‏ 1 Corinthians 11

1¡Helvanamo ta mota astemakha nak ko’o, ko’o nhan asvaneiangke aptemakha lhta Cristo!

Aktemakha ngkelvana nempaioma alhankok

2Askeltaqneskasengkek ketlhengkap ngkanek nketlheianvakhe mota apvalho’ok ko’o, apkelleliahakhavek na askeleltennasekamo lhta etnangkok. 3Kolhva koka smak’ak alelpeiveskasekhak ketlhengkap, Cristo apto malha apqatek apkenno la’a, apkenno koka malha apqatek ngkelvana la’a, Eniapom Neten koka malha apqatek Cristo 4Lhema apkenno la’a apakmetkeso la Eniapom Neten, nlho ka la nhan elhenek ania’a aniem’o Eniapom Neten akieplomo apkapkeskama apqatek, koka meniak’ok ma’a apto apankok apqatek. 5Koka ngkelvana mankapkaso la apqatek neksa akpakmetkeso la Eniapom Neten, ka nhan aklheno la ania’a aniem’o Eniapom Neten, mankak’ok na m’a apqatek anke, malha akiesema ta ngkotnek ma’a. 6Mankomak’o la nkapkesek apqatek ngkelvana, ntasek ngkolhek akieseso ngkotnek alhnai’o nkek apqatek, koka akmangko la m’a, ntasek nkapkesek apqatek ma’a. 7Koka apkenno nak mangkolatsema eniapkesek apqatek ngkanek apiokha nak apkenno malha nenvetai’a la nhan Eniapom Neten, apientalhnemo nhan ma’a koka ngkelvana nak malha nenvetai’a apientalhnemo apankok apkenno. 8Ngkanek apkenno nak have apkeniem’o m’a ngkelvana, ngkelvana koka nkeniemai’ak apkenno. 9Apmanie lhnak nanek apkelanemmap apkenno, netamen akteiapmo nhan ngkelvana aniemai’o nhan ma’a apkenno. 10Ka ngkanek ntasek nkapkesek apqatek alvetaskeskama aktema koneng apientalhnemo apankok apkenno, ntasek na nkapkesek apqatek aniem’o ángeles.

11Koka metka akiekammalhka mo’ok ma’a apkenno kanhan ngkelvana apieseksek anak meliaskeiam Apveske, apkenno mankapvankek eloka metka ngkelvana, ngkelvana nhan mankavanke nkoloka metka apkenno. 12Hai’, neliavek ennengko’o akteiapmo lhnak na nek ngkelvana aniemai’o m’a apkenno, neliavek na ennengko’o apkenno nak apteiaiakmek ma’a aniem’o ngkelvana, koka lhamakho enenlhet’avok kakpota nhan lhamakho qaselha alleniemai’o lhnak na nek Eniapom Neten.

13Kolketamamok no apvalho’ok, ¿nietave nlho ngkelvana nkonmalhnak Eniapom Neten metka apkeskama la apqatek, nlho ka la mma’? 14Aniem’o nenteianlha hengenmangkaskek alvenaktema nak apva’ nentema apkenno’, 15koka ngkelvana’ak ntasek ma’a alvenaktema nak ava’ aniem’o nema aktemeskeskama m’a kakpota nkapok apqatek ava’ nak ma’a. 16Moklhem’a kelha apieseksek anak ketlhengkap apkenmak’o la helelpaqmetkesakpok ma’a aniem’o mankolleklemo apvalho’ok asketlhekmoskama nak, koka ennengko’o ka nhan aplhamakho iglesias apankok Eniapom Neten nengelieplavkaskek nentaiangkolha engankave nak.

Aktemakha apnaqtevaskamo po’ok neksa aptekamok nentoma aktaqmanma

17Aiosek lhta nteskasak evalhok asleng’o ania’a ngkolatsekama apieseksek ketlhengkap ham neksa apkaknekha lhnak apkelpasmekha nentoma aktaqmanma ham, man nak etnaiangkok ma’a apkeltakmelkeskeskama la apkellangiemhaikama po’ok, apnaqtevaskangkek noka m’a. 18Mankolhnemo mo’ok apvalho’ok na lhta nhan apkenmak’akha la etnangkok apieseksek anak ketlhengkap ham apkaqnakho la mota, have kelha niapak aktemakha aslengai’a ania’a. 19Neksa apkelhpankesammap amota alhnakho nkek nengvetai’a apkeltemakha la altaqmelo kanhan ngkollatsekama la’a. 20Koka have akto nentoma aktaqmanma apankok Apveske apkaqnakho la ham. 21Moklhem’a lhnak aptoiangko pekhai’a apkelletsenta aptekamok ma’a, mang nak ellailhemak po’ok ma’a, moklhem’a lhnak nkennapmak mek ham, po’ok nak menieskamak apiamo akvakmo nkeso akieihama lhma. 22¡Apkeliekai’ak ketlhengkap aktemakha nak aklhengama iglesia apankok Eniapom Neten kanhan metka nak apkelletsekama ham! Koka apkenmak’o la mellaksek etavokha aptekamok, einangkok nahan mankonmak’o la elpasmok po’ok aptekamok, motlhenama ta mota apkelvesai’a ketlhengkap apkeliamolhma ¡eniaqhamok hata apkakhaiangkolha apankave kakpota etavokhak ma’a!

