Tit 1 | TabIBTNT | STEP | Узу, Аллагьдин гъуллугънаъ айи ва Иса Месигьдин вакил Павел, Аллагьди кадагънайидар хъугъувалихъна хуз, гьякьʼвалин кӏулиъ тӏауз, дюзди Аллагьдиз гьюрмат фици апӏуруш улупуз ва

‏ Titus 1

1 Узу, Аллагьдин гъуллугънаъ айи ва Иса Месигьдин вакил Павел, Аллагьди кадагънайидар хъугъувалихъна хуз, гьякьʼвалин кӏулиъ тӏауз, дюзди Аллагьдиз гьюрмат фици апӏуруш улупуз ва 2 дурарик гьаргандин уьмрин умуд капӏуз гьаънайир вуза. Дициб ужʼвал вари дюнʼя арайиз хайиз улихьна гьич саб вахтнара кучӏал дарапӏру Аллагьди тувнайи гаф ву. 3 Чав дебккнайи вахт гъафиган, Дугъу дюнʼяйиз Чан Гаф гьаъну. Гьадму Гафнакан вуйи Хабар рабгъувал Аллагьдин, ухьу Уьрхрурин, ниятниинди узʼина ихтибар дапӏна.

4 Узухъди саб хъугъувалин йиз дугъри бай Тит, Адаш Аллагьдихьан ва ухьу Уьрхру Иса Месигьдихьан ужʼвал ва мясляаьт ибшривуз.

Критдиин Титдин вазифйир

5 Узу уву Критдиин гьял дапӏну адру вари ляхнар гьял апӏбан бадали ва гьарсаб шагьриъ хъугърударин арайиъ аьхюдар дерккбан бадали гъитунзаву. 6 Узу гъапиганси, дерккру аьхюдар марцциди яшамиш шулайидар духьну ккунду – саб ражаритӏан хпир духну адрударикан; дурарин веледар хъугърудар вуди ккунду, я гьич саб жюрейин хлиан идитнайивал ва хъпебехърувал дурарик кади ккундар. 7 Фицики Аллагьдин гъуллугъниин али аьхюр Гьадгъан ляхнар кӏули гъахурайир ву ва дицир саб гаф кайир духьну ккундар. Дициб гъуллугъниин, чав кӏурубтӏан аьгъдрур, я хъял гъюрур, пияниска, элегрур, я пулиъ улар айир духьну ккундар. 8 Хъа, гьатци, дицир кас хялар кьабул апӏрур, ужʼвал апӏрур, фикирлур, дюзвал ккунир, намус-гъирʼят айир, учв чан хилиъ дисуз шлур вуди ккунду. 9 Думу улупурайи аьгъюваларикк кӏул ккиврур, гьякь гафнан терефкар вуди ккунду; хъпехърудариз сагъ насигьятариинди кюмек апӏрур, хъа хъпебехърудар, чаз къаршу гъедергрудар ашкар апӏуз аьгъюр духьну ккунду.

10 Фицики гизафдар гьич саринра гьюкум кьабул дарапӏрудар шулу, лягълягъчйир ва футнакрар-кучӏляхяр, гизафна-гизафси дицдар адмийир суннат дапӏнайидарин арайиъ а. 11 Дурари кӏулди хизанар пуч апӏури хъюгъру; чпин ужуз хайирнахъди, аьгъю дубхьну ккуниб улулупди, фукӏа дару каламарихъан хъчӏихури шлуган, дурарин ушвниъ итӏибшвури ккунду. 12 Дурарин сар пайгъамбри гъапну: «Критдин агьлар – гьарган кучӏлар апӏрудар, вягьши гьяйванатар, темплар, адрацӏру фунар ву!».

13 Му дугъридан гьякь ву. Гьаддиз дурарин, саб гьяйифвал ктарди, гьякьяр унтӏаъ атӏри апӏин; гъит, дурар сагъ хъугъувалихьна гъюри; 14 гъит, жугьдари кадагънайи махъварихьан дурар ярхла ишри ва гьякьналан улдугнайидари кӏурайиб дарапӏри. 15 Марццидариз вари марцциб ву, хъа кацӏнайидариз ва хътругърудариз марцциб фукӏара адар, гьаз гъапиш, дурарин фагьумра, намус-гъирʼятра кацӏнайидар ву. 16 Дурари, чпиз Аллагь аьгъячуз, кӏури, гьисаб апӏура, хъа чпин ляхнар-тӏулариинди Думу ярхла апӏура. Гьадрар ву думу намуссузар, мютӏюгъ дарудар, гьич саб ляхнизра хай дарудар.