2Cor 12 | TmfSC | STEP | Akhemo alhenalhkok ehenkok ehenkek ko’o, nkaqhok koka aleltennaksek hata aktemakha lhta akvetai’a ehaqtek qaselha akielhammalhka nhan aniem’o Apveske.

‏ 2 Corinthians 12

Nema akvetaskeskama apaqtek Pablo

1 Akhemo alhenalhkok ehenkok ehenkek ko’o, nkaqhok koka aleltennaksek hata aktemakha lhta akvetai’a ehaqtek qaselha akielhammalhka nhan aniem’o Apveske. 2 – 3 Asiekpelkemelha ko’o lhema enenlhet mei’askeiam Cristo, nemo lhna lhta akiantemekho akvakho hanetolhema av‘alho’ok neten, ngvakmek 14 anio m’a. Apiokho kelha m’a nlho ka la aphangok, Eniapom Neten apiavek ma’a. 4 Nnengkek na lhta akiantamo m’a akieto iokhalhma aktaqmanma, aplengai’o lhna lhta qaselha monlengai’akha m’a, manganemmalhka nhan anlhenek. 5 Evanke niekhe nkalhkok nkammelhok evalhok ma’a enenlhet anak, ko’o koka mankalhkek evalhok alanalhkok ehenke, koka vanlha ntasek nkolekkasama evalhok heietakho la moiennaktema. 6 Have malha anema alhko la evalhok ko’o aniem’o qaselha hempelapkeskama asvetai’a, koka mankonmahai’ak atnek ko’o anmalhko evalhok ngkanek ellengak enenlhet nkotlhenek apvalho’ok asto neten ehenkek ko’o, koka moltak ko’o nkotlhenek apvalho’ok enenlhet’avok anak. 7 Akvai’o lhta mota nhan apaskama Satanas kakpota hetvaksek ko’o, malha helielhaqlhema lhta mota ntemak ketama eiempehek kakpota mankovhek askammalhko aniem’o asvetai’a akvetai’a ehaqtek. 8 Hanetolhema astaiekho lhta askenmalhnongkoma Apveske askeltemo emaskeksek aslengaiangko, 9 koka heiatemmoma lhta Apveske, lhta aptak:

—¡Nietnek askameliam lheiap, vanlha ham! Nkanek asmopvana niennakteskek lheiap neksa meiennaktema la’a —lhta aptak Apveske heiano m’a.

Ka nkanek anmalhko mota evalhok neksa moiennaktema nkanek Cristo heiangkok apmopvana kakpota aiephongvomhok neksa akvai’a la akientalhnema. 10 Avanhek na akpaihekha evalhok neksa moiennaktema la’a, neksa aimommalhka nhan qaselhaha, nema heiaqmasekama, neksa akvai’a akientalhnema aniem’o enenlhet apkenmahai’a henaqtevaksek aniem’o nhan moi’askeiam Cristo. Neksa moiennaktema apankek la’a, malha asiennaktema pankek ntakhak ma’a.

11 Astek ko malha la anema aniem’o anmalhko evalhok ehenkok ehenke, have nhan asto neten ehenke, ketlhengkap koka nkelleniemai’ak mankollekkasekama apvalho’ok hellanhoho, ka nkeniemai’ak na nkalhkok evalhok ehenkok ehenkek aniem’o asmakmekama apieseksek anak ketlhengkap. Snavek na ko’o m’a nema allapaskamo lhta apkellelto lhta neten apankavek apkenmakmeiangka lhta nhan apieseksek anak ketlhengkap. 12 Apkeliavek ketlhengkap asto nhan nema heiapaskamo ko’o, apkelvetai’a lhta asmakmeiangka metka aspekheskama, askelanai’a lhta nhan qaselha mongenatkeskama, qaselha hempelapkeskama nhan, qaselha akiavai’a akmovana nhan apieseksek anak ketlhengkap. 13 Ma lhtoka alelmalhnekama akianmoma la asmakmekama apieseksek anak ketlhengkap ham, koka mo’ok alhta iglesias hellaiangke lhta akianmoma asmakmekama apieseksek ma’a, ketlhengkap koka manghellaiangkok. ¡Eltemeskesama ta apankavek ketlhengkap hellanei’o aniem’o lhta malha akiavai’a asnaktevaskama ketlhengkap molelmalhneiangka lhta akianmoma asmakmekama ham!

Pablo apmahai’a etnek amaika’a mokhom Corintios

14 Aspenesavek askelanekha astakha kakpota atnentak amaika’a mokhom ham, hanetolhema ta ngkotnek astema amaika’a, moleltok na ketlhengkap hellangkok qaselha astoma la ham. Momak’ak na al·hatsoskasangkok qaselha apanko’ok, vanlha koka smak’ak alpasmok ketlhengkap ham. Malha aktonak eniapom la’a apkankeskasekamo mota qaselha kakpota ellangkok apketkak, have apketkak ellankeskasangkok qaselha apiapma’ak la’a. 15 Nnavek na ko’o ntasek ankek aietepok lhamakho qaselha ehenkok anak kakpota nkoltaqmelkeskesek apkellangiemhaikama ketlhengkap, ntasek na nkovaiventak asmakmose aniem’o hellasennaikama ketlhengkap. Niekhe akvanekamok askellasekhai’o ketlhengkap, aselhtek koka nhan hellasekhai’o ketlhengkap.

16 Moklhem’a ketlhengkap apkeliavek moteniai’a lhta ko’o akianmoma asmakmekama, napokha lhna lhtoka hetlheianmak askeliennengkeskama asmahai’a apalesemma’. 17 – 18 Hetlheianmo lhna lhta nhan askapaskamo nak Tito kanhan enialheng kakpota aliennengkesek ketlhengkap ma’a. ¿Apkeliennengkeskangke nlho Tito ketlhengkap ham, he? ¡Mma’, meliennengkeskamak ma’a! Aptenkek koka malha astonak ko’o, aknemo nhan evalhok ko m’a.

19 Ketlhengkap elialheng’a askellamelaiam, nkotlhenek hatelha apvalho’ok nellasennammalhka engankoie napaqtavek ketlhengkap, mankaimelhkak antangkok ma’a ngkanek vanlha mota nenteniankok angeltakmelkeskesek apkellangiemhaikama ketlhengkap ham aniem’o nengelelto nengeliamolhma nellasennaikama Cristo, apiavek Eniapom Neten akto have niapak ankek alheianma nak. 20 Askak’ak ko’o m’a etnangkok asvaktamo ta ham ello’ok hellanhoho, ko’o telha nhan heliasangko lhma ketlhengkap asvaktamo ta ham. Askak’ak na ko alvetangvetak apkellatemommap, kno nak apkeliasepkeskama, apkelloma, atlhenammalhko nke apvalho’ok apanko’ok apankavek. Apkelentepkasekama apvesai’a po’ok aptaikamok apkenmopvanka ania’a, etlhenama apvesai’a po’ok aptakha la’a, elakpoho, lhamakho qaselha ngkolatsekama aptaiangkolha. 21 Nkak’avek enenniek na astanta mota amaika’a ham hetneskesek Eniapom Neten asmangkaktema napaqtavek ketlhengkap akvakmo ta asveno aniem’o askelvetangvekta apkellanekamok ngkollatsekama mokhom, melieniekha mokhom qaselha akpaisengkeskama nak engvalho’ok, ka aktonak lhamakho qaselha nak apkenmensangveiam alhma kanhan qaselha aknemo nak ma’a henmankaskama.