‏ 1 Peter 2

Eniapom Neten apkennemolhema apkelieniekha ngkollatsekama

1Elvatesamok hata lhamakho aktemakha ngkollatsekama nak, neniennenkeskama, hanet engvalho’ok, neniasepkeskama emmo’ok apanko’ok kakpota nhan nentepkesaikama apvesai’a emmo’ok. 2Malha aptonak nematka nak kolhva apteiam la’a niaksek emahak neme, melles hata nhan enmahangkok ketlhengkap malha aptekamok aktaqmanma nke allaikamok la aliennaktema apvalho’ok kakpota nkovanamok meliaskeiam, ngkolhek na alvongkaso tep ma’a 3aniem’o apkeliavek ketlhengkap apiamolhma Apveske.

4Elteteskakho ta Apveske apto malha metaimong akietnema aktema alhnankok. Apkeltakheskamo lhta enenlhet, koka apkeliekieskakhe lhta m’a Eniapom Neten metaimog anak ngkanek akto lhta niekhe neten ankek akiaspommalhka m’a. 5Ketlhengkap na malha apkellelto metaimong aliennaktema kakpota enmama Eniapom Neten elanak na lhema pa’at akiavai’a nemakha’ la alletsevaskesaiangkolha apvesai’a m’a aniem’o nhan apvalho’ok ma’a. Ketlhengkap na apkellelto sacerdotes apkelpokkenammap kakpota ellangkok malha qaselha nengaikamok anak aniem’o apvalho’ok anak, akleklemelha la apvalhok Eniapom Neten, apvanka’ak etnangkok ketlhengkap ma’a aniem’o m’a Jesucristo.

6Ka aktemo nak aktalhesammalhka vakkahak Eniapom Neten apaivoma hengke’e:

«Aspekkenkek lhema metaimong akto neten ankek aktaqmanma, nema aliekieskama nhan, akmennave nkek nahan. Apto la nhan mei’askeiam ma’a mankomankaksek hata m’a ▼

▼Isaias 28:16

».

7Ka metaimong anak akto akmennave nkek napaqtavek ketlhengkap meliaskeiakmo nak, koka apkeliaskeiakmo nak ma’a ngkotnek hata apkelvetai’a aktemo nak aktalhesammalhka vakkahak Eniapom Neten apaivoma m’a, ka ntemak heng:

«Ka metaimong alhta apkeltakheskamo apkellanekamok pa’at, ntakhek mokhom nema akmaikama aniem’o neten ankek aktaqmanma anmama m’a, 8ka metaimong anak akmovana ta nkolpelapongkesek ma’a».

Hai’, meleliahakho la ania’a aplhenammap Jesucristo ngkotnek hata malha alpelapongkeskama m’a, nietave ngkotnek ma’a.

9Ketlhengkap koka apkeliekiesaiangkek Eniapom Neten kakpota etnangkok apkennemolhema, apkellelto nhan sacerdotes apkellasennaikama apiav’akha apveske, apkellelto nhan lhema apkavakha apkelpokkenammap aniem’o apkenmama apianmongkeskama Eniapom Neten, apkeleltemo nhan eleltennasangkok lhamakho qaselha hempelapkeskama apkelanai’a m’a, aplaqlosengvekho m’a ienaqtesakha lhma ketlhengkap, aplaqlekho m’a akieto malha apommatmakha atsaskamo nke lhma 10Lhennenga lhta ketlhengkap have lhta apkennemolhema Eniapom Neten, koka kolhvave nak aptangkek apkennemolhema m’a, ma lhta nhan elietnai’ok napaqta’a ketlhengkap ma’a, kolhva koka apkelietnai’avek napaqta’a ketlhengkap ma’a.

Nentaqmelkasemmalhko

11Ketlhengkap elialheng’a askellamelaiam, have apkellavakha hengke’e lhmankek ham, malha akiakvatakho la apsavhekho apkellangiemhaikama ka ngkanek angvapiosalhkok allanhok askeltemo enmankok aliaspongkomakha nak apvalho’ok, nnaqtevaskaskek songkek apvalho’ok ma’a. 12Eltaqmelkasakpo ta neksa apkellaniemhangka nlho mokhom hengke’e apieseksek enenlhet’avok anak apkeliaskeiam Eniapom Neten, eliematkesama ta ketlhengkap ma’a eleltangkok meliamolhma, koka netamen ma’a elvetangvomok hata apkellanekamok qaselha altaqmelo ketlhengkap ma’a, eliavenkaskesama ta apvesai’a Eniapom Neten akvo’o ta aknem nemakha hengiekpelkemelha.

