‏ 1 Corinthians 1

Aklheianma apvalhok Pablo ko Corintios

1Ko’o Pablo, heiavekama panke lhta Jesucristo kakpota atnek heiapaskamo mota aniem’o nhan apkeltema Eniapom Neten, alhelhma nhan hengke’e eialheng Sostenes. 2Nketlhenkek engelvalho’ok apkellelto iglesia apankok Eniapom Neten apkakhangko ham Corinto. Apkellelto nak nema alpokkanma kakpota elpasmekhak Cristo Jesús, etnangkok na Eniapom Neten apkennemolhema. Apkelpasmekha nhan aplhamakho lhmankek ham apkeltakneskasekamok na apvesai’a Jesucristo, apto apveske apanko’ok kakpota nhan apveske engankok ennengko’o. 3Askeltavek Eniapom Neten kanhan Apveske engankok Jesucristo eltaqmelkeskesek apkellaniemhaikama ketlhengkap ham, ellangkok na altaqmelaikama apvalho’ok.

Aptema gracias Pablo Eniapom Neten

4Astek ko mota gracias Eniapom Neten ngkanek apkellaiangke lhta ketlhengkap qaselha altaqmelo ma’a aniem’o Cristo Jesús. 5Apkellangkek na Eniapom Neten akiavai’a nkek apkeliangveiakmo kanhan apkenmopvanka’a etlhenek apvesai’a m’a aniem’o nhan apkelpasmekha Cristo Jesús ketlhengkap. 6Nnankek na ania’a apvalho’ok mankomaskengvaiam aplhenammap apvesai’a m’a.

7Hai, apkellangke lhta Eniapom Neten aklhamakho apkenmopvanka’a, kolhva koka mamma alaimelhkelha qaselha neksa apkelel·halhanma apteiapvo’o ta apveske engankok Jesucristo. 8Eniapom Neten hata etneskesangkok aliennaktema meliaskeiam ketlhengkap akvakmo aktakha nnelha kakpota metlhenek enenlhet apnaqtevaskama mota po’ok napaqtek apveske engankok Jesucristo apteiapvo’o ta m’a. 9Eniapom Neten apto apkeliekieskama ketlhengkap kakpota etnangkok apkelpasmekha apketka Jesucristo apveske engankok, apieplavkaske mota nhan aktakha la apaivoma aplheianma m’a.

Aktaqmanma antangkok nempasmekha

10Ketlhengkap elialheng’a, askelelmalhneskaskek akieplomo apvesai’a apveske engankok Jesucristo ntasek etnangko mota aknemo mo’ok apvalho’ok apieseksek anak ketlhengkap ham. Metka nhan apkelhpaknaikama, vanlha etnangkok apkelpasmekha ham. Etnamok hata aknemo mo’ok apvalho’ok atlhenaikama kanhan aknemo mo’ok apvalho’ok apkenmak’akha la etnangkok. 11Ka ngkanek ko’o atnek aspaioma alanak ketlhengkap elialheng’a aniem’o lhta aslengai’a ania’a heltennaskama apkennemolhema Cloe, apkeliamenammakpo lhna lhta mota ketlhengkap ham. 12Lhna lhta aptaiangkok moklhem’a hengke’e:

—Ennengko’o nelieplavkasak hengetlhekmoskama Pablo —lhna lhta aptaiangkok ma’a.

Koka napokha lhna lhta aptaiangkok:

—Ennengko’o koka nelieplavkasak hengetlhekmoskama Apolos —lhna lhta aptaiangkok ma’a.

Po’ok na lhta nhan aptaiangkok:

—Ennengko’o koka nelieplavkasak hengetlhekmoskama Cefas ▼

▼Pedro.

—lhna lhta aptaiangkok.

Aplhamakha lhnak na aptaiangkok:

—Ennengko’o koka nelieplavkasak hengetlhekmoskama Cristo —lhna lhta aptaiangkok.

13¡Cristo koka have nema aliapkesekha la apiokha! Ko’o Pablo meliaqlhaiangkok na emeiok emankok neten iamet aktenneskama askeliaqmoiekha la ketlhengkap. Mang na enmaikama asvesai’a neksa apkellavkeskama konne iemmen ketlhengkap. 14Gracias stak ko’o Eniapom Neten mollavkesaiangkok konne iemmen ketlhengkap lhema aphapak la’a. Vanlha lhtoka askellavkesaiangko konne iemmen ma’a Crispo kakpota nhan Gayo. 15¡Metlhenama nkek ketlhengkap kno ta allavkeso konne iemmen akieplomo asvesai’a! 16¡Ia’! Nlheianvakhek evalhok askellavkesaiangko nak na Estefanas atkak, skanek ko’o mamma mokhom po’ok enenlhet la’a. 17Nkanek ma lhta heiapaskama Cristo kakpota allavkesangkok konne iemmen enenlhet’avok, vanlha koka heiapaskamo altennama ania’a aktaqmanma metka alhenammalhko ehenkok ehenkek nema asiamoho askeltennaikamaha, kakpota mankovaivente aklhenammalhka ania’a apketsepma lhta Cristo neten iamet aktenneskama. Ngkanek akto neten ankek akiaspommalhka m’a ania’a nak ma’a, mangkolhnok asmopvana nak ko altennama ania’a.

