Psa 52 | TatIBT15 | STEP | Җырчылар җитәкчесенә: «Махалат » көенә. Давытның нәсыйхәт сүзләре.

‏ Psalms 52

1 Җырчылар җитәкчесенә: «Махалат ^{▼▼ Махалат – әлеге яһүд сүзенең мәгънәсе анык түгел.}» көенә. Давытның нәсыйхәт сүзләре.

2 Акылсызның күңел төбендә
«Аллаһы юк!» дигән уй ятар.
Кешеләр азды, эшләре җирәнгечтер,
игелек кылучы һичкем юк.

3 Аны эзләүче берәр акыллысы бармы икән дип,
Аллаһы күктән бәндәләренә күз салды.
4 Юк, һәммәсе юлдан язган,
бозыклыкка бердәй баткан;
игелек кылучы күренми,
һичкем юк!

5 Икмәк кисәге йоткандай, халкымны йотучы,
Аллаһыга дога кылмаучы
ул бозыклар шулай акылга килмәсме инде?
6 Хактыр: курыкмас җирдән дәһшәтле курку алачак әле аларны,
чөнки Аллаһы сиңа ^{▼▼ …сиңа… – Ягъни Исраил халкына.} каршы баш күтәрүченең сөякләрен таратып ташлар;
Аллаһы читкә тибәргәнне син мәсхәрәгә калдырырсың.

7 Килсен Исраилгә котылу Сионнан!
Аллаһы Үз халкына муллык-иминлек кайтаргач,
Ягъкуб токымы сөенәчәк,
Исраил халкы шатлык кичерәчәк әле!