1Cor 5 | TmfSC | STEP | Nlengammalhkek ania’a lhema aphapak apieseksek ketlhengkap apmensavekha iama ngken ham, koka akto ngkolatsekama nkek ma’a, mamma nhan akvetai’o qaselha nak ngkolatsekama apieseksek anak melioho nak mokhom Eniapom Neten.

‏ 1 Corinthians 5

Lhema enenlhet apkelanaktema

1 Nlengammalhkek ania’a lhema aphapak apieseksek ketlhengkap apmensavekha iama ngken ham, koka akto ngkolatsekama nkek ma’a, mamma nhan akvetai’o qaselha nak ngkolatsekama apieseksek anak melioho nak mokhom Eniapom Neten. 2 Apkelammakpe mota ketlhengkap apkelanei’o m’a enenlhet anak, koka nietavek nkolaioseskesek apvalho’ok, elentepkesek na m’a enenlhet anak aptevasekha iama ngken. 3 Molhnema ko’o ham apieseksek anak, malha koka aknema la evalhok apieseksek anak ketlhengkap ham, nlhenkek ko evalhok apselhnanemmap apanke kelha ham. Kolhva smak’ak aleltennaksek askeltakha etnangkok enenlhet anak apkelanaktema. 4 Neksa apkaknekha ta mokhom ketlhengkap ham akieplomo apvesai’a Apveske engankok Jesucristo, malha aknema ta nhan ngkotnek evalhok ko ham kakpota nhan apmopvana Jesucristo apveske engankok. 5 Ellamok hata enenlhet anak Satanas kakpota nkotvaksek apiokha nak, koka vanlha ta nkovongkasalhkak tep aphangok apvaktamo ta Apveske engankok Jesús.

6 Mangkolatsema ellakpok ketlhengkap aktakha qaselha apieseksek anak ham, maniamolhma nak malha niekhe alena apiepheskama nak, ketsek niekhe nengankai’a, koka apiephakhavek ma’a. 7 Ka ngkanek ntasek eklhangkok malha alena apiepheskama aphapavok anak kakpota nkovatak mokhom ketlhengkap malha alena nema akiaqhapeskama metka apiepheskama, ka akto nak alena nema akiaqhapeskama metka apiepheskama nentoiangko na mota neksa aktakmelaikama lhma enganko’ok Pascua. Nkanek Cristo apto malha nepkesek apketkok ankok Pascua, apmatnama lhta hengiaqmoiekha ennengko’o. 8 Hai, ntasek antangkok aktakmelaikama lhma la Pascua akieplomo panes metka apkeliepheskama, apkelvesai’a nak iokhalhmek anke, have niapak nahan. Menmama nkek alena apiepheskama aphapavok anak, apkelvesai’a koka m’a apnaqtevaskama mota po’ok, ngkolatsekama nhan.

9 Ka asnaktalheskeskamo nak mo’ok alhta vakkahak, askeleltennaske lhta melpasmekhek apkellelto nak apkellanaktema ham. 10 Have lhtoka asketlheianma m’a melioho nak mokhom Eniapom Neten, apkellelto nak ma’a apkenmasmo qaselha apankok, apkenmenielhma, apkeltakneskasekamok qaselha akiokha alanemmalhka, have lhta alheianma m’a melpasmekhek ma’a nkanek ntemengkek lhamakho eiempek akvetammalhka m’a aktonak ma’a meliamolhma m’a. 11 Lhtoka niekhe asketlhenak ma’a melpasmekhek apkellelto nak apketlhenammakpo apankavek aptaikamok Jesucristo apkennemolhema meliamolhma nak, apkellanaktema, apkenmasmo qaselha apankok, apkeltakneskasekamok qaselha akiokha alanemmalhka, nema aliematkeskama, anmen ato’ok, apkenmenielhma, ka enenlhet’avok anak ma’a melpasem ankek aptekamok ketlhengkap. 12 – 13 Mankoietok ko’o atlhenek aktaqmanma aptaiangkolha nlho ka la ngkolatsekama enenlhet’avok anak metnangko nak Jesucristo apkennemolhema, Eniapom Neten hato ka etlhenek ma’a. Koka apvanka’ak ketlhengkap etlhenek altaqmanma aptaiangkolha nlho ka la ngkolatsekama Jesucristo apkennemolhema lhemek ham apieseksek anak, ka ngkanek ntasek elentepkesek enenlhet ngkolatsekama nak aptemakha.