1Cor 2 | TmfSC | STEP | Elialheng’a, neksa asvaiam alhta apieseksek anak ketlhengkap ham askeltennama lhta ania’a aplhenammap Eniapom Neten, moteniaikama nhan aktalhnemo nkek la alpelapkeskama apkellengai’a asiangveiakmo, nlho ka la nhan asmopvana aliatama.

‏ 1 Corinthians 2

Ania’a aktemakha aplhenammap Cristo apkelhnammap neten iamet aktenneskama

1 Elialheng’a, neksa asvaiam alhta apieseksek anak ketlhengkap ham askeltennama lhta ania’a aplhenammap Eniapom Neten, moteniaikama nhan aktalhnemo nkek la alpelapkeskama apkellengai’a asiangveiakmo, nlho ka la nhan asmopvana aliatama. 2 Vanlha lhta mota askeleltennaskamo akietemo nkek aklheianma evalhok ania’a aplhenammap Jesucristo apketsepma neten iamet aktenneskama. 3 Asketlhekmoske lhta napaqtavek ketlhengkap nalhepek evalhok kanhan ai’o enneniek anvapsongkesek asmakmekama. 4 Astenia lhtoka nkoliakvomok apankavek aniem’o Espíritu apmopvana, have aniem’o asiangveiakmo ehenkok ehenke nak. 5 Kakpota nkoliennak meliaskeiam aniem’o Eniapom Neten apmopvana, have aniem’o m’a nenianveiakmo aniem’o nak enenlhet.

Nenmopvana aniohok qaselha akielhammalhka aniem’o Espíritu

6 Asketlhekmoske lhtoka apieseksek anak aliennaktema nak meliaskeiam akieplomo asiangveiakmo, have koka aniem’o nak enenlhet, nlho ka la m’a apkelemhama apmaniaie nak, akmaskengvaiam anak apkelientalhnemo. 7 Asketlhekmoskek ko’o asiangveiakmo aniem’o Eniapom Neten, nenianveiakmo nak malha lhnak nanek akposemmalhka ntemak tep nak nanek, amanie nema alentepkeskama qaselha lhmankek ham kakpota alhaiek hengeltemeskesek hata neten engankavek ennengko’o. 8 Ma lhta nkoietnemak nenianveiakmo nak apkelemhama apmaniaie engankok alhta, ko lhtema nak akietnema la apkeliamoho, mennape lhta Apveske engankok aknema apmopvana neten iamet aktenneskama. 9 Ka aktemo nak na aktalhesammalhka vakkahak Eniapom Neten apaivoma hengke’e:

«Qaselha mongvetai’o nak, mollengai’o nhan, qaselha mankoietnaiangkolha lhta engaqtek, ka lhamakho qaselha nak apeneskamo lhta Eniapom Neten kakpota ellangkok ma’a apkelelto nak apkellasekhai’o ^{▼▼Isaias 64:4; Jeremias 3:16}».

10 Hengelvetaskaskek Eniapom Neten lhamakho qaselha nak aniem’o Espíritu, ngkanek Espíritu apiavek lhamakho qaselha akvakmo konne kankek apvalhok Eniapom Neten. 11 Nnavek na apvalhok apanke nak enenlhet apiavek akietnaikama nak apaqtek enenlhet, kakpota nhan vanlha Espíritu apankok Eniapom Neten apiavek ma’a akietnaikama apaqtek Eniapom neten. 12 Netlhevankek ennengko’o Espíritu apankok Eniapom Neten, mok aktema koka apvalhok anak enenlhet melioho nak Eniapom Neten, hengeliangveskeskakmek Espíritu apankok Eniapom Neten qaselha hengellaikamok alhta Eniapom Neten aniem’o aktaqmanma nkek hengellanei’o. 13 Neksa nengeltennaikama la ania’a aniem’o Eniapom Neten, nengelpaqmetkek ma’a aniem’o Espíritu apanko nak ma’a, have aniem’o m’a neliangveiakmo nak enganko’ok engankave’.

Hai, neksa nengelpeiveskasekha mota aptemakha Eniapom Neten, nelpaqmetkek nelpaqmeiasma aniem’o m’a Espíritu apanko nak ma’a. 14 Koka mangkollapvankek eliangvomhok ma’a apkellelto nak metka Espíritu apankok Eniapom ngkanek aktaikama ankek apkellanemak ma’a, vanlha koka apvankek iehangvomhok ma’a apietno la Espíritu apankok anak Eniapom Neten. 15 Apkellelto nak aknaikamok Espíritu apankok Eniapom Neten, apvanka’ak nkotlhenek apvalho’ok qaselha altakmelakha la’a, ngkolatsenkolha la’a, koka enenlhet’avok apankave nak mankollapvankek etlhenek apketselhnanemmap aknaikamo nak Espíritu. 16 Ka aktemo nak na aktalhesammalhka Eniapom Neten apaivoma hengke’e:

«Mamma enenlhet eliohok akietnaikama apaqtek Eniapom Neten, mangkollapvankek na enenlhet etlhekmosangkok ma’a ^{▼▼Isaias 40:13}», ntemak ma’a.

Ennengko’o koka atlhenaikama engelvalho’ok nnavek na aklhenaikama nak apvalhok Cristo.