1Ti 6 | TmfSC | STEP | Ketlhengkap elialheng’a apkellelto nak nema allasennaikama nema apkelianmoma, ntasek ellaho mota apveske apanko’ok kakpota menaqtevaksek enenlhet apvesai’a Eniapom Neten ma’a kanhan hengetlhekmoskama nak ennengko’o.

‏ 1 Timothy 6

1 Ketlhengkap elialheng’a apkellelto nak nema allasennaikama nema apkelianmoma, ntasek ellaho mota apveske apanko’ok kakpota menaqtevaksek enenlhet apvesai’a Eniapom Neten ma’a kanhan hengetlhekmoskama nak ennengko’o. 2 Moklhem’a koka apkakhangkek apkelveskai’e apanko’ok apkellelto Jesucristo apkennemolhema m’a, motlhenankek na apvalho’ok apkenmakmesangka la’a ntasek meteniankek apiempeiok ngkanek malha apkelialheng’a apankavek. ¡Ma’! Ntasek eteniangkok apiempeiok neksa apkenmakmesaikama m’a aniem’o aknemo mo’ok meliaskeiam ketlhengkap ma’a, malha apkelto nak apkelialheng’a apankavek apkellamelammakpo la’a.

Askeltavek ko’o etnek lheiap apketlhekmoso ta hengke’e, 3 apto la lhema enenlhet apsoiam mok aktema hengetlhekmoskama mankolhnemo m’a hengetlhekmoskama apveske engankok Jesucristo, ammelhma m’a hengetlhekmoskama enganko’ok anak aktemakha mongiaskeiam anak, 4 koka apto m’a apkammakpo enenlhet anak, meihangveiakmo nhan, vanlha aptenia mota apkeliamenammap po’ok, netamen ma’a alvo’o neniasepkeskama, nennapommalhka, nentaknongkoma emmo’ok, mantemeskeskama iokhalhmek emmo’ok, 5 apkeliamenammap anak apieseksek enenlhet’avok anak malha alieihama lhma, meliohok akto have niapak ankek, apketlhenakpave apankek nahan apkellelto meliaskeiam koka apteniangke mota apkennaksepma patakkom apanko’ok apankavek 6 Koka akto have niapak ankek akiavai’a nkek altakmelkeskama nellaniemhaikama nentangko la m’a neliamolhma Jesucristo apkennemolhema, nentangko la nhan vanlha alpaihekha engelvalho’ok aknangko la qaselha nkeskama, nlho ka la nhan ketsek la’a, 7 ngkanek nempalleianlha lhta sekhe lhta mangetsoiakmo qaselha enganko’ok, ka nhan neletsepo la’a mongeletsakhek qaselha enganko’ok. 8 Ka ngkanek ntasek nkolpaihekhak engelvalho’ok aknangko la nentekamok, nentalhnema nenvanlha nak. 9 Koka apkellelto la aptengiaikamo mota nkeskama patakkom apanko’ok, nkovak na aklheianma apvalho’ok eltok eniankesangkok qaselha apanko’ok la’a, koka nkovak na aktevasekha nkek ma’a, malha ta nhan ngkotnek anmama al·hanemmalhka m’a nkonnaqtevaksek hata nhan aplhamakho akvakmo apsavhekpo m’a. 10 Hai’, lhamakho qaselha ngkolatsekama aniem’o m’a nkeskama nenteniai’a patakkom, aplhaniek na apkelieniekha aptaikamo lhta meliaskeiam, apketselhnanemmakpo nhan akiavai’a nkek ma’a.

Pablo apkeskama Timoteo elanak mo’ok qaselha nkoietemo

11 Koka lheiap apto Eniapom Neten apkasennaikama, enieniamo ta kakpota mankomama m’a qaselha ngkolatsekama nak, elana toka akpeivomo, qaselha aktaqmelo, koietna mei’askeiam, nengasekhai’o emmo’ok, eliephekho ta apvaskapma neksa aplengaiangko akientalhnema, etne ta nhan nalhepek anko ie napaqtavek enenlhet’avok. 12 Ka apvanko koka ennapakpok aniem’o apkenmasmo mei’askeiam anak, meniangko nhan ngkolhek aklekkaso akiennaktema apneniek mangkotnengvaiam annelha, ngkanek lheiap apto apkeliekieskama Eniapom Neten, apkelvetaskaskek na napaqtavek enenlhet’avok akietnema mei’askeiam lheiap. 13 Koka kolhvave nak napaqtek Eniapom Neten apto apkellaikamok aliennaktema lhamakho qaselha lhmankek ham, kanhan napaqtek Jesucristo apto apvetaskeskamo lhta napaqtek Pilato metka apkelanai’a ngkolatsekama, apvetaskeskaiakmo lhta nhan aktaqmelo hengetlhekmoskama aktemakha mongiaskeiam anak, 14 askeltavek eliehekhok lheiap astakha lhkek askanakha etnek, etaqmelkasakpo ta nhan, etne ta nhan aktaqmanma kakpota melhenakpek meihamolhma lheiap akvakmo apvaktamo ta apveske engankok Jesucristo, 15 evatak hata akietemo nkek aknem aplheianmakha la Eniapom Neten apto aptaqmanma panke, ngkanek vanlha lhema aphapak apveske akietnema apmopvana lhamakho takhaplhet’ok enenlhet’avok lhmankek ham, apto Apiav’akha Apveske neten apankek melhnok po’ok apiav’akha apveske, Apveske neten apankek melhnok po’ok apveske la’a. 16 Apto nhan lhema aphapak menietsepma, apto apkaniemhaikama nhan aiseksek atsak’elha lhma, mamma nhan nkoteteskamok ma’a, mamma nhan enenlhet apto apvetai’a m’a ngkanek na mongapvankek angellanhok ma’a. Apto nhan vanlha lhema aphapak akietnema apmopvana m’a, ntasek angellaho mota m’a metka nnelha. Amen.

17 Elelto ta nhan lheiap menianek ellakpok apkellelto nak nema apkelletsekama nenvanlha nak, mellanek na nkolhnangkok alel·halhnekama apvalho’ok aniem’o nkeskama apkelletsekama ngkanek nkomaskengvomok hata m’a. Koka ntasek ma’a nkolhnangkok alel·halhnekama apvalho’ok aniem’o Eniapom Neten, hengellaiangko nhan nkeskama qaselha aimommalhkelha la m’a kakpota nkoltaqmelek nellaniemhaikama m’a. 18 Elelto nhan ellanangkok qaselha altaqmelo m’a, nkeskama nhan qaselha altaqmelo, ellamok hata nhan po’ok qaselha metka apkenmasma. 19 Netamen ma’a ngkotnek hata malha apkankesaikamok nema nhan apketsekama m’a neten, etlhevangkok hata nhan aliennaktema apnenio’ok mankotnengvaianlha nnelha.

Pablo apkaskama qaselha Timoteo, kanhan aktakha nnelha apaivoma

20 Lheiap Timoteo, etaqmelkes hata nema aikamok anak apmakmekama, mepasengvoma nkek na ngkolatsekama la apkelpakmetkesammap, meniailhengvomho nhan mankoietemo nak apketlhekmosekamok apkeleltaiangko nak akvesai’a Nenianveiakmo akto Have niapak ankek ma’a, 21 moklhem’a apkelieniakhek aptaikamok meliaskeiam aniem’o apkelieplekha m’a apketlhekmosekamok anak ma’a.

Askeltavek koka Apveske eltaqmelkeskesek apkellaniemhaikama aplhamakho ham.