1Cor 8 | TmfSC | STEP | Kolhva smak’ak aleltennaksek aktemakha apkennapekamo mota apnaqtoskama apkellaikamok anak qaselha akiokha alanemmalhka, apkelammakpe mota ketlhengkap apketlheianmo m’a apkellanemo eliohok ma’a. Koka nenianveiakmo nak nkeltemeskeskangkek aliephesekama apkenmahai’a elakpoho, koka nengasekhai’o nak nkeltaqmelkeskeskangkek apkellaniemhaikama.

‏ 1 Corinthians 8

Aktemakha aptekamok apetek apkellaikamok qaselha akiokha alanemmalhka

1 Kolhva smak’ak aleltennaksek aktemakha apkennapekamo mota apnaqtoskama apkellaikamok anak qaselha akiokha alanemmalhka, apkelammakpe mota ketlhengkap apketlheianmo m’a apkellanemo eliohok ma’a. Koka nenianveiakmo nak nkeltemeskeskangkek aliephesekama apkenmahai’a elakpoho, koka nengasekhai’o nak nkeltaqmelkeskeskangkek apkellaniemhaikama. 2 Niekhe lhema enenlhet la aklhenammalhko nkek apvalhok nema apiangveiakmo ngkeskama, koka atketsek apiangveiakmo m’a, nkaimelhkek mokhom. 3 Enenlhet apto la apkasekhai’o Eniapom Neten, apiekpelkekma Eniapom Neten ma’a.

4 Ka aktemakha nak meleltammakpelha nak nlho ka la nhan ntase etavangkok apnaqtoskama apkennapekamok apkellaikamok anak qaselha akiokha alanemmalhka, neliavek ennengko’o qaselha akiokha nak mamma aniemhaikama m’a, mankolhenek nahan. Vanlha koka lhema aphapak apto Apveske, Eniapom Neten apvesai’a m’a. 5 Nnaiangkek qaselha neten anak kakpota nhan nalhepop anak, moklhem’a enenlhet koka apkeleltangke mota dioses apanko’ok kanhan apkelveskai’e apanko’ok. 6 Koka neliavek ennengko’o vanlha lhema aphapak Eniapom Neten, apto nhan apkelentepkeskama lhamakho qaselha alhma nkek ham, nelloka nhan ennengko’o aniem’o apmopvana m’a. Neliavek na apnek lhema Apveske engankok apvesai’a Jesucristo, apto apmaikama Eniapom Neten apkellanei’o lhamakho qaselha alhma nkek ham, ennengko’o nhan, 7 koka moklhem’a enenlhet meliamok ma’a.

Lhennenga lhta moklhem’a ketlhengkap apkennapeiangke lhta mota apnaqtoskama apkellaiangko qaselha akiokha apkellanekamok. Ka ngkanek kolhvave nak aptavengko la apetek apkellaikamo nak ma’a, ngvaktaniek atlhenaikama mota apvalho’ok allaiekho m’a apetek anak, aniem’o koka nkoliennaktema atlhenaikama apvalho’ok. 8 Ennengko’o koka neliavek hengenmo la takha Eniapom Neten have aniem’o m’a anto’ok moklhem’a nak nentoma nlho ka la nhan manganemmalhkelha nak anto’ok nentoma. Ntasek etvok nlho ka la mma’ nentema nak. 9 Koka ellaho ta m’a aptavengko ta napaqtavek nkoliennaktema nak meliaskeiam ngkanek epalesemmak ma’a. 10 Apiavek lheiap qaselha nak, koka apkakhangkek engelialheng’a melioho mokhom aniem’o mankoliennaktema meliaskeiam.

Asietkeskama ko, apno la lheiap aptavekha konne pa’at qaselha akiokha alanemmalhka ankok, evak na lhema enialheng nkoiennaktema nak mei’askeiam, etengvak aptavakhelha lheiap ma’a, nkolhenek kelha apvalhok ntasek na etvok apnaqtoskama apetek apkaqhema apkaikamok qaselha akiokha alanemmalhka, etvok hata nhan ma’a, koka nkoietnangko ta apaqtek neksa aptavekha m’a mangkolatsema anto’ok hengke’e. 11 Nkotvaksek hata m’a aniem’o apiangveiakmo nak lheiap ma’a. Mangkolatsema nkek ma’a ngkanek apkamelaiam Cristo enenlhet anak.

12 Ka apnaqtevaskeso la lheiap apvalho’ok engelialheng’a mankoliennaktema nak meliaskeiam, malha niekhe nhan aptevaskek na lheiap Cristo. 13 Ka astengkeso la enialheng aniem’o astoma apetek monganemmalhkelha nak anto’ok napaqtek ma’a, ntasek na motvek ma’a kakpota motengkesek enialheng.