‏ 2 Corinthians 8

Nema allapaskeskama patakkom iglesias

1Engelialheng’a, nenmak’ak angelleltennasama ania’a qaselha aktaqmelo lhta apkelanai’a Eniapom Neten apieseksek iglesias akieto iokhalhma Macedonia. 2Avanhe lhta apkellengaiangko niekhe m’a, koka nkakhemave lhtoka m’a nheklhe lhta alpaihekha apvalho’ok ma’a, niekhe aptaikamok metka qaselha apanko’ok, apkellankesaikokhek koka patakkom metka apkenmeiavkesammakpo apkellapaskeskamo Jesucristo apkennemolhema m’a. 3Asiavek ko’o apkellangke lhta apkelapvankelha la ellangkok ma’a nlho ka la nhan tep atketsek mokhom aniem’o apanko’ok apankavek apvalho’ok. 4Ma lhta elietnakhok ma’a hengelleltennaskaktamo mota apkenmahai’a apankavek ellangkok patakkom apkellankesekha kakpota elpasmok Eniapom Neten apkennemolhema m’a. 5Apkelpenesave lhta nhan apketlheianma kakpota ellasennama aktaqmanma nkek Apveske, kakpota nhan angellasennama ennengko’o. Aptangke lhta apkelleltemakha la etnangkok Eniapom Neten ma’a.

6Neksa aptaienta lhta amaika’a Tito ham apieseksek ketlhengkap, apkeliatekho lhna lhta nhan ellankesekhak patakkom ketlhengkap kakpota ellapaksek hata ma’a. Koka kolhvave nak neliatakhavek mokhom eniantak Tito ham kakpota elvatak patakkom na lhta apkellankesaikokhak ketlhengkap aniem’o apkelamelaiakmo po’ok. 7Avanhek ankek apkellanekamok qaselha altakmanma ketlhengkap, ka kto nak meliaskeiam, aktaqmanma apkelpaqmetekama, apkeliangveiakmo, akmases apvalho’ok neksa apkenmakmekama, hengellasekhai’o nhan ennengko’o. ¡Elienlhanmamok hata nhan eliavenkasangkok tep mokhom patakkom apkellankesekha kakpota elpasmok po’ok aniem’o apkellasekhai’o!

8Have akiennaktema ehetong askelanei’o ketlhengkap, vanlha askeltavek aliatekhoho kakpota ellangkok patakkom po’ok, aptaiangkolha lhna lhta ma’a engelialheng’a ko Macedonia, metka apkenmeiavkesammakpo lhna lhta patakkom apanko’ok ellangkok ma’a, etnamok hata nhan ketlhengkap ma’a kakpota elvetakpok have niapak ankek apkellasekhai’o po’ok. 9Apkeliavek na ketlhengkap aptemakha lhta Cristo, malha aknema apketsekama lhta m’a, koka aptemongvai’ak hengke’e metka apketsekama aniem’o apkellamelaiam ketlhengkap, kakpota eltemeskeskak na ketlhengkap malha nema apkelletsekama la’a.

10Iantelhkapa lhta ketlhengkap apkellenemo apkellankesekha patakkom akieplomo alleklemo apvalho’ok alhta m’a. Kolhva smak’ak allangkok aspaioma 11ntasek elveskamok apkellankesaikokhak patakkom akvanlha la nhan apkellapvankelha, akieplomo koka nhan alleklemo apvalho’ok. 12Ka apkellangko la patakkom akieplomo alleklemo apvalho’ok, niekhe ketsek la’a, nlho ka la nhan akiavai’a patakkom aknangkolha la’a, nkollekkasama ta nhan apvalhok Eniapom Neten ma’a.

13Mangeleltok ennengko’o etnokhak metka apkelletsekama ketlhengkap, etnokhak malha aknema apkelletsekama m’a apkellelto apketlhevai’a patakkom, nengeleltavek koka ngkotnek aknemo mo’ok. 14Nietnek kolhva ngkeskama apanko’ok qaselha ketlhengkap, apvanka’ak elpasmok metka nak apkelletsekama, etnangkokhak hatelha nhan metka apkelletsekama ketlhengkap lhema aknem la’a, hatelha nhan nkollenientak na apkelpasmoma ketlhengkap ma’a, malha apkelietkeskama ta ngkotnek ma’a.

15Ka ntemak na aktalhesammalhka vakkahak Eniapom Neten Apaivoma hengke’e:

«Apto lhta apiaqhekama ngkeskama, koka ma lhta nhan nkolaimelhkak ma’a, apto lhta nhan apiaqhekama apkanet apanke, ma lhta nhan eniaimekpok ma’a ▼

▼Exodo 16:18

».

Pablo apkapaskama Tito

16Gracias ko stemak Eniapom Neten aniem’o aptemeskeskama Tito aktaikama apvalhok apkellanei’o ketlhengkap ham ka aktemakha nak ko’o, avanhek apmahai’a elpasmok ketlhengkap ma’a. 17Askeltennaske lhta Tito ntasek eniakhak etnokhak amaika’a ham, apkasekhave lhta astakha askano aniem’o nhan apvalhok apanke apmahai’o.

18Asmak’ak angvapaksek kolhvave nak Tito ham, aplhelhma nhan lhema enialheng apto aplhenammap amota aplhamakho iglesias apiamolhma m’a, aktaqmanma apmakmekama lhnak na m’a apaieskama ania’a aktaqmanma. 19Apto lhta nhan apkeliekiesaikamok iglesias kakpota antangkok netlhelhma’ak neksa nenlhengama mota netsenta patakkom nema angkesekha kakpota angellankongvakhak engelialheng’a alaimommalhka nak qaselha apanko’ok, vanlha mota netlhengama nemmahai’a angelpasmok emmo’ok ma’a, nellak’avek na Eniapom Neten. 20Ka enialheng anak hengelpasme mota apkeltakmelkeskama patakkom kakpota mangkoitek anmasongka apvalho’ok enenlhet, melentepkasama nhan nelvesai’a ennengko’o. 21Hai, skelienlhanakmavek ko’o mota alanak akpeivomo napaqtek Apveske, napaqtavek na enenlhet’avok.

22Asmak’ak na angvapaksek po’ok enialheng eltek na apketlhelhma’ak ham, apto nhan apmahai’o mota epasmok po’ok, avanhek na apmahai’a elpasmok ketlhengkap ham, mang na lhta eliaskeiakmok aptemakha ketlhengkap ham. 23Koka aptemakha nhan Tito, alhelhma ko nhan mota m’a, nenmakmekama nempasmekha kakpota nkoltaqmelkeskesek apkellangiemhaikama ketlhengkap ham. Koka apqanet lhek engelialheng’a, apkellelto apkellapaskama iglesias, apkellai’o lhnak na Apveske m’a.

24¡Ellasekho ta apkelvaktamo ta ham! Kakpota elvetak aplhamakho apkellelto iglesias nkoietok na alammalhko engvalho’ok aniem’o ketlhengkap.