‏ 1 Corinthians 14

Aktemakha nenmopvana angeliatama mo’ok nempaioma

1Ketlhengkap elialheng’a, elienlhanmamok hata apkellasekhai’o po’ok, elienlhanmamok hata nhan nenmopvanka’a nak aniem’o Eniapom Neten, koka akto nhan neten ankek akiaspommalhka m’a nenlheianma ania’a aniem’o Eniapom Neten. 2Enenlhet apto la apmopvana eliatama apkelpakmeiasma manioho nak mokhom aplhengkek qaselha akielhammalhka m’a aniem’o apvalhok, apiave koka nhan Eniapom Neten aptakha apkeliatekama m’a, enenlhet koka meliohok ma’a. 3Koka enenlhet apto nak aplheianma ania’a apkaikamok aniem’o m’a Eniapom Neten apkelpaqmeiasma apanke nak, apkeltakmelkeskaskek apkellangiemhaikama m’a, apkeliatakhavek nahan, apkelpaieskeskakmek na apvalho’ok Jesucristo apkennemolhema. 4Apto la apmopvana eliatama mo’ok apkelpakmeiasma mangioho nak, ntaqmelkeskaskek apkaniemhaikama apankok apankek ma’a, koka apto la enenlhet aplheianma ania’a aniem’o Eniapom Neten, apkeltakmelkeskaskek apkellangiemhaikama iglesia nak ma’a.

5Askeltave niekhe aplhamakho nak ketlhengkap nkollapvanak elpaqmetama nkotno nak apkelpaqmeiasma melioho nak mokhom, koka ntasek melpaqmetek metko la enenlhet apmopvana elpeivesekhak kakpota nkoltaqmelkeskesek na apkellangiemhaikama iglesia nak ham. Metko la m’a, ntase elpaqmetek nempaivoma nke nak. 6Ka kto nak ma’a, asmeianto la ham apieseksek anak asto la amaika’a, akhemo ta ngkotnek aliatama mo’ok nempaivoma melioho ketlhengkap, meliehek hata nhan ania’a akielhammalhka aliatamaha, metlhokiek hata nhan apkeliangveiakmo, meliehek hata nhan ania’a aniem’o Eniapom Neten, meliehek na aktemakha asketlhekmoskama.

7Nnavek na nenmaikama nak nennekmaskama anko’ok iompa’at nlho ka la nhan arpa, nenpaivaso la nennekmaskeskama nennekmaskama melioho nak mokhom, meliehek hata enenlhet’avok. 8Ka kto nak trompeta la’a, ngkolhek akpaivaso mo’ok aktema akpaivoma, have akpaivoma aleltennaskama kempokhakme la aplheiam, mankollapvankek hata nhan elpenesok apkenmaikama kempokhakme la kakpota ennapakpok ma’a. 9Nnavek na ketlhengkap ham apieseksek anak, apkelpatmetengka la mok aktemakha apkelpakmeiasma melioho nak mokhom, akhemo ta ngkotnek ma’a, meliehek hata enenlhet ma’a. 10Mantek apkelpakmeiasma lhamakho aktemakha enenlhet’avok lhmankek ham, apkeliavek aktakha apkelpakmeiasma apkennemolhema apankavek apieseksek ma’a. 11Koka apvakmo la m’a lhema po’ok enenlhet mo’ok apkavakha, meihek hata aktemakha apkelpakmeiasma m’a apvanlha la’a, apkellavakha apankave nak ma’a meliehek hata nhan aptakha apaivoma po’ok enenlhet lhek.

12Avanhek apkeleltemo nkolhnangkok ketlhengkap apkenmopvanka’a aniem’o Eniapom Neten, koka ntasek elienlhanmankok ma’a apkenmopvanka nak eltaqmelkeskesek apkellangiemhaikama iglesia la’a.

13Enenlhet apkapvanko la eliatama apaivoma melioho mokhom, ntasek koka m’a enmalhnama Eniapom Neten kakpota eniapvanak na elpeiveskasokha apankek enenlhet’avok ma’a. 14Ka kto nak ko’o askenmalhno la nempaivoma melioho nak mokhom, evalhok ehenke akpaivoma, moihek na ko’o m’a. 15Ntasek nkonmalhna nkek evalhok ehenke, nkaimelhkek koka nhan aihok ma’a, koka ntasek na aniohok ma’a, ntasek na nkonnekmaksek evalhok ehenke nak, nkaimelhkek koka nhan aihok ma’a. 16Lheiap apiavenkaskesangka la apvesai’a Eniapom Neten mo’ok nempaivoma melioho mokhom aniem’o apvalhok apanke, mankollapvankek na enenlhet elpasmekhak ellatemmongkok aktakha la apaivoma m’a ngkanek meliohok ma’a, metnangkek hata nhan lhemek gracias Eniapom Neten ma’a. 17Ntasek ankek nkotnek lheiap ma’a apankok apankek neksa apkenmalhnonkoma la aptema gracias Eniapom Neten, koka mankoltaqmelkeskesek hata nhan apkellangiemhaikama po’ok la’a nkanek meliohok aptakha apaivoma m’a.

18Gracias ko stak Eniapom Neten ngkanek akietnema akiavai’a asmopvana aliatamaha nempaivoma monioho, neten ahenkek ko’o, aselhtek ketlhengkap. 19Koka asvakho la iglesia, ntasek aliekiaksek aliatamaha akiakvatema nempaivoma nke nak, have akto nak ma’a akvenaktema mo’ok nempaivoma nak mangioho.

20Elialheng’a, metnamo nkek malha akto nak nematkak mankoliamo nak, etnamok koka malha apkeliavo nak apkenmopvanka’a nak nkolketamama apvalho’ok, etnamok hata nhan malha akto nak nematkak mankolteniaikamok anak ngkolatsekama.