Aknema akmovana ania’a aktaqmanma apvesai’a Cristo

18Ka ania’a nak aplhenammap apketsepma Cristo neten iamet aktenneskama, nietnek akmovana aniem’o Eniapom Neten apieseksek apkellelto ta apkelvonkasemmap tep, koka apkellanengkek aktaikama nkek ma’a apkellelto ta apkenmaikamok akieto nenmaskengvaianlha. 19Ka ntemak na aktalhesammalhka vakkahak Eniapom Neten apaivoma hengke’e:

«Anaktevaskese ta apkeliangveiakmo nak nema nak apkeliangveiakmo, aihengekhak hata nhan apkeliamo apanko’ok apankavek nema nak apkeliamo ▼

▼Isaias 29:14

», lhna ntemak ma’a.

20¡Aqhemo m’a apkeliangveiakmo nema nak apkeliangveiakmo, escribas, kanhan apkenmopvanka’a apkelpaqmeiasma etlhenek qaselha nenvanlha nak! Eniapom Neten koka aptemeskesakhak aktaikama nkek ma’a apkeliangveiakmo nak. 21Mankollapvankek enenlhet’avok eliekpelkok Eniapom Neten aniem’o apanko’ok apankave nak apkeliangveiakmo, koka apiangveiakmo nak Eniapom Neten nkeltavek nkolvongkesek tep aniem’o nhan ania’a apanko nak, apkeleltaiangko nak enenlhet’avok taikama nkek ma’a. 22Apkellelto nak judios vanlha apkeleltavek elvetak qaselha mongenatkeskama kakpota meliaskamek ma’a, koka apkellelto nak griegos vanlha apteniangkek aliangveskeskaiakmo la apkeliangveiakmo. 23Ennengko’o koka neleltennaskek ania’a Cristo apketsepma lhta neten iamet aktenneskama, apkeltaknevakkek koka judios ania’a nak, aktaikama nkek koka apkellanemak ania’a nak metnangko nak judios. 24Koka nengelelto nak hengellavekama Eniapom Neten, judios kanhan griegos, neliavek aktaqmanma nke nak apeneskamo lhta apmak’akha etnek Eniapom Neten, apkapaskama Cristo kakpota enietsepok neten iamet aktenneskama, ntemenke lhta m’a aniem’o apmopvana m’a. 25Niekhe moklhem’a enenlhet atlhenaikama apvalho’ok taikama nkek ania’a nak, koka akto neten ankek nema akiamo m’a, mamma enenlhet etnek ma’a aptemakha nak Eniapom Neten apkelanai’a. Niekhe moklhem’a enenlhet atlheianma apvalho’ok nkoiennaktema apiempek Eniapom Neten, koka have m’a, apiennaktema apankek ma’a, mamma enenlhet elhohok ma’a.

26¡Kolietnamano apaqto’ok elialheng’a! Apkanetek apkellelto nema apkeliamo apieseksek anak ketlhengkap aniem’o apketlheianma mota enenlhet, apkanetek na apkellelto apkelemhama apmaniaie’ apieseksek anak, apkanetek na apkelleniem’o la apkennemolhema apankavek aptangko neten apankavek apkeliaspommap ham, nkaqhok koka m’a apkeliekieskangke pankek Eniapom Neten ketlhengkap apieseksek anak. 27Hai, apkeliekieskek Eniapom Neten enenlhet apketlhenammap la metka apkeliamo kakpota etneskasokhak koneng ma’a nema nak apkeliamo. Apkeliekieskek enenlhet apketlhenammap la metka apiempeiok kakpota etneskasokhak koneng ma’a enenlhet aliennaktema la apiempeiok. 28Apkeliekieskek Eniapom Neten enenlhet apkeltaknommap anak, apketlhenammap anak na metnaikamok neten, metka nhan apkeliaspommap la’a, nkaqhok koka apkeliekieskek kakpota eltemeskasokhak koneng apkellelto nak apketlhenammap amota neten apankavek, 29kakpota mamma enenlhet’avok ellakpok napaqtek Eniapom Neten. 30Apkeliepetkasakhe lhta ketlhengkap Eniapom Neten Cristo, apto m’a malha apkeliangveiakmo apanko’ok, apkeltemeskeskamo nhan apkelpeivomo aniem’o m’a. Apkelpokkanmo nhan kakpota etnangkok Eniapom Neten apkennemolhema, apkel·hatsoskekho nhan neksa anmaikama moniamolhma. 31Ka ntemak na aktalhesammalhka Eniapom Neten apaivoma:

«Enenlhet apmak’o la etnek apkammakpo, ntasek eniakpok aniem’o apasmekha mota Apveske ▼

▼Jeremias 9:23-24

».