Tit 2 | TabIBTNT | STEP | Уву, гьякь аьгъювалари фу тӏалаб апӏураш, дупну ккунду.

‏ Titus 2

Гьякь аьгъюваларихъди хьуб

1 Уву, гьякь аьгъювалари фу тӏалаб апӏураш, дупну ккунду. 2 Яшлуйириз чпин кӏулʼинди фикир апӏуз улуп: ужубна-харжиб аьгъю апӏури ишри, гьюрматназ лайикьди ишри, фикирлуди ишри, ижми хъугърудар ишри, ккудудубкӏру масанвалиъ ишри, мюгькамди сабурлудар ишри. 3 Гьаци улуп яшлу дишагьлийиризра: намуслуди яшамиш шлуганси, футнийир дарагъди, убхърубдиъ улар адрахьруси; гъит, жигьил швушвариз ужувлар апӏуз улупри. 4 Дурарихьди чпин жилар ккун апӏуз гъитри; чпин веледарихъ юкӏв хъипри; 5 аькьюллуди фикир апӏрудар ишри, чӏат ул адрударди вердиш ишри, хулан гъайгъу кайидар ишри, ужʼвал кайидар ишри, Аллагьдин Хабар аскан даршлуси, чпин жиларихъ хъпехърудар ишри. 6 Гьаци жигьиларра ишри: дурариз чпи хилиъ дисуз шлуси улуп. 7 Уву дурариз вари яв алдабгъурайи ликдииндина ляхнариинди чешнеди гъуз. Гъит, уву улупурайи аьгъювалар лап кӏваантӏан ва гьюрматназ лайикь ишри, 8 ихь душмнарихьан ухьуз фукӏара чӏуруб пуз даршлуганси ва дурариз чпиз нач шлуганси, яв гаф-чӏал сагъиб ва гьич саб гъалатӏ ктруб ибшри.

9 Лукӏариз улуп: вари чпин аьхюдарихъ хъпехърудар ишри; кӏуруб апӏрудар ишри; гафариз къаршу удудучӏври, 10 гьитӏибкӏрудар ваъ, хъа ухьу Уьрхрурикан – ихь Аллагьдикан вуйи аьгъювалар хъана артухъ уткан ва такабур апӏру гьубкӏу ихтибар алидар ишри.

11 Фицики Аллагьдин зурба вуйи ужувлу вари инсаният уьрхюз шлу аквнахьди ккапӏнийи. 12 Аллагьдин ужувлу ухьуз гьаму дюнʼяйиъ, аллагьсуз уьмрихьан ва му дюнʼяйин тямягьярихьан ярхла духьну, жвув хилиъ дидисну, марцциди ва намуслуди яшамиш йихь кӏурахьуз. 13 Диди ихь умудар тамам шлу хушбахтавар Йигъ гъяйиз ккилигури гъузуз улупурахьуз. Думу Йигъ Чан аднаъди зурба вуйи Аллагь ва ухьу Уьрхрур – Иса Месигь гъюру Йигъ хьибди. 14 Ухьу законсузваликкан азад апӏбан бадали, Чаз дурукьнайи халкь марцц апӏбан бадали ва думу халкь, вари юкӏв хъипну, ужʼвал апӏуз улихь гъягъбан бадали, Гьадгъу ухьхъанди Чан жан тувну.

15 Магьа гьамцдар аьгъювалар улуп. Яв вари гьюкум улихь гьапӏну, дурарик юкӏв капӏ ва тахсрар улупури гъуз! Ва гъит, гьич сарихьанра увухьинди хъюхъ за дапӏну лигуз дарибшри!