Aktemakha neliehekho apkelveskai’e

13Elieplavkes hata apkanemakha etnangkok Apveske aktemakha apkelleliehekho apkelveskai’e, apiav’akha apveske nak apto neten apankek ma’a 14kakpota nhan gobernadores apto apkapasammap kakpota eliaqmongkaskesekhak apkellanekamok la ngkollatsekama apkeltemakha, kakpota etlhenama nhan ma’a apkeliamolhma apkellelto la apkellanekamok qaselha altaqmelo. 15Apkeltavek Eniapom Neten ketlhengkap ellanangkok qaselha altaqmelo kakpota meliematkesama enenlhet’avok anak meliangveiakmo mokhom kanhan metka apqatko’ok anak. 16Ketlhengkap mmaskek nema allasennaikama nema apkelianmoma, kolhva koka apvanka’ak apkenmak’akha la ellanangkok qaselhaha, ¡koka ellaho ta m’a, mellanamo nkek ngkollatsekama ngkanek ketlhengkap apkellelto Eniapom Neten apkellasennaikama! 17Eltaqmelkaso ta apkellanei’o po’ok, ellasekhakpo nhan apieseksek la apkelialheng’a, ellaho ta nhan Eniapom Neten, kanhan apiav’akha apveske la’a.

Nenganemmalhkelha antangkok nema hengellasennaikama la’a

18Ketlhengkap apkellelto nak nema anmakmesaikama, eleliehekho, ellaho ta nhan apkelveskaie apanko’ok apkelioho la lhma kanhan apkasekhai’o la’a, eleliehekhok na melioho la lhma. 19Niekhe ngkollatsekama apkellanei’o m’a nkotaqmanma nhan aptangkolha apkellanei’o apkelveskai’e apanko’ok neksa niekhe la nhan aktaqmanma apkenmakmesaikama m’a, ¡elvaskap hato ka ketlhengkap ma’a! Ngkanek nlekkasema apvalhok Eniapom Neten ma’a. 20Koka apkelvaskapo la ketlhengkap neksa nema altekpoikama aniem’o ngkollatsekama apkellanekamok qaselha, koka metlhevangkek akianmoma m’a, akhemo nhan apkelvaskapma m’a. Koka apkelvaskapo la neksa akientalhnema niehe nhan neksa aktaqmanma apkellanekamok qaselha, nkolekkasama ta apvalhok Eniapom Neten ma’a. 21Neksa apkellavekama lhta Eniapom Neten ketlhengkap apiamave lhtoka nhan elvetak hata akientalhnema aniem’o aknaikamok apkelleliehekho ma’a, ka aptemo lhta nhan Cristo aplengaiangko aniem’o apkelpasmoma ketlhengkap, apkeleltemo lhta nhan ketlhengkap elvanangkok ma’a aptemakha. 22Mamma lhta aptemengveiakmo lhma Cristo, mamma nhan apiennengkeskama la po’ok. 23Ma lhta nhan eiaqmongkasekhak nema akiamenaikama la’a, ma lhta nhan epokkenaikama po’ok la’a neksa aptevaskama, vanlha lhtoka apkenmalhneiangka Eniapom Neten apkeltemo eiekpelkok ma’a ngkanek apto apeivomo m’a. 24Apatmekhe lhta nhan ngkollatsekama nellanekamok akieplomo apiepetkasemmap neten iamet aktenneskama kakpota angelvatesangkok nellanekamok ngkollatsekama, netamen ma’a envanka’ak angellanangkok qaselha akpeivomo. Hengeltemeskasekho lhta nhan enhalhnanko’ok aniem’o lhta apiensema Cristo. 25Apkellomaka lhta ketlhengkap malha nepkesek apketlheneiam la’a, kolhva koka apkelelpengkammakpek akieto m’a apnakha apkelanekama nepkesek apto aptaqmelkeskama m’a.