Aktemakha hengetlhekmoskama nempasengvekha nentoma aktaqmanma

23Askeleltennaske lhta niekhe ketlhengkap ania’a heiaikamok alhta Apveske, pelhasep nak amanie knema akmahai’a ngkolhek aktevaso apveske Jesús ma’a. Apmamo lhnak pan, 24aptemo lhnak na gracias Eniapom Neten ma’a, ka apkeliaptemo lhnak, lhna aptemak apkellanemo apkeltamesaikamok:

—Enmamok, etavamok pan anak, koka akto akietkesammalhka asiokha ham nkoliaqtalhkak hata kakpota nkoltaqmelkeskesek apkellangiemhaikama ketlhengkap, etnamok hata mota alietnekho la apaqto’ok astemakha ko’o —lhna aptemak apkellanemo Jesús apkeltamesaikamok ma’a.

25Netamen aptekamok nak ma’a, apmamo lhnak na nohaikok, lhna aptemak apkellanemo:

—Enmamok nohaikok anak akieplomo vino, einamok nahan, koka akietkesammalhka nak alhnankok annemo mo’ok apvalho’ok apkenmahai’akha etnangkok aniem’o m’a akiangkenammalhka ta ema ehenkok, hata apienangko ta mota nkolietnekho ta mota apaqto’ok astemakha ko’o —lhna aptemak apkellanemo Jesús apkeltamesaikamok ma’a.

26Ka ngkeniemai’ak apkelpasmakho la mota aptekamok pan kakpota nhan apienaikamok vino, etlhene mota apketsepma lhta Apveske, ellanamo ta m’a akvakmo aknem apvektanlha ta.

27Ka nkanek aptavo la panke’ pan, apieno la nhan nohaikok akieplomo vino mankoietemo aptakha m’a, apselhnanemmap ma’a aniem’o meniai’o apiokhoho kakpota nhan ema apankok Apveske. 28Ka ngkeniem’ak nkaimelhkek elanhok sekhe apvalhok apanke, ntase ie nlho ka la mankolatsema, amanie apmahai’a etvok pan kakpota nhan einek vino, 29ngkanek ngkolhek hata akiaqmongkaskesakho aptemakha ngkolatsekama aptavo la apankek pan kakpota nhan apieno la apankek vino, ngkanek alietkesammalhka m’a apiokha Apveske. 30Mantek enenlhet apieseksek anak ketlhengkap akvai’o nak anmaska apiempeiok ham, meliennaktema, po’ok na apketsepak aniem’o aptoma apanke neksa apkelanai’a ngkollatsekama. 31Koka nelan’o la sekhek engvalhok ntase ie nlho ka la mangkolatsema amanie nemmahai’a anto’ok, manlhokiek hata nhan nema akiaqmongkasekha nentemakha. 32Koka apkelan’avek sekhek nentemakha Apveske, netamen ma’a apiaqmongkasakhek na nentemakha ngkolatsekama la’a kakpota netamen ma’a aniangvomho lhma m’a, mankovhek na mokhom nema akiaqmongkasekha ka aktemo nak ma’a melioho nak mokhom Eniapom Neten.

33Koka stak ko askellano ketlhengkap elialheng’a, neksa apkelpasmekha aptaveikokha la nentoma aktaqmanma, melpekhes ankek ketlhengkap etavangkok aptekamok ham, ellaielh hato ka sekhek po’ok ma’a. 34Koka annapo la mek amanie la apkenmahai’a enmeiakhak nemaknekhelha, ntasek etavokha ma’a apkakhaiangkolha apankave nak kakpota mellanie qaselha ngkolatsekama m’a akieto nak nemaknekhelha, metlhokiek na nema akiaqmongkasekha la’a apkeltemakha.

Hai’, vanlha m’a, hata asvaktamo ta mokhom astaikama la amaika’a ham, anmaskeskatak hata lhamakho aktemakha akientalhnema apkakhaikamok ham.