Rev 20 | TabIBTNT | STEP | Хъа гьадмуган, кӏан ккадрушван ачар хьади ва хилиъ аьхю зунжур ади, завариан гъюрайи малайик гъяркъзуз.

‏ Revelation of John 20

Агъзур йис

1 Хъа гьадмуган, кӏан ккадрушван ачар хьади ва хилиъ аьхю зунжур ади, завариан гъюрайи малайик гъяркъзуз. 2 Дугъу аждагьа, дегь заманайин битӏ, яни иблис вая Сатана, дибисну агъзур йисазди йибтӏну, 3 кӏан ккадрушвазди ипру ва, халкьар алдатмиш дарапӏбан бадали, агъзур йис гъябгъяйизкьан, хъябкьну, зиълан печать йивуру. Хъасин думу сацӏиб вахтназ деебтуб лазим вуйи.

4 Хъа узуз, суд апӏуз гьюкум тувнайидар деънайи тахтар ва, Исайикан шагьидвал дапӏну ва Аллагьдин Гафналантина ккахъну, кӏулар алдатӏу рюгьяр гъяркъзуз. Мурар вягьши гьяйванатдиз, я дидин суратназ икрам дарапӏдар ва унтӏʼин, ясана хилʼин дидин лишан капӏуз гъидритдар ву. Дурар чӏиви гъахьнийи, ва дурари Месигьдихъди агъзур йисан паччагьвал апӏиди. 5 Хъа имбу дийихнайидар, агъзур йис гъябгъяйиз, чӏиви хьидар. Му сабпи чӏиви хьувал ву. 6 Хушбахтаврар ва гирамидар ву сабпидарди чӏиви гъашидар! Мурарин зиин кьюбпи аьжализ гьюкум адар. Дурарикан Аллагьдин ва Месигьдин гъуллугъчйир хьиди, ва дурари Гьадрарихъди агъзур йисан паччагьвал апӏиди.

Иблисдиз жаза

7 Агъзур йис гъубшиган, иблис дустагъдиан деебтиди, 8 ва диди, дюнʼяйин юкьуб терефназ дубшну, яни Гогдинна Магогдин йишвариз дубшну, халкьар алдатмиш апӏури, дурар дявдиз уч апӏиди. Дурарин кьадар гьюлихъ гъумкьан ву. 9 Вари жил дибисну дуфну, дурари Аллагьдин гирами халкьар айишв ва Аллагьдин ккуни шагьур кьялаъ тӏапӏу. Хъа, завариан цӏа дубгъну, Иблисдин кьушум вари тӏанкь гъапӏу. 10 Дурар алдатмиш гъапӏу Иблис гугурт убгурайи цӏин дагризди – вягьши гьяйванатна кучӏлин пайгъамбар айи йишвазди – ипру. Дурарикан йишвди – йигъди, аьсрариан аьсрариз зивзивар кчӏюкьюри хьиди.

Гъийихдарин суд

11 Хъа узуз, зурба лизи тахт ва дидʼин Деънайир гъяркъзуз. Дугъан машнахьан вари жил ва зав гьергнийи, дурар дихъури имдайи! 12 Узуз гъийихдар, машгьур ва цӏиб вуйидар тахтнан улихь дийигъну гъяркъзуз. Китабар арццу, хъасин сабсана китаб абццу. Му Уьмрин китаб вуйи. Хъасин гъийихдарин суд, китабариъ дибикӏнайиси, чпин ляхнариинди гъапӏу. 13 Гьюлери чпиъ айи дийихнайидар тувнийи, аьжали ва жегьеннемди чпиъ айи дийихнайидар тувнийи, ва гьарсар касдин, чав гъапӏу ляхнариз дилигну, суд гъапӏу. 14 Хъасин аьжална жегьеннем цӏин дагризди ирчнийи. Ари гьаму кьюбпи аьжал ву – цӏа алди, убгурайи дагар. 15 Уьмрин китабдик дидикӏну адрудар цӏин дагризди гатӏахьнийи.