1Cor 7 | TmfSC | STEP | Kolhva smak’ak angvatemmoma lhema vakkahak alhta henaktalheskeskama ketlhengkap. Nlhenke niekhe evalhok ko’o ntasek menmangvomek ngkelvana’ak.

‏ 1 Corinthians 7

Apkellanemmakpelha etnangkok nema apnaqteiangka’a

1 Kolhva smak’ak angvatemmoma lhema vakkahak alhta henaktalheskeskama ketlhengkap. Nlhenke niekhe evalhok ko’o ntasek menmangvomek ngkelvana’ak. 2 Koka metko la apnaqteiangka’a nkovak hata apkenmahai’a enmenso’ok ma’a, ka ngkanek ntasek eteniangkok apnaqteiangka’a kakpota nhan anakteiangka’a, 3 nkolieplavkesek na aktemakha nak hengeliemhapma. 4 Akiokha nak ngkelvana akto apankok atava, have ankok ma’a. Apiokha nak apkenno akto ankok ma’a aptava, have apankok ma’a apiokha nak. 5 Ka ngkanek mangkolatsema nkoihengekhak nkolpathetalhkak ma’a, koka ntasek ma’a mankolpathetalhkek akiakvatakho kakpota nkolpaqmetkese mota Eniapom Neten, koka netamen ma’a ntasek nkolpathetalhkak lhemek mokhom kakpota mankovhek akiepkonma Satanas aniem’o mankolpathetammalhka atava. 6 Ka askennaveskama lhkek ehenkok ehenke, have henganemakha astakha lhkek askellano. 7 Askeltavek niekhe elieplavkesek astemakha nak ko’o ^{▼▼Malha niekhe metka aptava la Pablo.}, moklhem’a koka nietnak mok aktemakha apkenmopvanka’a apkelanei’o qaselha aniem’o Eniapom Neten.

Apkellanemmakpelha etnangkok aktaqmelo

8 Ka stak ko askellano metka apnaqteiangka’a nak kakpota nhan lhentampak’ak nkelvana’ak anak ham, ntasek meteniankek apnaqteiangka’a, ka stonak ko’o. 9 Koka mankollapvanko la elvaskapok ntasek eteniangkok apnaqteiangka’a kakpota mankotselhnanek apkenmokhetma.

10 Aptangko nak nema apnaqteiangka’a askeltavek aleltennaksek henke’e. ¡Moieniavankek atava’ ngkelvana! Ka henganemakha nak astakha nak apankok koka m’a Apveske, have henganemakha ehenkok ko’o. 11 Koka akieniavo la atava’, ntasek nkoloka nkek metka akmekha po’ok atava’, koka nhan ntasek nkomekhok mokhom atava lhta. Kakpota nhan apkenno mankapvankek eieniok aptava.

12 Kolhva askeltavek aleltennasangkok ania’a ehenkok ehenke’, have aniem’o Apveske, lhema enialheng la’a aptava koka akiaskeiam, akleio la av’alhok nkoipetkama mota m’a, ntasek meienievek ma’a. 13 Lhema enialheng la ngkelvana, atava koka apto apiaskeiam, akleio la apvalhok eipetkama m’a, ntasek mankoienievek ma’a. 14 Ngkanek atava apto nhan apokkenammap aniem’o aiekho aptava nkoi’askeiam. Nlho ka la nhan ngkelvana akiaskeiam, akpokkenammalhka nhan ma’a aniem’o apkaiekho atava’ mei’askeiam, kanhan atkak ma’a apkelpokkenammap aniem’o allaiekho ngkana’ak. Mang hata nke nkotnak ma’a, etnangkok hata atkak malha apkelpaiseiakmo ^{▼▼Apkeltemakha mota judios aliemhapma nak atava apto apiaskeiam, kanhan aptava akiaskeiam, ngkolvetak atkak malha apkelpaiseiakmo napaqtek Eniapom Neten ma’a.}.

15 Ka aliemhapma la ngkelvana nkoi’askeiam, atava koka apiaskeiam. Netamen apmak’o la eieniok aptava m’a, apvankek ma’a kakpota mmaskek akno apmangka m’a ngkelvana enialheng ngkanek Eniapom Neten apkeltave nkoloka metka akmaska. 16 Nkanek mankoihek ngkelvana nkovongkesek hatelha tep atava’ nlho ka la mma’. Apkenno nhan meihek na evongkesek tep aptava nlho ka la mma’.

17 – 18 Asmak’ak alhenek mokhom, apkellavema lhta Eniapom Neten ketlhengkap neksa metka nema aliaqtemenkeskama nekhatko’ok apkellammelhakha, ntasek na kolhvave nak meteniankek ma’a. Apkellavema lhta nhan Eniapom Neten neksa aknaikamo nak aliaqtemenammalhka nekhatko’ok apkellammelhakha ketlhengkap, melposamonkoie aknangko la aliaqtemenammalhka nekhatko’ok apkellammelhakha. Ka henganemakha askellaikamok ketlhengkap hengke’e, kanhan askellaikamok aplhamakho iglesias asmaiangkolha lhta mota, ntasek mokhom elieplavkesek aptaiangkolha apankave lhta neksa apkellavekama Eniapom Neten. 19 Nkanek ma’a have akto neten ankek akiaspommalhka m’a aptangko la nema aliaqtemenkeskama nekhatko’ok apkellammelhakha, nlho ka la mma’, koka m’a akto neten ankek akiaspommalhka eleliehekhok henganemakha apankok Eniapom Neten. 20 Hai, ntasek elieplavkesek aptaiangkolha apankave lhta neksa apkellavekama Eniapom Neten. 21 Nema asennaikama lhta niekhe nema apianmoma lheiap, ntase mankotnama apvalhok, koka akvo’o la aknem akietemo nema aktemeskasekha metka mokhom nema asennaikama nema apianmoma, ntasek etnek ma’a. 22 Ngkanek apkavema lhta Eniapom Neten kakpota mei’askamek apvesai’a m’a, aptemeskesakhek metka nema asennaikama nema apianmoma kakpota eniasennama Apveske. Koka apto la apkavekama Eniapom Neten neksa metnema niekhe nema asennaikama nema apianmoma, kolhva koka m’a aptakhek apkasennaikama nema apianmoma apankok Cristo. 23 Apkenme lhta nema akianmoma Eniapom Neten ketlhengkap, mellanko nke ngkolhek altemeskeso nema allasennaikama nema apkelianmoma ketlhengkap. 24 Ka stak mokhom askellano ketlhengkap elialheng’a, ntasek elieplavkesek mokhom aptaiangkolha apankave lhta neksa apkellavekama Eniapom Neten.

