‏ 1 Corinthians 10

Mangeltammalhka angaho’ qaselha akiokha alanemmalhka

1Ketlhengkap elialheng’a, kotlheianvakho no apvalho’ok aktemakha lhnak nanek apkelvetai’a nelieihengka akieto m’a iokhalhma metkelha temma, aplhamakho lhnak nanek apketlhengamak koneng iephopai’a akiavai’a, aplhamakho lhnak nanek na m’a apkeliekai’o alvata. 2Malha lhna niekhe ntemak aplhamakho apkellavkesammap la iephopai’a kanhan alvata, apkelpasmekho lhnak nanek na Moises ma’a. 3Aplhamakho lhnak nanek na aptoiangko aptekamok aniem’o neten. 4Aplhamakho lhnak nanek na apienaiangkok iemmen aniem’o Eniapom Neten, akteiapma aiseksek metaimong aktemo mota atlhelhma’ak neksa apketlhengama m’a, koka metaimong anak Cristo m’a. 5Koka nketlhenkeskangkek nak nanek esavhakpok aptaikamok meliamolhma m’a, mang nak nkolleklemok apvalhok Eniapom Neten, lhna nkeniemai’ak apkelpelhiongveiakmo lhna apankavek nalhepop apkeletsepma m’a akieto iokhalhma metkelha temma.

6Ntase nkotlheianvakho mota engvalho’ok ma’a apkeltemakha lhnak nanek nelieihengka kakpota mongelvanankek ma’a aptaiangkolha m’a, mangeleltek angellanangkok ngkolatsekama aptaiangkolha lhnak nanek ma’a nelieihengka. 7Ka ngkanek ntasek meltaqneskasangkek qaselha akiokha allanemmalhka ketlhengkap, ka aptaiangkolha lhnak na nek ma’a nelieihengka. Ka aktemo nak na aktalhesammalhka vakkahak Eniapom Neten apaivoma hengke’e:

«Apkakhaiangkek enenlhet’avok aptoiangko aptekamok, apienaiangkek nahan, netamen ma’a apkelaqnekho neten apkennaiveiangka ▼

▼Exodo 32:6

», lhna ntemak.

8Mangkolatsema nhan antangkok nellanaktema, ka aptaiangko lhnak nanek ma’a nelieihengka’a annenga, lhna nkeniemai’ak eletsepok 23.000 enenlhet’avok ma’a, lhema aknem ankek noka m’a. 9Meliepkon na Cristo, ka aptaiangko lhnak nanek na nelieihengka’a, ka altaklheiangko lhnak nanek menasma m’a, apkeletsepmo nhan. 10Meleltamo nkek na metka nkek Eniapom Neten, ka aptaiangko lhnak nanek nelieihengka’a, lhnak nanek nkeniemai’ak nkonnapok netsepma ngken.

11Ntase nkotlheianvakho mota engvalho’ok ma’a aktemakha apkelvetai’a lhnak nanek nelieihengka kakpota mongelvanankek aptaiangkolha lhnak nanek ma’a. Ka ntemak na aktalhesammalhka lhnak nanek apkelvetai’a nelieihengka kakpota montangkek ennengko’o m’a, ngkanek ketse nkaimelhkak aktemongvanlha nnelha aknem. 12Niekhe enenlhet mankolheianma nak apvalhok metieme, ¡eniaho toka m’a, etiemok kelha nhan lheiap!

13Koka lhamakho nak akientalhnema apkelvetai’a ketlhengkap ntemengkek na m’a aplhamakho enenlhet, meniankehek hata Eniapom Neten na nkoiavangkok aliaqhapma akientalhnema akvakmo akvo’o la mankolelianmommalhko, eliephongveskamhok hato ka nhan ma’a Eniapom Neten neksa akvai’a akientalhnema nak aniem’o hempasmoma mota.

14Ka nkanek ma’a elialheng’a askellamelaiam, ntasek enieniangkok ma’a naqtek qaselha akiokha alanemmalhka. 15Asiave ko ketlhengkap nietnek apkeliangveiakmo, ntasek nkotlhene mota apvalho’ok aspaioma nak aktaqmanma, nlho ka la ngkolatsekama.

