2Ti 1 | TmfSC | STEP | Ko’o Pablo asto heiapaskama apankok Cristo aniem’o apkeltema Eniapom Neten, kakpota apaiaksek ania’a aktemakha aplheianmo lhnak nanek Eniapom Neten have niapak ankek hengellangkok hata aliennaktema ennenio’ok mankotnengvaianlha nnelha aniem’o nelpasmekha Cristo Jesús,

‏ 2 Timothy 1

Pablo aklheianma mokhom apvalhok Timoteo

1 Ko’o Pablo asto heiapaskama apankok Cristo aniem’o apkeltema Eniapom Neten, kakpota apaiaksek ania’a aktemakha aplheianmo lhnak nanek Eniapom Neten have niapak ankek hengellangkok hata aliennaktema ennenio’ok mankotnengvaianlha nnelha aniem’o nelpasmekha Cristo Jesús, 2 astalheskaskek ko’o vakkahak anak lheiap Timoteo apto malha eietka askamelaiam. Askeltavek ko’o Eniapom Neten kanhan Cristo Jesús Apveske engankok etaqmelkeskesek apkaniemhaikama lheiap, eietnahok na napa’at, eniankok na aktaqmelaikama apvalhok lheiap.

Pablo aptema gracias Eniapom Neten

3 Astek ko mota gracias Eniapom Neten neksa askenmalhnongkoma aknem ankek, pelhasep nahan aklhenaikama mota nhan evalhok lheiap, askasennama nhan Eniapom Neten akieplomo alhnai’o akietnaikama ehaqtek, ka aptaiangkolha lhnak nanek na askelieihengka’ m’a. 4 Nlheianvakhek na ko evalhok lheiap aiosei’o nak apvalhok kanhan apvenemo lhta, avanhek askeltemo atekhak mokhom lheiap kakpota nkopaihekhok ankek evalhok. 5 Nlheianvakhek na evalhok iokhalhme lhta mei’askeiam lheiap, amanie lhtoka lheiap apiama’ Loida kanha ngken akvesai’a Eunice mankoliaskeiam alhta m’a, asiavek na ko’o lheiap nietnek mei’askeiam aktaiangkolha nak ma’a.

Metka nenmankaqtema neltennaikama ania’a aktaqmanma

6 Asmak’ak angvangkok ko’o lhema aspaioma lheiap, enialaivasekho ta mokhom malha talha lhta aplhevai’a apmopvana lheiap aniemai’o lhta m’a Eniapom Neten apkaikamok neksa asnengkanma lhta emeiok apietseksek lheiap. 7 Hengellangkek ennengko’o Eniapom Neten engelvalhok aknema akmovana, nengasekhai’o, nenmeiommalhko enganke’, metka nengai’a nhan. 8 Ka ngkanek memangkankek na elhenek apvesai’a Apveske engankok, ka nhan memangkankek na helhenek ko’o asnema nengaqlhengkasemmalhkelha aniem’o askasennaikama Apveske. Ka apvanko ta emok takha lheiap apvet’o la akientalhnema aniem’o apkeltennaikama ania’a aktaqmanma, Eniapom Neten hato ka nhan eniangkok apiennaktema kakpota evaskapok lheiap. 9 Eniapom Neten hengelvongkeskangkek tep, hengeliekieskangkek nahan kakpota antangkok apkennemolhema hengelpokkanma, ma lhta niekhe hengelietemo ennengko’o m’a, koka tep nak nanek metka nnelha aktepekamo mota apeneskamo hengeltaqmelkeskesek hata nellaniemhaikama apmahai’o eniapaksek ma’a Cristo Jesús. 10 Kolhva koka nelvetai’o nhan apiamolhma apankek Eniapom Neten aniem’o apvai’o m’a Cristo Jesús apto hengelvonkeskama tep, aptevaskamo nhan akmovana nengetsepma nak, hengellaiangko m’a aliennaktema ennenio’ok nkotnengvaianlha nnelha aniem’o nhan ania’a aktaqmanma nak nellengai’a.

11 Heliekieskamo lhta Eniapom Neten kakpota apaiaksek ania’a aktaqmanma nak, hetneskeskamo nhan heiapaskamo apankok kanhan hengetlhekmoskama, 12 ka nkeniemai’ak asvetai’o nak akientalhnema m’a, man koka amangkaktemak ngkanek ko’o asiavek apto moi’askeiakmo, apto lhta nhan heiapaskama apaiaksek ania’a aktaqmanma, asiavek na akietnema apmopvana m’a kakpota ngkolhek aklhengkasakho nema akpaieskama ania’a aktaqmanma nak akvakmo ta aknem hata m’a. ^{▼▼Koka aklhenammalhka aktemongvanlha ta nnelha aknem.}

13 Elhengkes hata nhan aktemakha lhta asketlhekmoskama lheiap, eloka ta nhan lhemek ma’a mangiaskeiam anak, nengasekhai’o nhan alleniemai’o m’a apasmekha songkek Cristo Jesús. 14 Etaqmelkes hata aktemakha aktaqmanma hengetlhekmoskama aplhevai’a lhta lheiap, Espíritu Santo apkakhangkek apvalho’ok aplhamakho Jesucristo apkennemolhema epasmok hata nhan lheiap ma’a.

15 Apiavek na lheiap helieniekho lhta aplhamakho Jesucristo apkennemolhema akieto m’a iokhalhma Asia, ka apkelvesai’a lhta moklhem’a m’a Figelo kanhan Hermogenes. 16 Askeltavek koka Apveske elietnok napaqta’ak apkennemolhema Onesiforo ngkanek lhamakho lhta mota hepasmoma m’a, ka asiennaiekho lhta nhan m’a neksa askaklhengkasemmalhka, ma lhta nhan emangkaktemak helanei’o ko’o m’a. 17 Ma lhta nhan nkovangkok apvai’a hengke’e Roma, hektamo kolhvavek ko’o metka apiamposammap akvakmo lhta hetakho, 18 ka ngkanek ko askeltemo eietnahok napa’at Apveske engankok akvakmo ta aknem hata m’a. Apiavek na lheiap ma’a avanhe lhta nhan hengelpasmoma m’a enenlhet anak akieto lhta m’a Efeso.