25 Manheiangkok henganemakha apankok Eniapom Neten ngkelvana’ak metka nak anakteiangka, koka evankek aleltennasangkok ehenkok ehenke, ntasek hellailhoho nkanek asiamolhma ko’o aniem’o apietnai’o neha’at Eniapom Neten. 26 Malha nak ntasek nkolloka nkek metka akteniaikamok anakteiangka’ak ngkelvana’ak, ngkanek nientelhe mota nenganiemhaikama nenvanlha nak. 27 Lhema apkenno akno la aptava, meieniekha nkoie’, koka metko la aptava, ntasek meteniek aptava. 28 Koka aliemhapengko la’a, have nhan ngkolatsekama m’a. Lhema ngkelvana metka atava’ la’a, nkoteniama atava’, have nhan ngkolatsekama m’a. Koka lhamakho aliemhapekamok anak nkolvetak hata akiavai’a akientalhnema aliaihekama aniem’o aliaspongkomakha av‘alho’ok anmaikama, moltok niekhe nkollengankok akientalhnema m’a. Ka ngkanek asto nak askellano askellanemakha etnangkok.

29 Ketlhengkap elialheng’a, ka asto lhkek askellano ngkanek ketse nkaimelhka akvaianlha aknem annelha lhmankek ham. Kolhva asmak’ak mokhom aleltennasangkok nema nak apnaqteiangka’a, melienlhanmamok apkellanei’o qaselha anko’ok aktemakha nak nema entava’. 30 Nema nak na anmaiosak’a apvalho’ok, melvenakteso nkek apkelienlhanmekamok ma’a. Apkellelto nak apkelpasengvaiam aktakmelaikama lhma, melvenakteso nkek apkelvanengvaiam ma’a. Apkelelto nak ngkeskama apkenmaikamok qaselha apanko’ok, melvenakteso nkek apkellanei’o qaselha apanko’ok anak. 31 Apkellelto nak alpaiesaikama apvalho’ok aniem’o ngkeskama qaselha apanko’ok, mankoltaqmelkaskesama nkek apvalho’ok ma’a ngkanek ngkovomok hata akmaskengvaianlha m’a lhamakho nak. 32 Ka askeleltennaso lhkek kakpota mankomaskeskame aptemakha apkellanemakha etnangkok Eniapom Neten. Ka kto nak heng, enenlhet la metka aptava apvankek emakmesama metka aktaikama apvalhok kakpota nkolekkasama apvalhok Apveske. 33 Koka enenlhet aknema nak aptava nietavek elanhok apnemakha apanke kakpota nhan nkolekkasama av’alhok aptava m’a. 34 Malha hanet koka ntemeskasak ma’a aklhenaikama apvalhok aniem’o apmakmeiangkolha la m’a.

Nnavek na ngkelvana nak lhentampe kanhan metka atava nak, avanka’ak nkolpokkenkesek aiempeiok kanhan al·hangok kakpota nkonmakmesama Apveske, koka aknema nak atava’ ntasek nkolanho mota anmakmekama akhaiangkolha ankave’, nkolienlhanmangkok alleltemo nkollekkasama apvalho’ok anakteiangka’a.

35 Apkellanengkek kelha ketlhengkap atnemak ngkeskama askellaskama henganemakha, vanlha koka niekhe askeleltennasengko nak askeltemo nkoltaqmalvomok apkellangiemhaikama ketlhengkap, ellasennama Eniapom Neten metka nema aliasekamo lhma.

36 Apno la enenlhet aknema apmahai’akha la ngkelvana atkok, ngkolhenek apvalhok ngvakmek aknem aliemhapma, ntasek ngkoliemhapok ma’a, have ngkolatsekama m’a. 37 Koka apno la nhan enenlhet metka apmahai’akha ngkelvana atkok, mankonmahai’a nhan eteniak aptava apvalhok apanke, ntasek na m’a. 38 Apto la apmahai’a etenia aptava, ntasek na m’a, koka tep ankek na aktaqmanma enenlhet metka aptava nak.

39 Ngkelvana apnema nak atava’, aliepetkammalhko m’a akvakmo apketsepo atava’, netamen ma’a ntakhek metka nema akmaikamok, avanke na nkoteniekhak po’ok atava’ apketsepo la’a, koka ntasek na nkoteniama atava’ apto la mei’askeiam. 40 Koka skanek ko’o tep ankek hata ngkotnek akpaihekha av’alho mota mankoteniekhek atava lhentampe la’a. Evankek ko’o alhenek ehenkok ehenke nkanek apietnek na Espíritu apankok Eniapom Neten evalhok ko’o.