Tit 3 | TabIBTNT | STEP | Дурариз гьюкум гъабхрударихъ ва аьхюдарихъ хъебехъну ккунивал кӏваин апӏури гъуз; гьарсаб ужувлан ляхин апӏуз гьязурди ишри,

‏ Titus 3

Дугъри вуйи уьмрикан

1 Дурариз гьюкум гъабхрударихъ ва аьхюдарихъ хъебехъну ккунивал кӏваин апӏури гъуз; гьарсаб ужувлан ляхин апӏуз гьязурди ишри, 2 гьич затра люкьнар дарапӏри, гьюжатар гъитӏитӏиккри вари адмийирихьна ккунивалиинди ва гъюдливалиинди ишри.

3 Улихьди ухьура ахмакьарди гъахьидар вухьа: кӏулʼин зигрудар, алдатмиш дапӏнайидар, хьуз мумкин вуйи вари тямягьярин ва ягь адру кьукьарин лукӏар вуйхьа, хъюлу ацӏну ва гъанихвали ургури яшамиш шули гъахьунхьа, чиб-чпин хъял ади ва чиб-чпи даккунди гъахьунхьа. 4 Хъасин дюнʼяйиз ухьу Уьрхрур – Аллагьдин ужʼвал ва Дугъан инсанарихьна вуйи масанвал гъафну. 5 Думу, ухьу апӏури гъахьи ихь «гьякь ва дугъри» ляхнариз дилигну, Гъафир дар, хъа Чан ужʼвалилантина гьаци гъабхьиб ву. Дугъу ухьу гъюрхну, штухьди марцц дапӏну, таза алаъну ва Гирами Рюгьнахьди цӏийи гъапӏну. 6 Дугъу Чан Рюгь, ухьу Уьрхруриланмина – Иса Месигьдиланмина ухьʼина, кӏюгъялвал адарди, улузну. 7 Дугъан зурба вуйи ужувлиинди ухьу, гьякь дапӏнайидар, умуд кивнайи гьаммишандин уьмур рубкьру насларди гъуздихьа. 8 Мурар дугъри гафар ву.

Узуз уву гьаму гьякьяр дурарин юкӏвариъ тӏаъри ккундузуз. Гъит, Аллагьдихъ хъугърудар, ужувлар апӏури, ацӏри. Хъа мици хьуб варидариз успагьи ва мянфяаьтлу ляхин ву. 9 Аммаки ахмакь улхбарихьан, архйирикан вуйи гьюжатарихьан, гъярхьуваларихьан ва Къанундин кӏуллан кчӏихуваларихьан ярхлади гъуз. Мурар ичӏи ва хайирсуз ляхнар ву. 10 Хъа гьюжат гъипуз ккунириз, сабан-кьюбан чан дюз дарувал улуп, хъасин дицирихъди сарун аьлакьа мигъибтан. 11 Аьгъю йибхь, дицир кас чӏур гъахьир ва гунагькар ву, дугъу чав чак тахсир кипна.

12 Узу увухьна Артем ясана Тихик гьаиган, узухьна Никопольдиз гъюз ял апӏин; узу душваъ кьюрд адапӏуз кьаст гъапӏунза. 13 Ккун апӏуразавукан, законарикан аьгъю Зенасдихьанна Аполоссдихьан чпи гъярайи рякъ давам апӏуз кюмек апӏин: дурариз фукӏа-мукӏа ккимиди мигъибтан. 14 Гъит, ужудар ляхнар апӏури, ихьдаризра дарс ибшри ва гьудрубкӏрушваъ кюмек апӏуз дубгъри, хъа гьадмуган дурарин уьмур бегьер хруб хьибди.

15 Увуз узухъди гьамшваъ айи варидари саламар хътаура. Ухьу ккуни вари хъугънайидариз саламар йип. Гъит, учвухъди варидарихъди Аллагьдин ужʼвал ибшри!