Hos 1 | TatIBT15 | STEP | Яһүдә җирендә берсе артыннан берсе Уззия, Иотам, Әхәз вә Хизәкыйя исемле патшалар, Исраилдә исә Яһоаш углы Яробам патша хакимлек иткән заманда Беэри углы Һошеягә Раббыдан вәхи иреште.

‏ Hosea 1

1 Яһүдә җирендә берсе артыннан берсе Уззия, Иотам, Әхәз вә Хизәкыйя исемле патшалар, Исраилдә исә Яһоаш углы Яробам патша хакимлек иткән заманда Беэри углы Һошеягә Раббыдан вәхи ^{▼▼ Вәхи – Аллаһы тарафыннан пәйгамбәр күңеленә салынган хәбәр.} иреште.

Һошеянең хатыны һәм балалары

2 Һошеягә сүзен башлап, Раббы аңа:

– Бар, үзеңә бер уйнашчы хатын һәм аның зинадан туган балаларын да ал, – диде. 3 Шулай итеп, Һошея үзенә хатынлыкка Диблаим кызы Гамәрне алды, һәм ул, авырга калып, аңа бер ир бала тапты.

4 Аннары Раббы Һошеягә:

– Балага Изрегыл дип исем куш, чөнки тиздән Мин Изрегылда ^{▼▼ Исраил патшасының һәм аның туганнарының җанын кыеп, Еһүнең Изрегылда үзен патша дип игълан итүе турында сүз бара (карагыз: «IV Патшалар», 9–10).} түгелгән кан өчен Еһү йортын җәзага тартачакмын һәм Исраил йортының патшалык итүенә чик куячакмын. 5 Ул көнне Мин Изрегыл үзәнендә Исраилнең җәясен сындырачакмын, – диде.

Раббы мәрхәмәтеннән аерылу

6 Гамәр, тагын авырга калып, кыз бала тапты. Раббы Һошеягә:

– Балага Ло-Рухама ^{▼▼ Ло-Рухама – яһүдчә «шәфкать күрсәтелмәгән» мәгънәсендә.} дип исем куш; чөнки Мин, Исраилне рәхим-шәфкатемнән аерып, аны инде кичермәячәкмен. 7 Яһүдә йортын исә рәхмәтемнән ташламам: аны җәя-кылыч, сугыш яисә ат-җайдаклар илә түгел, бәлки Раббы Алла кулы белән коткарырмын, – диде.

8 Ло-Рухаманы күкрәктән аерганнан соң, хатын, янә авырга калып, ир бала тапты. 9 Раббы Һошеягә:

– Аңа Ло-Амми ^{▼▼ Ло-Амми – яһүдчә «минем халкым түгел» мәгънәсендә.} дип исем куш, – диде, – чөнки сез Минем халкым түгел, Мин дә сезнең Аллагыз түгелмен.

10 Әмма шулай да исраилиләрнең саны диңгез комыдай үлчәп тә, исәпләп тә бетергесез булачак. Һәм аларга: «Сез Минем халкым түгел», – дип әйтелгән урында: «Сез – тере Аллаһының балалары», – диячәкләр. 11 Яһүдә вә Исраил угыллары, берләшеп, үзләренә бер юлбашчы сайлап куярлар һәм бу җирдән чыгып китәрләр. Әйе, Изрегылның ^{▼▼ Изрегыл – яһүдчә «Аллаһы чәчә» мәгънәсендә.} алдагы көне бөектер!