Psa 109 | TatIBT15 | STEP | Раббы минем хуҗама : «Дошманнарыңны синең аяк астына баскыч басмасы итеп түндергәнче, Минем уң ягымда утыр!»

‏ Psalms 109

Давытның мәдхиясе.

1 Раббы минем хуҗама ^{▼▼ …хуҗама… – Ягъни патшага.}:
«Дошманнарыңны синең аяк астына баскыч басмасы итеп түндергәнче,
Минем уң ягымда утыр!» – диде.
2 Әй хуҗам, патшалыгыңны Раббы Сионнан да ары киңәйтер –
әйләнәңдәге дошманнар өстеннән идарә ит!
3 Яуга кузгалган көнне халкың сиңа үз теләге белән кушылыр;
изге киемнәргә төренеп, яшь яугирләрең ^{▼▼ Яугир – сугышчы.}
синең янга иртәнге чык кебек тупланыр.

4 Ант эчте Раббы:
«Мәлик-Садыйк дәрәҗәсендәге мәңгелек рухани син!» – диде,
һәм Үз сүзеннән Ул кайтмаячак.
5 Хуҗа-Хаким синең уң ягыңдадыр,
каһәре көнендә патшаларны юк итәчәк Ул;
6 халыкларга хөкемен чыгарачак,
җир өстен мәетләр белән каплаячак,
патшаларны иксез-кырыйсыз сугыш кырында тар-мар итәчәк.

7 Патша, юл читендәге инештән су эчеп,
башын галибанә чөячәк.