21Ka aktemo nak aktalhesammalhka vakkahak ley hengke’e:

«Aliatama ta nempaioma melioho, anmama ta po’ok enenlhet apatno’ok kakpota elpaqmetkesek apkellavakha nak hengke’e, nkaqhok hato ka mellailhek hata, lhna aptemak Apveske».

22Ka nemmopvana nak neliatekama mo’ok aktemakha apkelpaqmetekama, akto qaselha mongenatkeskama akmahai’a ngkolvetaskesek qaselha apkeliaskeiam anak, have m’a meliaskeiam anak. Koka nemmopvana nak anlhenek ania’a aniem’o Eniapom Neten, ka apsongkak ma’a meliaskeiam anak, have m’a apkeliaskeiam anak.

23– 24Kelha ngkotnek na apkaqnakho la ketlhengkap apkellelto iglesia akieto nempaivoma alhankok anak ham, elpaqmetek kelha nempaivoma melioho nak, netamen evak kelha amaika’a la’a enenlhet aplomakha apanke, nlho ka la lhema enenlhet apto apiaskeiam, nkotlhenek kelha apvalho’ok malha allanema ketlhengkap ma’a. Koka apkelpakmeto la ketlhengkap nempaivoma nke nak etlhenek aktemakha ania’a aniem’o Eniapom Neten, eihok hata nhan aptangkolha amaika’a m’a, elanhok hata nhan aktakha apvalhok apankek ma’a. 25Konne kankek hata nhan etak apvalhok ngkolatsekama m’a, kakpota elteklheiok aptapno’ok, enialhentamok napaqtek Eniapom Neten kakpota eniahok ma’a, eihangvomhok hata nhan have niapak ankek apnema apieseksek ketlhengkap ma’a.

Metka akiennoma lhma nemaknekhelha

26Elialheng’a, hata apkaknakho ta nempaivoma alhankok ketlhengkap, ntasek ma’a napokha ennekmasangkok salmos, napokha ta nhan etlhekmosangkok, napokha ta nhan etlhenek Eniapom Neten apaivoma, napokha nhan elpaqmetama mo’ok nempaivoma melioho nak, napokha nhan apkelpeivesekha m’a. Elienlhanmamok hata apkeltakmelkeskeskama la apkellangiemhaikama po’ok. 27Apkellelto la apkenmopvanka’a apkeliatekama mo’ok nempaivoma melioho, ntasek etnangkok vanlha apqanet nlho ka la apqanetolhem’a, nema apkelanmakha koka etnamok, lhema ta nhan etnek apkelpeivesekha m’a. 28Koka metko la apkapvanko elpeivesekha, melpaqmetankek napaqtavek iglesia m’a, ntasek epaqmetkesakpo panke, vanlha toka nhan Eniapom Neten ennak ma’a.

29Apkelelto la nhan apkeleltennasemmap ania’a, ntasek na etnangkok vanlha apqanet nlho ka la apqanetolhem’a, nema apkelanmakha koka etnamok ma’a kakpota aplhamakho ellailhok, etlhenek nahan aktakha apkelpaqmetekama aktaqmanma nlho ka la ngkolatsekama. 30Lhema aphapak apkeltennangka la’a, apno la nhan po’ok ma’a apmo la takha ania’a aniem’o Eniapom Neten, ntasek etnemekhak neten eiaqmongkesek ma’a elhenek ania’a aktemakha aplhevai’a. 31Ntase ngkotnek ma’a apkaknekha nak apkelanmakha apketlheno la ania’a aniem’o Eniapom Neten kakpota eliangvomhok, elvaskapok nahan aplhamakho apkellelto apkellailhemo m’a. 32Apvanka’ak apkeleltennasemmap ania’a enmankok apvalho’ok apankavek la’a neksa apkelpakmeiasma la’a, 33ngkanek mankolkok apvalhok Eniapom Neten neksa akiennoma lhma la’a, koka akleklemo apvalhok ma’a altaqmelaikama engvalho’ok anak.

Ntasek elieplavkesek nentaiangkolha na mota aplhamakho iglesias apkellelto apkelpokkenammap, 34ngkelvana’ak nkaimelhkek nkolvanmak neksa nemaknekha la’a, have aleltammalhkelha nkotnangkok nkolpaqmetama m’a, ley Moises anak aklheianma ntasek nkoleliehekho mota anakteiangka’a. 35Koka mankoiho la ngkelvana aktakha nema altennaikama neksa nemaknekha m’a, ntasek nkolmalhnengvakhak atava’ akieto aknemakha ngkanek qaselha henmankaskama m’a aliato la ngkelvana neksa nemaknekha.

36Enmamok hata takha hengetlhekmoskama nak, kotlhen hata nhan apvalho’ok have akteiapmakha Eniapom Neten apaivoma apieseksek anak ketlhengkap ham, aplhaniek na apketlhevaikamok alpalhkammalhka aptaiangkolha ania’a nak. 37Aptek hata nkek lhema aphapak la aplhenammakpo pankek apto apkeltennasemmap ania’a, apto nhan apkeliehekho Espíritu apankok Eniapom Neten, ntasek eihangvakho mota aktemakha asketlhekmoskama nak aniem’o Apveske engankok henganemakha apankok. 38Koka mankomak’o la eihangvakho, mankolhek na akiangvakho m’a.

39Hai, ka m’a alheno lhkek elialheng’a, elienlhanmamok hata apkenmopvanka nak etlhenek ania’a aniem’o Eniapom Neten, ellangko ta nhan eliatama mo’ok aktemakha nempaivoma meliohok nak, 40koka ntasek etnangkok aktaqmanma nak, nema apkelanmakha nhan neksa nemaknekhelha la’a.