Jer 47 | TatIBT15 | STEP | Мисыр фиргавене Газа шәһәренә һөҗүм итәр алдыннан, Иремия пәйгамбәргә пелештиләр турында Раббыдан хәбәр килеп иреште.

‏ Jeremiah 47

Пелештиләргә килгән бәла

1 Мисыр фиргавене Газа шәһәренә һөҗүм итәр алдыннан, Иремия пәйгамбәргә пелештиләр турында Раббыдан хәбәр килеп иреште.

2 «Раббы болай ди:
„Менә, төньяктан сулар ургылып килә,
алар, елга кебек ташып, җирне вә анда булган һәр нәрсәне,
шәһәрне вә анда яшәүчеләрне басып китәр;
шул чагында кешеләр үкереп елар,
илдә яшәүче бар кеше илереп-илереп елар.
3 Дошман тайларының тояк тавышын,
арбалар дөбердәвен, көпчәкләр шакылдавын ишетеп,
аталар, ярдәм итәргә дип, үзләренең балаларына әйләнеп карамас,
чөнки куллары хәлсезләнеп салынып төшәр.
4 Барча пелештиләрне һәм аларның исән калган ярдәмчеләрен –
Сур вә Сидунны юк итү көне ул.
Мин, Раббы, Кәфтур ^{▼▼ Кәфтур – Крит утравы.} утравыннан килгән пелештиләрне кырып бетерермен!
5 Газа кайгыдан чәчен кырыр,
Ашкылун тынып калыр.
Әй исән калган үзән халкы,
кайчанга кадәр тәнегезне җәрәхәтләрсез ^{▼▼ Кайгы билгесе итеп үз-үзеңне җәрәхәтләү турында сүз бара.} икән?!“»

6 «И Раббы кылычы,
кайчан да булса тынычланырсыңмы икән син?
Әйдә, кире кыныңа кереп утыр,
җитәр инде, тукта!» ^{▼▼ Пелештиләр сүзе булса кирәк.} –
7 Ләкин Раббы Үзе әмер иткәндә, кылыч ничек тынычлана алсын?!
Ашкылун шәһәренә һәм диңгез ярына каршы
Раббы Үзе җибәрде бит аны!