Revelation of John 5
Дибиржнайи кагъаз ва Ччил
1Тахтниин Деънайирин арччул хилиъ узуз китаб – турбаси дибиржнайи кагъаз гъябкъюнзуз. Дидин айтӏандира, зиъландира варишвар алацӏну, дибикӏнайи, ва думу ургуб печатдиинди хъябкьнайи. 2Аьхю дихниинди гьамци кӏурайи кьудратлу малайикра гъяркъзуз: «Фуж лайикь ву му китаб ачмиш апӏуз ва мидлан печатар алдагъуз?» 3Гьич сарихьанра: я завариин, я жилариин, я жиларикк ккайидарихьан – китаб ачмиш апӏуз гъабхьундайи, гьеле дидихьинди лигузкьан дурарихьан удубкьундайи. 4Китаб ачмиш апӏуз ужур, дидихьинди лигузкьан удубкьрур арайиз удудучӏвган, узу бегьем гъишза. 5Хъасин гьадму аьхюдарикан сари гъапизуз: «Мишан! Лиг, Ягьудайин тухмиан Аслан гъалиб гъахьну, Давудрин машгьур вуйи насил! Гьадгъухьантӏан шулдар ургуб печать али китаб ачмиш апӏуз». 6Узуз тахтнахь, гьацӏ кьялаъ, Ччил гъяркъюнзуз. Думу гъурбан апӏуз духнайирси айи. Дугълан гьадму юкьрид гьяйванатарстарна аьхюдар илтӏикӏнайи. Гъурбан апӏуз Духнайириз ургуб кӏарчна, ургуб ул айи – мурар Аллагьдин ургуб рюгь вуйи. Дугъан мурар дюнʼяйиина гьаърудар вуйи. 7Дугъу, багахь духьну, тахтниин Деънайирин арччул хилиъ айи дибиржнайи китаб гъибису. 8Дугъу думу гъибисган, юкьрид гьяйванатарстарна къарна юкьрид аьхюдар Ччилан улихь икрам апӏури дахьу. Дурарин гьарсарин хилиъ чюнгюр ва кӏулихьди ацӏнайи, ицци ниар хъайи ургру ччимар ади, гъизилин гъабар айи – му ччимар Аллагьдин гирами халкьдин ккарагбар ву. 9Дурари цӏийи мяъли апӏурайи: «Уву лайикь вува китаб бисузва дидлан печатар алдагъуз,
гьаз гъапиш, Уву духьну гъурбан,
Яв ифдиинди Уву Аллагьдиз адмийир гъадагъунва
гьарсаб тухмиан ва чӏалнаан,
гьар жюре миллетарикан ва халкьарикан.
10Уву гъапӏунва дурарикан
ихь Аллагьдиз гирами гъуллугъчйир ва паччгьар –
дурари дюнʼяйиинра
паччагьвал апӏиди!»
11Узуз юкьрид гьяйванатарстаринна гьадму аьхюдарин тахтналан илтӏикӏнайи гизаф малайикар гъяркъзуз ва дурарин дихар гъеерхьзуз. Дурарин кьадар ктухузкьан шлуб дайи – агъзрар-агъзрариинди вуйи. 12Дурари аьхю дихниинди кӏуйи: «Гъурбан гъахьи Ччил лайикь ву
кьувват, девлет, аькьюл ва кьудрат,
заанвал, ад ва ужʼвал
кьабул апӏуз!»
13Узуз гъеебхьунзуз, вари арайиз дубхнайибди – завариинра, жилариинра, жилариккра ва гьюлериъра – варишвариъ варибди фици гьарай апӏуйиш: «Тахтниин Деънайиризна Ччилаз –
ужʼвал, заанвал,
ад ва кьудрат
гьаммишандиз!»
14Ва юкьрид гьяйванатарстарира кӏуйи: «Амин!» ▼
▼Дугъриданна гьаци ву!
Аьхюдар жилиина ахьуйи ва икрам апӏуйи.
Copyright information for
TabIBTNT