Col 4 | TmfSC | STEP | Ketlhengkap apkellelto apkelveskaie, eltaqmelkes hata apkellasennaikama nema apkelianmoma apanko’ok, ellamok koka akietemo nkoie, kotlhen na apvalho’ok ketlhengkap apnek Apveske apanko’ok ma’a neten.

‏ Colossians 4

1 Ketlhengkap apkellelto apkelveskaie, eltaqmelkes hata apkellasennaikama nema apkelianmoma apanko’ok, ellamok koka akietemo nkoie, kotlhen na apvalho’ok ketlhengkap apnek Apveske apanko’ok ma’a neten.

Nellanemmalhkelha antangko mota

2 Elelmalhna mota metka nnelha Eniapom Neten, elelketnama ta nhan kakpota nhan etnangkok gracias Eniapom Neten. 3 Elelmalhnama ta nhan Apveske kakpota hengellangkok ngkeskama nempaieskama ania’a aktaqmanma kakpota angeliekpelkeskeskamhok qaselha akielhammalhka aniem’o Cristo, asnek ko’o kolhvave nak hengke’e nengaqlhengkasemmalhkelha nak aniem’o aspaieskama ania’a aktaqmanma nak. 4 Helelmalhneskes hata nhan Eniapom Neten kakpota heiangkok asmopvana altennama ania’a nak ma’a, nietavek ko atnek ma’a. 5 Etnamok hata nema apkeliamo napaqtavek ma’a enenlhet’avok anak metnangko Jesucristo apkennemolhema, elelientemap neksa aklhengama aknem. 6 Elpaqmetkesap amota qaselha altaqmelo, akleklemo la nhan engvalhok kakpota nkotaqmelek apkellatemmoikama neksa apkelelmalhnekama la’a.

Aktakha nnelha apaivoma Pablo kanhan aklheianma apvalhok

7 Enialheng nengamelaiam Tiquico etsakhesek hata ania’a ehenkok ham, apto nema asennaikama nengaqte heliehekho mota, apto nhan alhelhma asmakmesaikama Apveske. 8 Allapaskesek hata ketlhengkap ham kakpota eleltennaksek aktemakha nellaniemhaikama hengke’e, kakpota elvaskapekhok ketlhengkap ham. 9 Onesimo ta nhan etnek aplhelhma m’a, apaivomolhema apankave nak ketlhengkap, avanhek nellamelaiam ma’a, apto nhan hengasekhai’o, eleltennasama ta nhan lhamakho qaselha aktemakha akvetammalhka hengke’e.

10 Ka apkapasak na aklheianma apvalhok Aristarco, apkaqlhengkasemmakpo nhan hengke’e alhelhma. Kakpota nhan apkapaskek na aklheianma apvalhok hengke’e Marcos apto Bernabe apiaha’ apketka, hata etnek na amaika’a ham, eltaqmelkaso ta apkenmaikamok takha apvaktamo ta ham, astakha lhta nhan askellano aspaioma askeleltemo etnangkok sekhek anke lhta. 11 Ka apkapasak na aklheianma apvalhok hengke’e Jesús, mo’ok nemaltema koka Apeivomo. Ka enenlhet’avok anak na hengke’e apkellelto nema aliaqtemenkeskama nekhatko’ok apkellammelhakha vanlha apankavek helpasmoma neksa asmakmekama aptemakha nak Apveske Eniapom Neten, avanhek ankek na apkelpaiesekha evalhok.

12 Apkapaskek na aklheianma apvalhok Epafras apto nhan apaivomolhema nak ketlhengkap, apto nhan apkasennaikama Cristo Jesús, vanlha mota apaqmetkeskama apkapiosekama Eniapom Neten kakpota eliennak akiokho nkek ketlhengkap apkelieplavkeskama apmahai’elha m’a. 13 Hai’, asvetakhe lhta nhan Epafras avanhek aktaikama apvalhok apkellanei’o ketlhengkap ham, kakpota nhan engelialheng’a apkakhangko Laodicea kakpota nhan Hierapolis. 14 Apkapaskek na aplheianma apvalhok ponha niapom hengamelaiam Lucas, kakpota nhan Demas.

15 Ketlhengkap hato ka nhan ham elletsakhesek aklheianma evalhok elialheng’a apkakhangko m’a Laodicea, kakpota nhan elletsakhesek aklheianma evalhok Ninfa ka nhan iglesia apkaqnekho mota aknemakha m’a. 16 Hata netamen apkelpeneskama ta apkelietsatekamok vakkahak anak, ellapaskes hata nhan iglesia akieto Laodicea kakpota elietsatangkok na m’a, elietsatamok hata nhan ketlhengkap vakkahak apankok ma’a Laodicea. 17 Eleltennasamok hata nhan Arquipo eieplavkesek hata apmakmekama aniem’o m’a apkaikamok Apveske.

18 Hai, ntasek ma’a, nlhenkek evalhok ketlhengkap. Kotlhen hata mota apvalho’ok neksa asnema ko’o hengke’e nengaqlhengkasemmalhkelha nak. Askeltavek na Eniapom Neten eltaqmelkeskesek apkellaniemhaikama ketlhengkap ham. Amen.