‏ Ephesians 4

Aktaqmanma antangkok nempasmommalhko

1Ka nkeniemai’ak ko’o m’a, askaklhengkasemmalhko nak aniem’o heiasennaikama Apveske, askeltavek eltaqmelkasakpok akietemo nkoie ngkanek Eniapom Neten apkellavekama ketlhengkap. 2Etnamok hata nhan koneng apankavek ketlhengkap, anmomhapak’a apvalho’ok ellanhok po’ok, mellammelho apnaqtevasemmap metka apkelpekheskama nhan aniem’o apkellasekhammakpo. 3Elienlhanmamok hata mota aptaikamok apkelpasmommakpo aniem’o Espíritu aniem’o nhan altaqmeliakama apvalho’ok anak. 4Nkotnek ketlhengkap malha lhema apkeliokha, malha lhema la nhan Espíritu, lhema nhan alel·halhnekama apkelvalho’ok elvetak hata aktaqmanma aniem’o Eniapom Neten apkellavekama. 5Apnek na lhema aphapak Apveske, nietnek na lhema aknemo mo’ok meliaskeiam, lhema nhan apkellavkesammap konne iemmen. 6Apnek na vanlha lhema Eniapom Neten apto apkeliapom aplhamakho enenlhet’avok, apto nhan apkemhama apmanie takhaplhet’ok aplhamakho enenlhet’avok, apmakmema nhan aniem’o hengenmaikama nenlhamakho ennengko’o, henloka nhan lhemek engelvalho’ok anak.

7Koka Cristo hengellangkek alpalhkammalhka nenmopvanka’a nenmakmekama moklhem’a ennengko’o aniem’o metka apkenmeiavkesammakpo qaselha m’a. 8Ka ktemo nak aklheianma vakkahak Eniapom Neten apaivoma:

«Apmeiekhek neten aplaqlekho nhan apkenmammap, apkellaiangko nhan apkenmopvanka’a enenlhet’avok ▼

▼Salmos 68:18

», ka nnema aktemo m’a.

9Hai, apmeiekhek nak neten, amanie lhnoka apvaiventak konne kanke nak lhepop. 10Ka apto lhta apvaiventa konne kanke nak lhepop, netamen apmeiekho netne kanke nak, aptemo lhta nhan malha aplanengvekho neten anak. 11Apkeltemeskeskamo lhta nhan apanke moklhem’a nema allapaskamo, po’ok na apkeleltennasemmap ania’a, po’ok na lhta nhan apkeltennaikama ania’a aktaqmanma, po’ok na pastores kakpota nhan hengetlhekmoskama. 12Apketsavheskeskakme lhta nhan apkeliangveskeskaiakmo m’a apkellelto apkelpokkenammap kakpota etnangkok apkellasennaikama, kakpota enmakmesama elvanengkeskesek malha apiokha m’a Cristo, 13akvakmo nenlhamakho nelvanengkaso kakpota angelpasmekhak ma’a aniem’o mongeliaskeiam kakpota nhan neliangveiakmo Eniapom Neten Apketka, akvakmo nhan nentangko aliennaktema nkek engvalho’ok malha Cristo la’a. 14Nkomaskok ma’a nentangko malha nematka nak mankoliennaktema apvalho’ok kolhvavek anke nak akiaqmoiekha mo’ok alketamekama apvalho’ok. Kolhvavek ankek na eiaqmonkasangkok mo’ok nematlhekmoskama ngkolatsekama apketsokmo la enenlhet apkenmopvanka’a nak heniennengkesek, koka malha al·hanemmalhka m’a. 15Ntasek koka antangko mota iokhalhmek netlheianma akieplomo nengellasekhammalhko kakpota nkovanamok akiokho nkoie akvakmo nennakho Cristo, apto malha apqatek. 16Alietetakha nak alpasmekha apiokha nak aniem’o Cristo, moklhem’a nak ma’a nietnek anmakmekama nkek mo’ok aktemakha, alpasmommalhko koka kakpota nkolvanamok ma’a, nkoliennak nahan aniem’o allasekhammalhko.

