Psa 131 | TatIBT15 | STEP

‏ Psalms 131

Зиярәтчеләр җыры.

1 – 2 И Раббы, Давытыңны, ул кичергән газапларны,
Раббы алдында эчкән антын –
Ягъкубның кодрәтле Алласына биргән нәзерен исеңә төшер!
3 – 4 – 5 Ул әйтте: «Раббыга – Ягъкубның кодрәтле Алласына
яшәр урын, йорт тапмыйча торып,
мин үз өем-чатырыма кермәячәкмен,
ятагым түшәгенә ятмаячакмын,
күзләрем йокы күрмәячәк,
күз кабакларым йомылмаячак!» – диде.

6 Менә, без Аллаһы сандыгы хакында Эфратада чакта ишеттек
һәм аны Ягар кырларында эзләп таптык.
7 Әйдәгез, Аллаһы йортына барып,
Аның аяклары баскан урында ^{▼▼ …аяклары баскан урында… – Биредә Аллаһы сандыгы торган урын күздә тотыла.} сәҗдә кылыйк!

8 И Раббы, кодрәтең билгесе булган сандыгың белән
Үзеңнең торагыңа ^{▼▼ …торагыңа… – Яһүд телендәге төп нөсхәдә сүзгә-сүз: тыныч-имин урыныңа.} кил!
9 Руханиларың тәкъвалык киеменә төренсен,
тугрыларың сөенечләр эчендә тантана итсен!

10 Үзең май сөрткән заттан колың Давыт хакына йөз чөермәсәң иде!
11 – 12 Раббы Давытка ышанычлы антын бирде:
«Нәсел орлыгыңнан берәүне тәхетеңә утыртачакмын.
Әгәр угылларың, Килешүемә тугры калып,
биргән күрсәтмәләремне үтәсә,
аларның үз угыллары да гомер бакый синең тәхетеңдә утырыр»,
һәм антыннан Раббы баш тартмаячак.

13 Раббы Иерусалимне ^{▼▼ …Иерусалимне… – Яһүд телендәге төп нөсхәдә сүзгә-сүз: Сионны.} үз итте,
аны Үзенә өй итеп сайлады:
14 «Яшәгән урыным мәңге шушы булыр, – диде. –
Биредә төпләнәчәкмен, чөнки аны Үзем сайладым.
15 Ризык-нигъмәтләрен мул кылырмын,
фәкыйрьләренең тамагы тук булыр;
16 руханиларын котылу киеменә төрермен,
тугры адәмнәре сөенешеп тантана итәрләр.
17 Давыт нәселеннән шушында көчле патша куярмын –
май сөрткән затымның шәм-чырагын сүндермәм;
18 аның дошманнарын хур итәрмен,
башындагы таҗы ялтырап-балкып торыр».