу дугъаз,
Чан лукӏарин ифдиз дилигну,
жаза адабтӏну!»

3Хъанара адмийирин гъварчну гьарай гъапӏу: «Аллилуя!
Думу алчагърин кум аьсрариан аьсрариз завариз удубчӏвури хьибди!»

4Къарна юкьур аьхюр ва юкьрид гьяйванатарстар, Аллагьдиз икрам апӏури, тахтниин Деънайирин улихь гьамци кӏури, жилиина ис ахьу:

«Амин! Аллилуя!»

5Ва тахтналан гьамци кӏурайи дих гъабши: «Ихь Аллагьдин тяриф апӏинай,
вари Дугъан гъуллугъчйир,
вари Аллагьдиз гьюрмат апӏрудар,
цӏиб вуйидар ва машгьур вуйидар!»

6Узуз адмийирин зурба гъварчнан гъугъ, ясана урсрайи штарин гъугъ, ясана кьудратлуди завар рахурайи гъугърумарин гъугъсиб дих гъеебхьунзуз: «Аллилуя! Агъа, ихь Аллагь,
вари хилиъ Дибиснайир, паччагьди дийигъну!
7Шад хьидихьа ва шадвалин гьарай ипдихьа,
Дугъан ад за апӏидихьа,
гьаз гъапиш Ччилан сумчир а!
Дугъан швушв гьязур духьна:
8швушваз назук ирин нурлу ва марцци палат тувна!

Назук ир – му Аллагьдин гирами халкьдин гьякь ляхнар ву».

9Хъасин малайикди узуз кӏуру:

«Бикӏ: „Хушбахтаврар ву Ччилахьна сумчрин гешт хъапӏуз дих дапӏнайидар!“

Ва, давам апӏури, малайикди гъапизуз:

„Магьа Аллагьдин гьякь гафар!“»

10Узу, му малайикдиз икрам апӏарза кӏури, дугъан ликариккна ис алахъза, хъа дугъу узуз гъапи:

«Лиг, мици мапӏан! Узура, увуси ва яв гъардшарси, Исайикан шагьидвал апӏурайи лукӏ вуза! Аллагьдиз икрам апӏин! Гьаз гъапиш гьаму пайгъамбарвалин гафарин мяна Исайикан шагьидвал апӏуб ву».

Лизи гьяйвниин элеънайир

11Хъасинси узуз зав атӏабццну гъябкъзуз: магьа лизи гьяйван ва дидʼин Элеънайир. Дугъаз Дугъри ва Гьякь Кас кӏуйи, Дугъу гьякьʼвалиинди дяви ва суд апӏуру. 12Дугъан улар убгурайи цӏаси ву, Дугъан кӏулʼин гизаф тажар ал. Дурарик, Дугъаз Чазтӏан гъайри, саризра аьгъдру ччвур дибикӏна. 13Дугъʼин ифдик кипнайи валжагъ алийи. Дугъан ччвур: «Аллагьдин Гаф» вуйи. 14Лизи гьяйвнариинди, назук ирин лизи ва марцци палат алди, Дугъахъди аьршариан кьушум хъайи. 15Аллагьдин Гафнахъ хътругърудар пуч апӏуз Дугъан ушвниан учӏру ханжал удубчӏвурайи. Дугъу дурар рукьан чумакъикк ккаъди: Дугъу чяхир кчӏюбкьрушваъ Аллагьдин, вари хили Дибиснайирин, яман хъялнан чяхир кчӏюбкьюра. 16Дугъан валжгъиин ва жвукьриин «паччгьарин Паччагь ва агъйирин Агъа» ччвур дибикӏнайи.

17Узуз, ригъдиин дийигъну, заварикк тӏирхурайи вари жакьвариз зурба дихниинди чӏигъ апӏурайи малайик гъяркъзуз:

«Эй, гьамина, Аллагьдихьна, хябяхъдин машгьур хураг ипӏуз уч йихьай! 18Паччгьарин, кьушмарин аьхюдарин, кьудратлударин, гьяйвнарин ва дурариин элеънайидарин, лукӏарин ва азадкрарин, цӏиб ва зурба вуйидарин жандкарин йикк ипӏидичва».

19Хъа узуз, лизи гьяйвниин Элеънайирихъдина Дугъан кьушмарихъди дявдиз удубчӏвнайи вягьши гьяйванат гъябкъзуз. 20Вягьши гьяйванатна кучӏлин пайгъамбар гъидису. Кучӏлин пайгъамбри вягьши гьяйванатдин гьюрматназ аьламатар улупуйи. Дугъу гьадму аьламатариинди вягьши гьяйванатдин лишан капӏнайидар ва дидин суратназ икрам апӏурайидар алдатмиш гъапӏнийи. Дурар кьюридра чӏивиди имиди убгурайи гугуртдин дагриъ ирчу. 21Имбудар лизи гьяйвниин Алирин ушвниан удубчӏвурайи ханжлихьди гъийихнийи, ва вари жакьвар дурарин майтарин йиккарихьди ацӏнийи.