1Ti 1 | TmfSC | STEP | Ko’o Pablo asto heiapaskama Cristo Jesús apto niapom al·halhnekama engvalho’ok angvetak aktaqmanma. Hellapaskama koka m’a Eniapom Neten apto hengelvongkeskamo tep kanhan Cristo Jesús kakpota apaiaksek ania’a aktaqmanma.

‏ 1 Timothy 1

Pablo aklheianma apvalhok Timoteo

1 Ko’o Pablo asto heiapaskama Cristo Jesús apto niapom al·halhnekama engvalho’ok angvetak aktaqmanma. Hellapaskama koka m’a Eniapom Neten apto hengelvongkeskamo tep kanhan Cristo Jesús kakpota apaiaksek ania’a aktaqmanma. 2 Nlhenkek ko evalhok lheiap Timoteo apto astemo lhemek moi’askeiam anak, apto nhan malha eietka. Askeltavek na Eniapom Neten kanhan Cristo Jesús Apveske engankok etaqmelkeskesek apkaniemhaikama lheiap, eietnok na napa’at, eniankok na aktaqmelaikama apvalhok lheiap ham.

Pablo apkeltemo eniahok Timoteo ngkolatsekama hengetlhekmoskama

3 Askeltavek mokhom altakhengveskakhak astakha lhta askano lheiap ma’a akieto ham Efeso neksa asmahai’a aniakha lhta m’a Macedonia, lheiap hato ka ntasek elhek kakpota ennavaksek mankolietemo nak apketlhekmosekamok, lhta stahak. 4 Ennaves hata nhan kakpota mankonmankaksek aknem aklhengama apketlheianvekho na mota lhennenga ania’a, eltaqneva ta nhan kakpota melvenaktese mota apketlhenaikama apkelieihengka’a, koka m’a qaselha nak ntepkaske mota apkeliamenammap ham, mankotepkeskamak meliaskeiam kanhan apkeliangveiakmo aktemakha apmahai’akha etnek Eniapom Neten.

5 Askeltavek na ko’o ennavaksek enenlhet’avok lheiap ham kakpota eliaqmongkasekhak mo’ok aptaiangkolha, nkovak na apkellasekhai’o po’ok aniem’o alalhnai’o apvalho’ok, altaqmanma atlhenaikama apvalho’ok kanhan meliaskeiam iokhalhme. 6 Koka moklhem’a lhta apkelvatesaiangkok ma’a apkelieplavkeskama qaselha altaqmelo lhkaiek, nkenmankaskangke lhta aknem aklhengama aniem’o apkeliamenammap nkotno qaselha altaqmanma apketlheianma, 7 apketlhenammakpek apankavek hengetlhekmoskama ley anak Moises, koka m’a eliangveiakmok aktemakha apketlheianma, apketlhekmosekamok nahan.

8 Koka nengeliavek ennengko’o ley anak akto aktaqmanma nento la nhan akietemo nkek nenmaikama, 9 have akvai’a nkoliavak nkonnaveskak apkelpeivomo nak, koka ma’a meleliehekho nak, apkeliekai’a nak ley, meliamolhma nak kanhan apkellanekamo nak qaselha ngkollatsekama, apkellelto nak mellai’o Eniapom Neten kakpota nhan hengetlhekmoskama aktemakha apvesai’a, apkellelto nak apkennapma’ apiapma’ak, ngkana’ak, apkellelto nhan ntekioma niapma’ak. 10 Apkellelto nhan apkenmensangveiam alhma, kanhan apkenmensavekha aptemo lheme’, kanhan apkelhaikamok nema akianmoma enenlhet kakpota etnangkok apkenmakmesaikama, apkenmopvanka’a ania’a nak kanha aptaikamok juramento apkenmopvanka ania’a. Hai, ka akvai’o lhta henganemakha kakpota nkonnavaksek ma’a apkellelto apkellanekamok qaselha ngkollatsekama nak, ammelhmakha nhan ma’a akto hengetlhekmoskama aktaqmanma nke nak, 11 aktaqmanma nke nak ania’a apkeltemo nak na Eniapom Neten apaiaksek ko’o, apto nhan akietemo aniavenkaskesama mota apvesai’a m’a.

Apietnai’o napa’at Eniapom Neten Pablo

12 Gracias ko’o astemak Cristo Jesús apveske engankok aklheianmo apvalhok angvapvanak hata ko’o altennama ania’a aktaqmanma, heiaiangko nhan asiennaktema m’a. 13 Niekhe lhennenga astaqnongkongke lhta apvesai’a m’a, asmenlhenaiangka lhta, askeltaknongkomo lhta nhan apkellelto apkellasennaikama apankok ma’a. Koka apiose lhta helanei’o Eniapom Neten ngkanek ma lhta nkoietnemak moi’askeiam anak, ma lhta nhan aihamok nkoietemo astemakha m’a. 14 Nkaqhok koka avanhe kanke lhta aktaqmanma helanei’o Apveske engankok, heiaiangko lhta nhan moi’askeiam, nengasekhai’o aniem’o m’a Cristo Jesús.

15 Kolhva smak’ak alhenek nkelietavek enmangkok takha aspaioma meliaskamek na aplhamakho ketlhengkap, apvai’o lhta Cristo Jesús nalhepop anak kakpota elvongkesek tep enenlhet’avok meleliehekho apkellaskamakha Eniapom Neten, ko’o nhan asto m’a neten ehenkek moliehekho, molhnok aplhamakho enenlhet’avok. 16 Koka apietnai’ave lhta neha’at Eniapom Neten, apkapaskamo lhta Jesucristo kakpota elvetaskesek enenlhet’avok apiamolhma apanko ie helanei’o, metka hepekheskama kakpota eiaqmongkasekhak astemakha. Hata nha ngkotnek apkellanei’o aplhamakho enenlhet’avok apkellelto la meliaskeiam kakpota etlhevangkok aliennaktema apnenio’ok ma’a mangkotnengvaiam annelha. 17 ¡Ntasek angeltakneskasangkok, angellaho mota metka akvaiam annelha aliekaikamok iantelhkapa Eniapom Neten apto Apveske mangkotnengvaiam annelha, menietsepma nhan, mammopvana nhan angveta’, vanlha nhan lhema aphapak Eniapom Neten! Amen.

18 Timoteo, malha eietka lheiap, ka askaikamok lhek aspaioma kakpota elanak lheiap ma’a aktemakha apketlheianmo lhta sekhek ankek ngkotnek hata apketsekama ania’a, kakpota ellammelhek lheiap ma’a apkellelto nak apkellammelhmakha mongiaskeiam. 19 Melvateskama nkek mei’askeiam, etaqmelkes hata nhan akietnaikama apaqtek alhnai’o nhan, melvanamo nkek aptaiangkolha nak ma’a enenlhet’avok meltaqmelkeskama nak alietnaikama apaqto’ok, netamen maskengvakmek na meliaskeiam ma’a. 20 Ka aktonak ma’a apieseksek anak Himeneo kakpota nhan Alejandro, askangkongvakme lhta m’a Satanas kakpota melammelhek mokhom Eniapom Neten apvesai’a.