16Nenienaiangkek ennengko’o mota nohaikok akieplomo vino aktaqmanma akietkesammalhka m’a ema apankok Cristo, aniem’o nhan nelpasmekha m’a. Neliapteiangkek na, nentoiangko nhan pan akietkesammalhka koka nhan apiokha m’a aniem’o nhan nelpasmekha m’a. 17Niekhe nenlhamakma, malha enlhema koka ntakhak neliokha m’a aniem’o nentekamok apnemo po’ok pan.

18Nnavek na m’a israelitas, malha lhema aptaikokha ma’a neksa aptekamok apetek apnaqtoskama apkennapekamok kakpota elvanlhangkok akieto m’a alvanlhemmalhkelha qaselha.

19Astakha lhkek alheianma askeltema eliangvomhok ketlhengkap hengke’e ¡Mankekmama’ qaselha akiokha alanemmalhka nak, kanhan apetek anak aklhevai’a m’a have nhan akto neten akiaspommalhka m’a mankolhno m’a mo’ok apetek la’a! 20Neksa apkennapekamok apnaqtoskama metnangko nak judios apkellaikamok ma’a kasekapok av‘alho’ok, have m’a Eniapom Neten. Askeltavek ko’o ketlhengkap melpasmekhek ma’a kasekapok av‘alho’ok. 21¡Mankoietok ketlhengkap einangkok nohaikok ankok anak kasekapok av‘alho’ok kanhan nohaikok apankok anak Apveske! Mankoietok na etavangkok nentoma aktaqmanma Apveske nak apankok ka nhan keliaqhameio’ nentoma ankok. 22Mankoietok ma’a ngkanek eltemeskesek hata apankavek ketlhengkap apkennathaikama Apveske. ¡Ellaho ta ketlhengkap ma’a ngkanek neten ankek akietnema apmopvana m’a, have kto nak ennengko’o!

Nengeltammalhka angaho’ aklhenaikama apvalho’ok emmo’ok

23Nlhenalhke mota:

—Apvankek enenlhet apmak’akha la ellana —ka ntak ania’a m’a.

Jave niapak ma’a, koka have lhamakho qaselha allelto altaqmelo. Jave niapak apvankek na enenlhet apmak’akha la ellanak, koka mangkolatsema elanak aktevaskama nak po’ok. 24Mangkolatsema anteniangkok aktaqmanma nellaniemhaikama enganko’ok engankavek la’a, koka ntasek anteniangkok ma’a neltaqmelkeskeskama la apkellangiemhaikama emmo’ok.

25Apvanka’ak ketlhengkap etavangkok lhamakho aktemakha apetek alleniem’o nak aknaiangkelha alhammalhkelha apetek, melelmalhnama nkek ma’a aniem’akha apetek la’a kakpota mangkotvaskesek aklhenaikama apvalho’ok ma’a. 26Nkanek Eniapom Neten apto otep nalhepop lhmankek ham kanhan lhamakho qaselha aknaiangko nak hengke’e 27Ka apkellanekpo la eltasemok ketlhengkap enenlhet apiaskeiam la’a apnemakha, ntasek etavangkok lhamakho aktemakha nentoma apketlhevai’a la’a metka apkelelmalhnekama koka aniem’akha m’a kakpota mangkonaqtevaskesek atlhenaikama apvalho’ok ketlhengkap ma’a. 28– 29Koka apkeltennaso la apetek ankok nema akmeskama qaselha akiokha alanemmalhka, metavamonkek ma’a kakpota meietnokhaskesek apvalhok ma’a apto apnemakha, menaqtevaskesek na m’a akietnaikama apaqtek. Evanke niekhe atvok lhamakho aktemakha apetek, koka ntasek na motvek kakpota manghetlhenek asvesai’a ko’o.

30Stemenke mota gracias Eniapom Neten ko’o amanie asmahai’a la atvok astoma, mangkolatsema hetlhenama aniem’o astaseiam alhma. 31Ntasek ellaho Eniapom Neten neksa apkenmahai’a etavangkok, einangkok, kanhan lhamakho qaselha apkenmak’akha la ellanangkok. 32Mellanamo nkek qaselha alietnokhaskeskama la apvalho’ok judios, metnangko nak judios, ka nhan apkellelto nak iglesia apankok Eniapom Neten. 33Askelienlhanakmek ko mota nkollekkasama apvalho’ok aplhamakho enenlhet’avok astemakha, metka asteniai’a ehenkok ehenke’, asteniak koka kakpota altakmelkeskesek apkellangiemhaikama emmo’ok la’a kakpota nhan ngkolhek alvongkaso tep.