Rev 7 | TabIBTNT | STEP | Хъасин узуз дюнʼяйин юкьбиб терефариъ дийигънайи юкьур малайик гъяркъзуз. Дурари, я жилиина, я гьюлʼина, я гьарариина хъивуз гъидритди, дюнʼяйиина хъивру юкьуб микӏ дидиснайи.

‏ Revelation of John 7

Израилиан 144000 кас

1 Хъасин узуз дюнʼяйин юкьбиб терефариъ дийигънайи юкьур малайик гъяркъзуз. Дурари, я жилиина, я гьюлʼина, я гьарариина хъивуз гъидритди, дюнʼяйиина хъивру юкьуб микӏ дидиснайи. 2 Узуз ригъ гьудубчӏвру терефнахъан чӏиви Аллагьдин печать дибиснайи сарсана малайик за шули гъяркъюнзуз. Дугъу зурба дихниинди жилизна гьюлериз бедбахтвалар хуз гьюкум тувнайи юкьбиб малайикариз гъапи:

3 «Сабан я жилариз, я гьюлериз, я гьарариз, ухьу ихь Аллагьдин гъуллугънаъ айидарин машар печатдиинди жара дарапӏкьан гагьди, зарар мутуванай!»

4 Ва узуз, печать йивну жара гъапӏдарин кьадар варжна ягъчӏвурна юкьуд агъзур кас вуйиб, гъеебхьунзуз. Израилин баярин вари тухмариан печатдихьди жара гъапӏдар гьадмукьан вуйи.

5 Ягьудайин тухмиан печатдихьди лишанлу гъапӏдар йицӏикьюд агъзур кас вуйи;

Рувимдин тухмиан – йицӏикьюд агъзур;

Гаддин тухмиан – йицӏикьюд агъзур;

6 Ашерайин тухмиан – йицӏикьюд агъзур;

Нефталимдин тухмиан – йицӏикьюд агъзур;

Манасдин тухмиан – йицӏикьюд агъзур;

7 Симеондин тухмиан – йицӏикьюд агъзур;

Левийин тухмиан – йицӏикьюд агъзур;

Исахардин тухмиан – йицӏикьюд агъзур;

8 Забулундин тухмиан – йицӏикьюд агъзур;

Юсуфдин тухмиан – йицӏикьюд агъзур;

Вениаминдин тухмиан – йицӏикьюд агъзур.

9 Хъасин узуз сарихьанкьан ктухуз даршлукьан гьар жюре халкьарикан, миллетарикан, тухмарикан ва чӏаларикан вуйи адмийирин зурба гъварч, тахтнан ва Ччилан улихь лизи палтарикди ва пальмайин кюлер хилиъ ади дийигъну, гъяркъзуз. 10 Дурари аьхю дихариинди гьарай ипнайи:

«Уьрхювал тахтниин деънайи ихь Адашдин ва Ччилан хилиъ а!»

11 Хъа тахтналан, аьхюдарилан ва юкьрид гьяйванатарстарилан илтӏикӏнайи вари малайикари, тахтнан улихь жилиина ахьну, Аллагьдиз икрам гъапӏу. 12 Дурари варидари гьамци кӏуйи:

«Амин!

Дугъриданна ужʼвал ва ад, аькьюл, чухсагъулвал, заанвал, кьувват ва кьудрат гьарсариз аьсрариан аьсрариз ихь Аллагьдихь хьа. Амин».

13 Думу аьхюдарикан сари узхьан гьерхнийи: «Гьаму лизи палат али адмийир фужар ву ва наънан гъафидар ву?»

14 «Йиз аьхюр, думу увуз ужуди аьгъявуз!» – жаваб тувза. Дугъу гъапизуз:

«Мурар зурба бедбахтвалариккан ккудучӏвдар ву. Дурари чпин палтар, Ччилан ифдиъ дурччну, лизи гъапӏну, 15 гьаддиз дурар Аллагьдин тахтнан улихь хьа ва Дугъан Хулаъ дурар йишвди-йигъди Дугъан гъуллугънаъ а, хъа тахтниин Деънайири дурарин зиин Чан чадур алтӏабцциди, 16 ва дурариз гьич зат я къурагьвал, я гашʼвал аьгъю хьибдар, я ригъди дурар ургидар, я пис манишнан ялавну ккагъидар, 17 гьаз гъапиш тахтниин али Ччилу дурар уьрхиди, ва уьмур хру штун булагъарихъна гъахиди. Аллагьди дурарин уларилан гьарсаб нивгънан цӏадал марцц апӏиди».