2Sa 9 | TatIBT15 | STEP | Беркөн Давыт: – Шаул гаиләсеннән кем дә булса исәнме әле? Мин аңа Йонатан хакына игелек кылыр идем,

‏ 2 Samuel 9

Давытның Йонатан углын кайгыртуы

1 Беркөн Давыт:

– Шаул гаиләсеннән кем дә булса исәнме әле? Мин аңа Йонатан хакына игелек кылыр идем, – диде.

2 Шаул йортында Сиба исемле хезмәтчеләр башлыгы бар иде. Аны Давыт янына чакырып китерделәр, һәм патша аңардан:

– Сиба атлы кеше син буласыңмы? – дип сорады.

– Мин ул, синең колың, – дип җаваплады теге.

3 – Шаул гаиләсеннән тагын кем дә булса исәнме? – дип сорады Давыт. – Мин аңа Аллаһы мәрхәмәтенә тиң мәрхәмәт күрсәтердәй берәрсе бармы?

– Йонатанның ике аягына да аксак углы бар, – дип җавап кайтарды Сиба.

4 – Кайда ул? – дип сорады аңардан патша.

– Ло-Дебарда ул, Аммиел углы Макир гаиләсендә, – диде Сиба.

5 Шуннан Давыт үзенең кешеләрен Ло-Дебарга юллап, алар Аммиел углы Макир гаиләсеннән Йонатанның углын алып кайттылар. 6 Шаулдан туган Йонатанның углы Мепибошет, Давыт янына килеп, йөзе белән җиргә капланды.

– Мепибошет! – дип дәште аңа Давыт.

– Мин ул, синең колың, – дип җаваплады теге.

7 – Курыкма, – диде аңа Давыт, – атаң Йонатан хакына мин сине мәрхәмәтемнән аермам, бабаң Шаулның бөтен басу-кырларын мин сиңа кире кайтарырмын, һәм син һәрвакыт минем табынымнан ризыкланырсың.

8 Мепибошет, башын иеп, болай диде:

– Миңа, эт үләксәсенә тиң затка, шулай игелек күрсәтергә кем әле мин ул кадәр?!

9 Аннары патша, Шаул хезмәтчесе Сибаны чакырып:

– Шаулның һәм аның гаиләсенең барлык мал-мөлкәтен әфәндең Шаул оныгына тапшырам. 10 Димәк ки, әфәндеңнең оныгы ризыктан өзелмәсен өчен, син үзең, синең угылларың вә хезмәтчеләрең Мепибошетның җирен эшкәртергә һәм уңышны җыеп алырга тиеш булырсыз; әфәндеңнең оныгы Мепибошет үзе һәрвакыт минем табынымнан ризыкланыр, – диде.

Әлеге Сибаның унбиш углы һәм егерме хезмәтчесе бар иде. 11 Патшага Сиба:

– Синең колың патша әфәнденең боерыгын җиренә җиткереп үтәр, – дип җаваплады.

Шулай итеп, Мепибошет, патша углы кебек, Давыт өстәленнән тукланды. 12 Мепибошетның Микә исемле кечкенә углы бар иде. Сиба йортында яшәүчеләрнең һәммәсе Мепибошетның хезмәтчеләре саналды. 13 Ике аягына да аксак Мепибошет Иерусалимдә яшәде һәм һәрвакыт патша белән бер табыннан тукланды.