2Cor 4 | TmfSC | STEP | Eniapom Neten apto apiamolhma hengellanei’o ennengko’o, hengellaiangko nhan nenmakmekama nenlheianma ania’a aktaqmanma. Ka nkeniemai’ak mamma nhan manghengeliaqvaiam la angelpaiaksek ania’a aktaqmanma.

‏ 2 Corinthians 4

Nelpaieskama apvesai’a Jesucristo

1 Eniapom Neten apto apiamolhma hengellanei’o ennengko’o, hengellaiangko nhan nenmakmekama nenlheianma ania’a aktaqmanma. Ka nkeniemai’ak mamma nhan manghengeliaqvaiam la angelpaiaksek ania’a aktaqmanma. 2 Man na angellanengkok qaselha la nelielhaskeskamo henmankaskama nak, man na nteniangkok na neliennengkeskama la’a, mangeliaqmongkasekhak na mo’ok aktemakha ania’a aktaqmanma nak netlheianma hengellaikamo lhta nhan Eniapom Neten ma’a. Apiavek koka nhan Eniapom Neten akto netlheianma iokhalhmek, apkeliavek na enenlhet’avok ka ngkeniemai’ak manghengeliaskamek ma’a. 3 Koka ania’a aktaqmanma nak malha akposemmalhka napaqtavek enenlhet’avok apketlheneiam anak, 4 apkeliaskakmek na m’a aniem’o aveske hengke’e nalhepop anak nkeltemeskaskek malha ienaqtesa lhma apaqto’ok. Mankonmak’ak elvetak apommatema akto neten anko ie aniem’o m’a ania’a aktaqmanma nak aplhenammap Cristo apto aknema apmopvana, apnemo nhan Eniapom Neten ma’a. 5 Mangeleltennasengkok enganko’ok engankavek ennengko’o napaqtavek enenlhet la’a, neleltennaskek koka apvesai’a Jesucristo apto Apveske aniem’o nhan nengellamelaiam ma’a, ka ngkanek nentaiangko nhan malha apkellasennaikama apankok nema apkelianmoma nak ketlhengkap. 6 Aptepkeskangkek nak nanek Eniapom Neten apommatema neksa ienaqtesakha lhma, aptepkeskangkek na apommatema engelvalho’ok anak kakpota nkoltetkesek enenlhet’avok netlheno la’a ania’a aktemakha aplhenammap Cristo, netamen hata nkotlhene ta apvalho’ok Eniapom Neten apto akietnema akiavai’a apmopvana m’a.

Metka aktaikama envalhok neksa nellengaiangko akientalhnema

7 Ka ania’a aktaqmanma nak malha akto nak qaselha akmennave nke aknaiangko nak neniokha nkoliennaktema malha aktonak nialpa ngvengka, apvanka’ak elvetak enenlhet’avok akmovana m’a aniem’o Eniapom have aniem’o ennengko’o. 8 Niekhe akietnema ngkeskama akientalhnema, nietne koka nhan alel·halhnekama engelvalho’ok kakpota angenmaskeksek hata m’a, niekhe nhan akietnema altaikama engelvalho’ok, man koka hengelastengak ma’a. 9 Hengelmenlhenama nhan kakpota hennaqtevaksek ma’a, neliave koka nnengke mota hentaiangko netlhelhma’ak ma’a, niekhe malha nelpelapeiam aniem’o enenlhet hengeliengama, man koka hennaqtevaskamak ma’a. 10 – 11 Lhamakho iokhalhma nenmangkolha la’a hengelvetaskaskek akientalhnema enenlhet, ka aktemo lhta nhan Jesús apkellengaskesaiangko akientalhnema akvakmo apkellaqho, ennengko’o nhan nkaikama mota antekio’ok aniem’o nhan nelpaieskama apvesai’a Jesús, neliavek koka neniokha nak akmovana nkomaskengvomok nkolhatekhangvomok hata neksa netsepma m’a, have niapak ankek ma’a. 12 Kelha niekhe antekio’ok ma’a nenmeiakho la apieseksek anak ketlhengkap angelpaieskakhak ania’a aktaqmanma, nkaqhok koka angenmeianta kakpota etlhevangkok ketlhengkap akiennaktema enneniek mankotnengvaianlha nnelha. 13 Nellan’ak ma’a aktemakha lhnak nanek aklheianma Eniapom Neten apaivoma:

«Moi’askakmok ko’o m’a, ka nkanek alheianmo nhan ^{▼▼Salmos 116:10}», lhnak nane ntemak.

Ennengko’o nhan mongeliaskeiakmok Eniapom Neten, ka netlheianmo nak na apvesai’a m’a. 14 Neliavek na ennengko’o m’a apto aplhatekhaskeiam neksa apketsepma Jesús, hata nha ngkotnek ennengko’o m’a annaklhatekhangvomok hata m’a, ketlhengkap nahan, netamen angelvakhak hata nhan napaqtek ma’a. 15 Lhamakho nellengaiangko nak akientalhnema nelvetai’a aniem’o nelienlhanmekamok kakpota nkoltaqmelkeskesek apkellangiemhaikama ketlhengkap ham, etlhevangkok hata nhan aktaqmanma nke nak apkellanei’o Eniapom Neten. Ka aplhamengko la enenlhet ma’a, netamen elhamangkok hata nhan aptaikamok gracias Eniapom neten ma’a, nkotlheianvakhok hata nhan apvalho’ok Eniapom Neten apto akietnema akiavai’a apmopvana.

16 Niekhe akmaskema neliennaktema neliokha nak, koka mankolhnankok anmaiosak’a engvalho’ok anak, ngkanek neliavek engelvalho’ok anak nkanantangkek na lhamakho aknem aliennaktema. 17 Nkomaskengvomok hata m’a nellengaiangko akientalhnema hengke’e nalhepop anak, nnek koka hengelpeneskaso kakpota ngkoitek akiennaktema enneniek akiav’akha nkek qaselha altakmanma m’a mankotnengvaianlha nnelha. 18 Ka nkanek mangelammelhek neksa nellengaiangko akientalhnema nalhepop anak ngkanek nkomaskengvomok hata m’a, ntasek koka aniavenkasok atlhenaikama engelvalho’ok qaselha mongelvet’o mokhom, koka neliavek have niapak ankek nkovak hata m’a, mankomaskengvomek hata nhan ma’a.