Mic 1 | TatIBT15 | STEP | Яһүдә патшалары Иотам, Әхәз һәм Хизәкыйя идарә иткән заманнарда морешетлы Михә пәйгамбәргә Раббы Үз сүзен җиткерә торды. Самарея белән Иерусалим хакында аңа Раббыдан менә нинди вәхи булды:

‏ Micah 1

1 Яһүдә патшалары Иотам, Әхәз һәм Хизәкыйя идарә иткән заманнарда морешетлы Михә пәйгамбәргә Раббы Үз сүзен җиткерә торды. Самарея белән Иерусалим хакында аңа Раббыдан менә нинди вәхи ^{▼▼ Вәхи – Аллаһы тарафыннан пәйгамбәр күңеленә салынган хәбәр. Яһүд телендәге төп нөсхәдә сүзгә-сүз: Аллаһыдан иңгән күренеш.} булды:

2 Әй халыклар, һәммәгез тыңлагыз,
җир дә, җирдәге һәрбер җан иясе дә тыңласын:
Хуҗа-Раббы Үзенең изге йортыннан
сезгә каршы шаһитлык бирә.
3 Күрегез: Раббы, Үзенең яшәгән урыныннан чыгып,
тау башларына басып, түбән төшә.
4 Аның аяк астында таулар
утка төшкән балавыз сыман эри,
таудан агып төшкән ташкыннан ерылган сыман,
үзән җирләр икегә аерыла.
5 Бу – Ягъкуб нәселе кылган җинаятьләр,
Исраил халкы кылган гөнаһлар өчендер.
Ягъкуб нәселен гөнаһ юлына кем этәрде соң?
Самарея түгелмени?!
Яһүдә җирендәге потханәләр төзүдә кем гаепле соң?
Иерусалим түгелмени?!
6 «Шуңа күрә Самареяне хәрабәләр өеменә,
йөзем үрчетә торган урынга әйләндерермен, – ди Раббы, –
шәһәр ташларын үзәнлеккә аударып,
нигезенә кадәр җимерермен!
7 Аның барча потларын ватып бетерермен,
уйнашчылык итеп алган бүләкләрен утка салырмын,
бөтен пот-санәмнәрен җимерермен!
Уйнашчылык итеп алган бүләкләре
яңадан да фахишәләргә бүләккә китәр».

8 Шуңа күрә мин үкереп елармын,
яланөс, яланаяк йөрермен;
чүл бүресе кебек улармын,
ябалак кебек ухылдармын.
9 Чөнки Самареянең ярасы төзәлерлек түгел,
аның авыруы Яһүдәгә кадәр таралды –
халкымның капка төбенә,
Иерусалимнең үзенә кадәр барып җитте.
10 Бу хакта Гәттә ^{▼▼ Гәт – биредә сүз уйнату: яһүд телендә «сөйләү» сүзе белән аваздаш.} сөйләмәгез,
кычкырып еламагыз анда.
Бәйт-Лыгапрада ^{▼▼ Бәйт-Лыгапра – биредә сүз уйнату: яһүд телендә «көл йорты» сүзе белән аваздаш.} көлдә аунагыз.
11 Ә сез, Шапирдә ^{▼▼ Шапир – биредә сүз уйнату: яһүд телендә «гүзәл» сүзе белән аваздаш.} яшәүчеләр,
шәрә калган, хурлыкка төшкән хәлдә әсир китәрсез.
Саананда ^{▼▼ Саанан – биредә сүз уйнату: яһүд телендә «чыгу» сүзе белән аваздаш.} яшәүчеләр шәһәрдән чыгарга җөрьәт итмәс.
Бәйт-Әсәлдә яшәүчеләр кайгыга баткан:
сезгә һичнинди ярдәм булмас!
12 Маротта ^{▼▼ Марот – биредә сүз уйнату: яһүд телендә «кайгылы» сүзе белән аваздаш.} яшәүчеләр, борчылып, яхшы хәбәр көтәләр,
әмма Раббы Иерусалим капкасына һәлакәт җибәрде.
13 Әй Лахишта ^{▼▼ Лахиш – биредә сүз уйнату: яһүд телендә «ат» сүзе белән аваздаш.} яшәүчеләр, атларыгызны арбаларга җигегез!
Сион-кызның гөнаһ юлына аяк басуына
сез сәбәпче булдыгыз,
чөнки Исраилнең җинаятьләре сездән башланды.
14 Ә хәзер, яһүдиләр, хушлашу бүләкләрен ^{▼▼ Хушлашу бүләге – кияүгә чыккан кыз төп йорттан киткәндә, әти кеше бирә торган бүләк күздә тотыла.}
Морешет-Гәткә озатыгыз.
Әкзиб ^{▼▼ Әкзиб – биредә сүз уйнату: яһүд телендә «ялган» сүзе белән аваздаш.} шәһәренә өметләнеп, Исраил патшалары алдана гына.
15 Әй Марешада ^{▼▼ Мареша – биредә сүз уйнату: яһүд телендә «баскынчы» сүзе белән аваздаш.} яшәүчеләр,
Раббы сезгә каршы баскынчылар җибәрер,
һәм Исраил түрәләре Адулламга качып китәр.
16 И-и яһүдиләр, сөекле балаларыгыз өчен кайгырып,
чәчләрегезне кырыгыз.
Башыгыз бөркетнеке сыман шәрәләнеп калсын,
чөнки балаларыгыз сөрген китәр.