Amo 6 | TatIBT15 | STEP | Сионда ваемсыз яшәүчеләр – кайгы сезгә! Самарея тавында үзегезне имин санаучылар – кайгы сезгә! Сез – беренчеләрдән саналган халыкның каймагы, исраилиләр, ярдәм сорап, яныгызга килгән түрәләр.

‏ Amos 6

Ваемсыз һәм тәкәббер исраилиләргә – кайгы

1 Сионда ваемсыз яшәүчеләр – кайгы сезгә!
Самарея тавында үзегезне имин санаучылар – кайгы сезгә!
Сез – беренчеләрдән саналган халыкның каймагы,
исраилиләр, ярдәм сорап, яныгызга килгән түрәләр.
2 Кәлне шәһәрен барып карагыз,
аннан бөек Хаматка юл тотыгыз,
пелештиләрнең Гәт шәһәренә төшегез –
алар сезнең патшалыклардан яхшыракмы,
җирләре сезнекеннән киңрәкме?!
3 Әй сез, бәла көне ерак дип санаучылар,
сез бит аны – җәбер-золым көнен якынайтасыз!
4 Сез фил сөяге белән бизәлгән ятакларда ятасыз,
түшәкләрегездә назланасыз,
көтүдәге иң яхшы бәрән ите,
утлаудагы иң симез бозау ите белән тукланасыз.
5 Үзегезне Давыт сыман оста уйнаучы күреп,
лира чиртеп, төрле көй чыгарып утырасыз.
6 Сез касә-касә шәраб эчәсез,
хушбуйның иң гүзәлен ягынасыз,
әмма Йосыф токымы өстенә төшәсе бәлагә көенмисез.
7 Менә шуларның барысы өчен
сез беренчеләрдән булып әсир китәрсез –
назлыларның хушланып утыруы шулай тәмам булыр.

8 Хуҗа-Раббы Үз затыннан ант итә,
Күкләр Хуҗасы Раббы болай ди:
«Ягъкуб токымының тәкәбберлеген күреп җирәнәм,
кальгаларына нәфрәтләнеп карыйм;
аларның шәһәрен Мин бар мал-мөлкәте белән бергә
дошманнары кулына тапшырачакмын!»

9 Берәр йортта унлап кеше исән калса, алары да үләр! 10 Кардәше, яндырмакчы булып, мәрхүмнең җәсәден ^{▼▼ Җәсәд – гәүдә.} алырга килгәч, өйнең аулак почмагына кереп поскан берәүне күреп: «Яныңда тагын берәрсе бармы?» – дип сораса, тегенең: «Беркем дә юк!» – дигән җавабына каршы: «Дәшмә! Раббы исемен без телгә алырга тиеш түгелбез! ^{▼▼ Раббы исемен без телгә алырга тиеш түгелбез! – Биредә, күрәсең, исраилиләрне җәзага тарткан Аллаһының исемен телгә алудан курку турында сүз бара.}» – дияр.

11 Менә, Раббы боерыр да, зур йортлар җимерелеп төшәр,
кечеләре тәмам хәрабәгә әйләнер.
12 Атлар кыяташ өстендә чабышырмы,
үгез җигеп, кыяташны сөрерләрме?!
Хәлбуки сез гадел хөкемне – зәһәр агуга,
хаклык җимешен әче әремгә әйләндерәсез.
13 Сез Ло-Дебар шәһәренең җиңелүенә куанасыз,
«Карнаим шәһәрен ^{▼▼ Ло-Дебар һәм Карнаим шәһәрләре Үрдүннән көнчыгышта урнашкан булып, «Ло-Дебар» – «һичбернәрсә түгел», «Карнаим» исә «ике мөгезле» (мөгез – көч-куәт билгесе) дигәнне аңлата.} үз көчебез белән яулап алдык!» – дисез.
14 Әмма Күкләр Хуҗасы Раббы:
«Әй исраилиләр! Сезгә каршы бер халыкны котыртачакмын, – ди, –
һәм сез Лебо-Хаматтан башлап
Араба үзәненә кадәр сузылган җирләрдә
җәбер-золым эчендә яшәрсез!»