Psa 82 | TatIBT15 | STEP | Асафның җыр-мәдхиясе.

‏ Psalms 82

1 Асафның җыр-мәдхиясе.

2 И Аллаһы, дәшмичә сүзсез торма!
Битараф булма, и Аллаһы!
3 Чөнки әнә дошманнарың дау куптара,
Сиңа нәфрәтлеләр баш калкыта.
4 Халкыңа каршы мәкер коралар,
газизләреңә каршы киңәшмә җыялар.
5 Такылдыйлар: «Тупланыйк!
Аларны халыклар исемлегеннән алып ташлыйк!
Исраил исеме мәңгегә онытылсын», – диләр.
6 Алар шулай үзара сүз беркетеп,
Сиңа каршы берлек оештырганнар:
7 болар – эдомиләр, исмәгыйлиләр, мәабиләр, һаҗәриләр,
8 аммониләр, амалыкыйлар, пелештиләр
һәм дә Гәбал белән Сур халкы.
9 Ашшур халкы да аларга кушылган,
Лутның нәсел варисларына ^{▼▼ Лутның нәсел варислары – аммониләр һәм мәабиләр.} куәт өстәгән.

10 Боларга Син Мидьян халкына ^{▼▼ Карагыз: «Хакимнәр», 6-8.}
һәм Кыйшон инеше янында Сисера белән Ябингә ^{▼▼ Карагыз: «Хакимнәр», 4-5.} эшләгәнне эшлә:
11 Син аларны, Эн-Дор каласы янында кырып салып,
туфрактагы тирес кебек иттең.
12 – 13 Ореб белән Зиебка, Зебах белән Салмунга нәрсәләр кылган булсаң,
бу илбашларына да шуны ук кыл,
чөнки алар: «Аллаһының утлауларын үзебезгә алыйк!» –
дип әйткән булганнар.
14 И Аллаһы, Син аларны өермә эчендәге тузанны,
җил уңаена очкан саламны очырткандай туздырып ташла!
15 Урманнарны көлгә әйләндергән ут кебек,
тау битләрен көйдергән ялкын кебек,
16 давылың белән сыпырып ташла,
җил-өермәң белән өннәрен ал!
17 Йөзләрен хурлык тамгасы белән каралт! –
Сине, Раббы, эзли башласыннар!
18 Мәңге шулай хурлык, дәһшәт эчендә калсыннар,
рисвай булып юкка чыксыннар.
19 Җир йөзендә Синең бердәнбер Аллаһы Тәгалә,
исемең Раббы икәнен төшенсеннәр!