Psa 46 | TelTSA | STEP | దేవుడు మనకు ఆశ్రయం బలం, ఇబ్బందిలో ఎప్పుడు ఉండే సహాయం

‏ Psalms 46

సంగీత దర్శకునికి. అలామోతు రాగంలో కోరహు కుమారుల గీతము.

1 దేవుడు మనకు ఆశ్రయం బలం,
ఇబ్బందిలో ఎప్పుడు ఉండే సహాయం
2 కాబట్టి భూమి మార్పుచెందినా,
నడిసముద్రంలో పర్వతాలు మునిగినా, మేము భయపడము.
3 జలాలు గర్జించినా నురుగు కట్టినా
పర్వతాలు వాటి పెరుగుదలతో కదిలినా మేము భయపడము. సెలా

4 అది ఒక నది. దాని శాఖలు దేవుని పట్టణాన్ని సంతోషపెడతాయి,
అది మహోన్నతుడు నివసించే పరిశుద్ధస్థలము.
5 అందులో దేవుడున్నారు, అది కూలదు;
తెల్లవారగానే దేవుడు దానికి సహాయం చేస్తారు.
6 దేశాలు గందరగోళంలో ఉన్నాయి, రాజ్యాలు కూలిపోతాయి;
దేవుని స్వరం ఉరుముతుంది, భూమి కరుగుతుంది.

7 సైన్యాల యెహోవా మనతో ఉన్నారు;
యాకోబు దేవుడు మనకు కోట. సెలా

8 రండి యెహోవా చేసిన క్రియలను చూడండి,
లోకంలో నాశనాన్ని ఆయన ఎలా తెస్తారో చూడండి.
9 ఆ కొన నుండి ఈ కొనదాకా భూమి మీద
యుద్ధాలు జరగకుండా ఆయనే ఆపివేస్తారు.
విల్లును విరుస్తారు, ఈటెను ముక్కలు చేస్తారు;
రథాలను ^{▼▼లేదా కవచాలు} అగ్నితో కాల్చేస్తారు.
10 “ఊరకుండండి, నేనే దేవున్ని అని తెలుసుకోండి;
దేశాల్లో నేను హెచ్చింపబడతాను,
భూమి మీద నేను హెచ్చింపబడతాను.”

11 సైన్యాల యెహోవా మనతో ఉన్నారు;
యాకోబు దేవుడు మనకు కోట. సెలా