‏ Revelation of John 22

Уьмрин нир

1Хъасин малайикди узуз хрусталси нур туврайи уьмрин штун нир улупзуз. Думу нир Аллагьдинна Ччилан тахтнаккан ккудубчӏвурайи 2ва кӏулин кючейиансина гъябгъюрайи. Нирин кьюбиб гъирагъарихъди уьмрин гьар хъайи. Дидигъ йисан йицӏикьюб ражари йимишар гъиршру, гьар вазли мейва хуру, дидин кӏажар халкьар сагъ апӏуз вуйидар ву. 3Мушваъ агь-суза кайибра гьич фукӏара хьибдар. Гьаму Шагьриъ хьибди Аллагьдинна Ччилан тахт, ва Дугъан гъуллугъчйир Гьадгъан гъуллугънаъ хьиди. 4Дурариз Аллагьдин маш рябкъиди, ва Дугъан ччвур дурарин машниин хьибди. 5Душваъ сарун мучӏу шлуб дар, дурариз сарун акв тувру алатдин акв, я ригъдин акв лазим хьибдар, гьаз гъапиш дурариз акв Агъа Аллагьди апӏиди. Дурари паччагьвал аьсрариан аьсрариз апӏиди.

6Малайикди гъапизуз:

«Му гафар дугъридар ва гьякьлудар ву. Чан Рюгь пайгъамбрариз тувру Агъа Аллагьди Чан гъуллугънаъ айидариз багарихьди хьуз ккайиб улупуз Чан малайик гьаъну».

Гъюрур – Иса

7«Магьа, Узу багарихьди гъидиза!

Хушбахтавар ву гьаму китабдин пайгьамбарвалин гафар тамам апӏрур!»

8Узуз, Югьандиз, гьаму вари гъябкъюнзуз ва гъеебхьунзуз. Узуз гъеебхьиган ва гъябкъиган, узуз гьаму вари улупу малайикдин ликариккна, дугъаз икрам апӏуз кӏури, ис алахъза. 9Хъа малайикди гъапизуз:

«Лиг, мици мапӏан! Узура гьаму увуси, яв гъардшарси, пайгъамбрарси ва гьаму китабдин гафар тамам апӏрударси, лукӏ вуза. Аллагьдин улихь икрам апӏин!»

10Хъа дугъу гъапизуз: «Гьаму китабдин пайгъамбарвалин гафар мииликан! Гьаз гъапиш вахт сарун хъудубкьна. 11Гъит, ахмакь адми чан ахмакьʼвалар апӏури гъузри, гъит, алчагъри чан алчагъвалар апӏри, гъит, ужури ужувлар апӏри, ва гирами вуйир гирамиди гъузри».

12«Магьа, Узу багарихьди гъидиза! Ва гьардиз, чав гъапӏу ляхнариз дилигну, тувру Йиз кьимат Узухьди хьазухь. 13Узу вуза Альфа ва Омега, Сарпир ва Ккудубкӏрур, Эвел ва Аьхир».

14Хушбахтаврар ву чпин палтар урччурайидар! Дурариз уьмрин гьарихьна ихтияр а, дурарихьан Шагьриъ урнарианмина учӏвуз шулу. 15Амма хуйир, фалчйир, кьяппйир, йивну йихрудар, идолариз икрам апӏрудар, кучӏал ккунидар ва думу арайиз хрудар вари Шагьрин чӏатинди гъузди.

16«Узу, Исайи, учвуз гьаму шагьидвал тувну, жямяаьтарин улихь ктибтуз Йиз малайик гьаунза. Узу вуза Давудрин Ччив ва Кюл. Узу вуза гвачӏиндин аку Хяд».

17Рюгьнура ва швушвура кӏура: гъач!

Хъпехъурайирира, гъит, йипри: гъач!

Дахаргнайирра, гъит, гъюри!

Шлиз ккундуш, гъит, уьмрин шид чӏанади гъадабгъри!

18Гьаму китабдин пайгъамбарвалин гафар ерхьурайидариз узу улихьмиди кӏураза: эгер шли гьаму гафариин фукӏа-мукӏа иливиш, дугъʼин Аллагьдира гьаму китабдиъ ктитурайи бедбахтвалар иливиди; 19хъа эгер шли гьаму пайгъамбарвалин китабдикан фукӏа-мукӏа ктабгъиш, гьаму китабдиъ ктитурайи уьмрин гьаркан ва Гирами Шагьрикан Аллагьди дугъан пай ктабгъиди.

20Шли гьамдикан шагьидвал апӏураш, Дугъу кӏура:

«Ав, Узу багарихьди гъидиза!»

Ав гьаци ибшри, гъач, Агъа Иса!

21Агъа Исайин ужʼвал варидариз ибшри!