Alhnankok nentemakha aniem’o nempasmekha Cristo

17Kolhva asmak’ak atnek allana aktaqmanma nkek hengke’e akieplomo apvesai’a Apveske, ¡metnamo nkek ketlhengkap aptaiangkolha nak melioho nak Eniapom Neten! Apkelieplavkaske mota alietnaikama apaqto’ok nkolietemo m’a. 18Malha alpaiseiam na alketamekama apvalho’ok ma’a, taiepek na Eniapom Neten aniem’o meliangveiakmo, aniem’o nhan aliennaktema apvalho’ok. 19Mmaskek na apkenmangko apkellanengko la ngkolatsekama alenteiapma apvalho’ok ma’a, metka apkenmangveiam apkellanengko la apkenmensangveiam alhma.

20Ketlhengkap koka apkeliavek have aktonak nema atlhekmosekamok alhta ketlhengkap aptemakha nak Cristo, 21have niapak ankek na apkellengai’o ania’a akto have niapak ankek aplhenammap Jesús, apkeliangveiakmek na apkelleliehekho m’a alietemo nkek na aptaiangkolha. 22Ka nkeniemai’ak na ketlhengkap ntasek elvatesangkok ngkollatsekama apkellaneiangko lhta mota lhennenga, etnangkok malha apkel·hatsosaikamok lhennenga apvalho’ok alpaisengkeskama aniem’o aliaspongkomakha nak apvalho’ok akmovana nak hengiennenkesek. 23Eliaqmongkasekha ta nhan alhnanko’ok alietnaikama apaqtek. 24Elpekkenekha koka malha alhnankok apvalho’ok aniem’o m’a Eniapom Neten, niavek ma’a qaselha nak akpeivomo, qaselha altaqmelo kakpota nhan iokhalhme nak.

25Ka nelpasmekha nak malha lhema neliokha ntakhak ma’a, ka nkeniemai’ak na metnangkek apkenmopvanka’a ania’a apieseksek anak ketlhengkap, etnamok hato ka nhan iokhalhmek ankek apketlheianma. 26Hata nhan apkellavo la ketlhengkap, mellanko nkek nkoiavangkok akvakmo apkellan’o ngkolatsekama, melvenaktesamo nkek na aknem 27kakpota mankovhek aveske keliaqhameiok nkomama m’a apvalho’ok.

28Enenlhet apto apmenielhma la’a, ¡elvates! Emakmama koka akieplomo aptaqmelkasemmakpo kakpota ngkoitek patakkom apankok, epasmok na alaimelhkelha la’a enenlhet anak metka apkeletsekama.

29Melpaqmetama ngkollatsekama la apaivoma, ntasek koka elpaqmetama altakmanma kakpota nkoltaqmelkesek apkellangiemhaikama po’ok, nkoliangveskeskamhok nahan. 30Meltemeskes na akmaiose apvalhok Espíritu Santo apkeniem’o Eniapom Neten, apto nhan ma’a malha mongenatkeskama la apiempeiok apkeltemeskeskama lhta ketlhengkap kakpota eliekpelkok enenlhet apanko’ok akvakmo ta m’a aknem apsavhomakha apkel·hatsoskekha neksa anmaikama moniamolhma.

31Etnamok hata nhan malha apkel·hatsosaikamok anmaiosak’a apvalho’ok, apkelloma, annathesaikama, apkelelpalhemaikama nhan, apkeltaknongkoma po’ok kakpota nhan lhamakho aktemakha ngkolatsekama. 32Ellanamok koka altaqmelo qaselha, elietnaho napaqta’a po’ok, eltemeskesama ta nhan apankavek aptevasko la po’ok apieseksek anak ketlhengkap, ka aptemakha lhta Eniapom Neten aptemeskesaiangka lhta apankek meliamolhma lhta ketlhengkap aniem’o apkelpasmekha Cristo.