Rev 21 | TabIBTNT | STEP | Хъа узуз цӏийи зав ва цӏийи жил гъябкъзуз. Гьаз гъапиш сифтейин заварна жилар гьаргандиз гъудургнийи ва гьюлер сарун имдайи.

‏ Revelation of John 21

ЦӀийи Ерусалим

1 Хъа узуз цӏийи зав ва цӏийи жил гъябкъзуз. Гьаз гъапиш сифтейин заварна жилар гьаргандиз гъудургнийи ва гьюлер сарун имдайи. 2 Узуз Гирами Шагьур – цӏийи Ерусалим гъябкъзуз. Думу завариан Аллагьдихьан, жилириз ккилигурайи швушвси кабалгну, ис гъабхьнийи. 3 Узуз тахтналан кӏурайи аьхю дих гъеебхьзуз: «Магьа Аллагь дуланмиш шлу йишв,
Думу адмийирихъди сатӏиди яшамиш хьиди!
Дурар Гьадгъан халкьди хьиди!
Ва Аллагь гьадрарихъди хьиди, ва гьадрариз Думу Аллагь хьиди.
4 Дугъу дурарин уларилан гьарсаб нивгъ марцц апӏиди.
Аьжал сарун хьибдар,
сарун дердер, ишлар, иццрушнар хьидар,
гьаз гъапиш, муганайиздинуб вари гьаргандиз гъубшну».

5 Тахтниин Деънайири гъапи:

«Лиг, Узу вари цӏийиб арайиз хураза!» Хъа гъапи:

«Бикӏ, му гафар вари гьякь ва дугъри ву».

6 Дугъу гъапизуз:

«Тамам гъабхьну! Узу – Альфа ва Омега, Эвел ва Аьхир вуза. Гъах духьнайириз уьмрин булагъдиккан Узу чӏанади шид убхъуз гъитдиза. 7 Гъалиб гъахьириз Узхьан гьаму вари ирсди рубкьиди. Гьацириз Узу Аллагь хьидиза, хъа думу Узуз бай хьиди. 8 Хъа гучӏбяхярин, масу туврударин, намуссузарин, йивну йихрударин, кьяппйирин, фалчйирин, идолариз икрам апӏрударин ва вари кучӏляхярин йишв цӏииндина гугутдиинди убгурайи дагар ву. Му кьюбпи аьжал ву».

9 Хъасин ккудукӏру ургуб бедбахтвалар айи захар хьайи ургур малайикарикан сар малайик гъюру ва узухъди улхуру:

«Лиг, узу увуз швушв улупидизавуз – Ччилан шив!»

10 Хъа дугъу узу, Гирами Рюгьну ацӏнайир, зурба ягъли дагъдиина гъурху ва узуз завариан Аллагьдихьан ис шулайи Гирами Шагьур – Ерусалим улупу. 11 Думу Аллагьдин адну нурлу дапӏнайи. Шагьрин крабчӏурайивал багьа гъванаринсиб, яшмайихъна гъубшубсиб, хрусталси марцциб вуйи. 12 Дидлан, йицӏикьюр урар алди, зурба ягъли бару илтӏибкӏнайи. Хъа урнарихъ – йицӏикьюр малайик. Урнариин ччвурар дидикӏнайи – му ччвурар Израилин баярин йицӏикьюб тухмин ччвурар вуйи. 13 Шубуд урнар ригъ гьудубчӏвру терефнахъинди лигурайи, шубуд – кафарийихъинди, шубуд – кьиблайихъинди, шубуд – ригъ алабхъру терефнахъинди. 14 Шагьрин цал йицӏикьюб шибритӏиин дивнайи. Дурариин Ччилан йицӏикьюр марцци вакиларин ччвурар алийи.

15 Узухъди гафар апӏурайи малайикдихь, шагьур, дидин урнар ва цалар ерцуз гъизилин маргъ хьайи. 16 Шагьур юкьуб мурччвнануб вуйи, дидин ягълишинна яркьушин саб вуйи. Малайикди маргълихьди шагьур гъеебцу ва ярхишин кьюд агъзур километртӏан зиина удубчӏву, хъа дидин яркьушинна ягълишин, дидин ярхивалин кьадар айидар вуйи. 17 Дугъу цал гъеебцу, дидин ягъливал, малайикди ктухубси, инсанарин гьисабариинди, йирхьцӏур метр удубчӏвнийи. 18 Цал яшма кӏуру багьа гъвандикан дапӏнайи, хъа шагьур – чаантина рябкъру шюшесиб марцци гъизиликан. 19 Шагьрин шибритӏар гьамцдар гьар жюре багьа гъванарихьди дабалгнайи: сабпи багьа гъван – яшма, кьюбпиб – сапфир, шубубпиб – халцедон, юкьубпиб – изумруд, 20 хьубпиб – сардоникс, йирхьубпиб – сердолик, ургубпиб – хризолит, миржибпиб – берилл, урчӏвубпиб – топаз, йицӏубпиб – хризопраз, йицӏисабпиб – бирюза, йицӏикьюбпиб – аметист. 21 Йицӏикьюд урнар – йицӏикьюб жемчугдикан, гьарсар урнар сабди вуйи жемчугдикан дапӏнайи. Шагьрин кӏулин кюче чаантина рябкъру шюшеси марцци гъизиликан вуйи.

22 Узуз шагьриъ Аллагьдин Хал гъябкъюндарзуз, гьаз гъапиш Учв, Агъа Аллагь, вари хилиъ Дибиснайир ва Ччил – гьадрар Чпи Хал вуйи. 23 Шагьур аку апӏуз я ригъдин, я вазлин акв лазим дайи, гьаз гъапиш шагьур Аллагьдин аднахьди аку дубхьнайи, ва Ччил – дидиз акв Туврур вуйи. 24 Халкьар Дугъан аквнаъди гъягъиди ва дюнʼяйин паччгьари душваз чпин заанвал хибди. 25 Дидин урнар вари йигъан арццну хьиди, хъяркьну хьидар – душваъ йишв мучӏу шлуб дар. 26 Душваз халкьарин заанвал ва гьюрмат хибди. 27 Фукӏара чиркинуб душвазди убчӏвидар, душвазди алчагъвал ва кучӏал апӏрур учӏвидар. Душваъ анжагъ Ччилахь хьайи Уьмрин китабдиъ дидикӏнайидартӏан учӏвидар.