Song 1 | TatIBT15 | STEP | Сөләйман турындагы җырлар җыры. Мәгъшука Иреннәре белән үпсен ул мине! Синең иркә-назың шәрабтан дә татлырак.

‏ Song of Solomon 1

Беренче җыр

1 Сөләйман турындагы җырлар җыры. ^{▼▼ Сөләйман турындагы җырлар җыры. – Яһүд телендә әлеге җөмлә «Сөләйманның җырлар җыры» дигәнне дә аңлатырга мөмкин. (Сөләйман – Исраил патшасы, Давыт патшаның углы.)}

Мәгъшука ^{▼▼ Мәгъшука, мәгъшук – сөйгән яр.} Иреннәре белән үпсен ул мине!
Синең иркә-назың шәрабтан дә татлырак.
2 Тәннәреңнән хуш исләр аңкый,
исемең дә хушбуй кебек синең;
кызлар шуңа ярата сине.
3 Күзең генә сирпе – без синең артыңнан чабарга әзер!
Патша мине үзенең сараена алып керде.
Син безнең өчен шатлык-сөенеч чыганагы,
синең назларыңны шәрабтан дә югарырак күккә чөеп мактарбыз –
яратуга лаек син!
4 И Иерусалим кызлары!
Кыдар чатырларыдай каратут йөзле булсам да,
Сөләйманның чаршаулары сыман матур мин.
5 Кара-тутлы булуыма исегез китмәсен –
кояш шулай каралтты мине.
Абыйларымның миңа ачулары килеп,
йөзем бакчаларын сакларга кизү итеп куйдылар,
ләкин үземнең баг-бостанымны саклап кала алмадым мин.
6 Әйтче, сөеклем, кайда көтәсең син көтүеңне?
Төшкелектә кайда ял итәсең?
Нигә әле мин дусларыңның көтүләре янында, бөркәнчек бөркәнеп,
каңгырып йөрергә тиеш ди?!
Мәгъшук 7 И кызыкай, гүзәлләрнең дә гүзәле!
Әгәр син моны белмисең икән,
куй көтүләре артыннан ияреп бар да
көтүче егетләр тирмәсе янында кәҗә бәтиләреңне утлатып йөр.
8 Фиргавен арбасына җигелгән байталга
охшаттым мин сине, мәгъшукам!
9 Яңакларыңны асылма зиннәтләр бизәп тора,
муеныңда муенсалар.
10 Көмештәй җемелдәп торган
алтын муенса эшләтербез сиңа, мәгъшукам!
Мәгъшука 11 Патша үз өстәле янында шулай утырганда,
минем нард ^{▼▼ Нард – Һиндстанда үсә торган үсемлек.} хуш исләр таратып торды.
12 Мәгъшукым минем – мирра бәйләме кебек,
күкрәкләрем уртасында ята ул минем.
13 Эн-Геди йөзем бакчаларындагы
бәйләм-бәйләм кына чәчәкләре кебек минем сөйгән егетем!
Мәгъшук 14 Аһ, нинди гүзәл кыз син, гүзәлкәем, нинди гүзәлсең!
Күгәрченнекедәй синең күзләрең.
Мәгъшука 15 Аһ, нинди гүзәл егет син, сөеклем, татлыдыр иркә-назларың!
Ятагыбыз безнең – хәтфә чирәм үлән;
16 өебезнең түшәм-түбәсе – эрбет ябалдашлары,
диварлары – кипарислар.