Revelation of John 8
Ургубпи печать алдабгъуб
1Дугъу ургубпи печать алдабгъиган, гьацӏ сяаьтнасикьан аьршариъ сессузвал абхъру. 2Узуз Аллагьдин улихь ургур малайик дийигъну гъяркъзуз. Дурарихьна ургуб зурна тувну шулу. 3Жара малайик гъюру. Думу гъурбнар ургрушван гъвалахъ, кум ккапӏру гъизилин гъабсибра хьади, дугъужвуру. Дугъахьна, Аллагьдин вари халкьдин ккарагбарихъди, тахтнан улихь хьайи гъизилин гъурбнар ургрушвʼина хпан бадали, бегьемди ицци ниар хъайи, ургру ччимарра тувру. 4Хъа малайикдин хилиъ айи гъизилин гъабсибдиан Аллагьдин улихь, Дугъан халкьдин ккарагбарихъди сабси, ицци ниъ хъайи кум за шулу. 5Малайикди кум ккапӏру гъабразди, гъурбнар ургрушвлан цӏа гъадабгъну, кабхьуз ипру, хъа думу дюнʼяйиинди гатӏабхьуру, хъасин душвʼин завар рахуру, гьарай утӏубччвуру, кьюркьлин цӏийир кричуру ва жилар тӏурччвуру.Ургуб зурна
6Хъа ургуб зурна дидиснайи ургур малайик зурнийир рахуз гьязур духьнайи. 7Сарпири гъарабху – ва ифдихьди гъибикьнайи мирккна цӏа абхьу ва жилиин дабхьу. Дюнʼяйин шубубпи пай жилар гъургу, шубубпи пай гьарар ва вари чру укӏ гъубгу. 8Кьюрпи малайикди зурна гъарабху – убгурайи зурба дагъсиб гьюлеризди абхьу. Хъа гьюлерин шубубпи пай шид ифдиз илтӏибкӏнийи. 9Гьюлериъ шубубпи пай чӏивишин гъирмиш гъабхьнийи ва шубубпи пай гимйир ккахьнийи. 10Шубурпи малайикди зурна гъарабху – завʼан чирагъси убгурайи зурба хяд абхъу. Думу шубубпи пай нирариина ва штарин булагъариина абхънийи. 11Думу хядраз Кьутӏкьли Кьал кӏуйи. Вари штарин шубубпи пай кьалси кьутӏкьли гъабхьнийи ва гизаф адмийир гьациб штуан гъийихнийи, гьаз гъапиш штар кьутӏкьли гъахьнийи. 12Юкьурпи малайикди зурна гъиву – ригъдин ва вазлин шубубпи пай ва шубубпи пай хядар пуч гъапӏу. Дурарин шу-шубубпи паяр гъидису ва, акв адарди, йишвандин шубубпи пайси, шубубпи пай йигъандинра мучӏуди гъабхьи. 13Узуз аьршарикк тӏибхурайи люкь гъябкъюнзуз. Диди зурба дихниинди кӏурайиб гъеебхьунзуз: «Гьамус имбуну шубур малайикди хъаъру зурнайин дихарихьан дюнʼяйиин яшамиш шулайидарин язухъийкӏана, язухъийкӏана, язухъийкӏана!»
Copyright information for
TabIBTNT