Rev 6 | TabIBTNT | STEP | Ччилу ургуб печатдикан саб фици алдабгънуш, гъябкъзуз ва юкьрид гьяйванатарстарикан сари фици: «Мина гъач!» кӏури, завун гъугърумаринсиб чӏигъ гъапӏнушра, гъеебхьунзуз.

‏ Revelation of John 6

Сабпи йирхьуб печать алдабгъбакан

1 Ччилу ургуб печатдикан саб фици алдабгънуш, гъябкъзуз ва юкьрид гьяйванатарстарикан сари фици: «Мина гъач!» кӏури, завун гъугърумаринсиб чӏигъ гъапӏнушра, гъеебхьунзуз. 2 Хъа лизи гьяйван гъябкъзуз. Дидʼин чӏимирра хьайи атлу алийи. Дугъаз таж тувнади шулу, ва думу гъалибвал гъадабгъуз, гъалиб гъахьирси, рякъʼин шулу.

3 Ччилу кьюбпи печать алдабгъиган, узуз, юкьрид гьяйванатарстарикан кьюрпири, мина гъач, кӏури, гъеебхьзуз.

4 Хъа цӏаси убгурайи уьру гьяйван удубчӏвури гъябкъзуз. Му гьяйвниин али атлуйиз, зурба ханжал тувну, адмийир чиб-чпигъ гъярхьну йихбан бадали, дюнʼяйиан мясляаьтвал адабгъуз шлу ихтияр тувнийи.

5 Ччилу шубубпи печать алдабгъиган, узуз юкьрид гьяйванатарстарикан шубурпири: «Мина гъач!» кӏури гъеебхьзуз. Хъа хъютси кӏару гьяйван гъябкъзуз, дидʼин элеънайирин хилиъ ярчврар айи.

6 Хъасин гьадму юкьрид гьяйванатарстарин арайиъ гьамци кӏурайи дихсиб гъеебхьзуз:

«Ярхи йигъан гъилихубдихъ саб сеъ дяхинтӏан дяргърубси хьибди, ясана шубуб сеъ мухтӏан дяргърубси хьибди! Аммаки я ччимдиз, я чяхриз зарар мутуван!»

7 Дугъу юкьубпи печать алдабгъиган, юкьрид гьяйванатарстарикан юкьурпири кӏурайи дих гъеебхьунзуз: «Мина гъач!»

8 Хъа узуз, зяиф-гъатху рангнан гьяйван гъябкъзуз. Дидʼин элеънайирин ччвур Аьжал вуйи, дидихъди вари жегьеннем гъюрайи. Мидиз дюнʼяйин юкьубпи пайниин ханжлиинди, гашʼвалиинди, уьзрариинди ва юкьбиб вягьши гьяйванатариинди адмийир йихуз шлу гьюкум тувнайи.

9 Дугъу хьубпи печать алдабгъиган, узуз гъурбнар апӏрушван кӏанакк Аллагьдин Гафналантина ва дурари гъапӏу шагьидвалилантина гъийиху адмийирин рюгьяр гъяркъзуз. 10 Дурари зурба гьарай идипу:

«Гирами ва Гьякьлу Гьюкумдар! Уву гьаз гьамусра дюнʼяйин адмийирин суд апӏурадарва ва дурариз, ич удубзу ифдихъанди, жаза гьаз гьадабтӏурадарва?»

11 Гьадмуган дурарикан гьарсариз лизи палат тувнийи ва сацӏибсана сабур апӏуб ккун гъапӏнийи, гьаз гъапиш дурарин кьадар гьуркӏну шайиз, чписи, Месигь Аллагьдин гъуллугънаъ айи гъардшарра йихайиз, ккилигну ккундийи.

12 Узуз Дугъу йирхьубпи печать алдабгъури гъябкъзуз. Гьадмуган лап яманди жилар гъутӏурччву; ригъ – маллайин чухаси кӏару, хъа вари ваз ифиси гъабхьи, 13 гужал микӏ хъивну гъядябхъру дурубжу инжирси, хядар, завариан адахьну, жилиина ахьу. 14 Зав кагъазси илбижну дубгу; вари дагъларна островар чпин йишварихьан гьудучӏву. 15 Дюнʼяйин паччгьарра, гьякимарра, кьушмарин аьхюдарра, девлетлу ва кьудратлу адмийирра, лукӏарра ва азадди уьмур хъапӏрударра – вари дагълариъ айи гъарзаригъ ва дюрхъяриъ гьитӏикӏнийи. 16 Хъа дурари дагъларизна гъарзариз кӏуйи: «Учʼина ахьай, тахтниин Деънайирихьан ва Ччилан хъял кайивалихьан учу гьитӏикӏай. 17 Дурарин хъял алдабгъру Йигъ дуфна. Шлихьан мидккан ккадархьуз хьиди?!»