‏ Galatians 3

Nenlhevai’a Espíritu Santo aniem’o mongiaskeiam

1Asketlhekmoske lhta ko’o alhnakho nke aktemakha lhta apketsepma Jesucristo neten iamet aktenneskama kakpota antangkokhak nengelpeivomo napaqtek Eniapom Neten ma’a, koka ketlhengkap apkelvatesaiangkek ania’a aktaqmanma nak. ¡Malha apiolhma meihamolhma ntemak apnaqtevaskama apqatko’ok anak ketlhengkap Galatas, mamma apqatko’ok! 2¡Kolketamama koka apvalho’ok ketlhengkap! ¿Apketlhevai’a nke nlho Espíritu aniem’o ley, he? ¡Mma’! Vanlha apketlhevaiangko Espíritu aniem’o meliaskeiam ania’a aplhenammap Cristo. 3¡Malha metka apqatko’ok la ketlhengkap! Kolhva koka apkeleltavek elieplavkesek aptaiangkolha apankave nak henganemakha enenlhet apankave, mok aktemakha m’a apkelempai’osekha lhta aniem’o Espíritu. 4Malha nak akhemo ntemak apkelvetai’a sekhe lhta qaselha altaqmelo ketlhengkap ma’a, koka have akhemo m’a.

5Apkellaiangke lhta Espíritu apanke Eniapom Neten ma’a, apkelanai’a lhta nhan qaselha hempelapkeskama apieseksek ham ngkanek ma lhta eliaskeiakmok Cristo, have aniem’o m’a apkelleliehekho nak ley Moises.

Apeivomo Abraham aniem’o mei’askeiam

6Mang nak nanek na ei’askeiakmok Abraham Eniapom Neten, lhnak nanek na nkeniemai’ak aplheianmo apeivomo m’a. 7Ka ngkanek ko askeltavek eliohok ketlhengkap ma’a, ka aptangkok apketkak Abraham aknangko nlho meliaskeiam ma’a. 8Alhnakho nkek aklheianma vakkahak Eniapom Neten apaivoma ngkolhek hata altemeskaso apkelpeivomo metnangko nak judios meliaskakmo la Cristo, lhnak na nek aptemak Eniapom Neten apkanemo Abraham:

«Lhamakho enenlhet’avok metnangko nak judios ngkolhek hata altakmelkaskeso apkellangiemhaikama m’a aniem’o lheiap ▼

▼Genesis 12:3

», ntemak ma’a.

9Ka kto nak ma’a, enenlhet apkellelto nak meliaskeiam ngkolhek hata altakmelkaskeso apkellangiemhaikama ka aktemo lhnak nanek na Abraham aniem’o akietnema mei’askeiam, 10koka enenlhet apkellelto la apkelielhanmekama ley, nema aliematkeskama nhan ma’a, ka ntemak vakkahak Eniapom Neten apaivoma hengke’e:

«Nema akiematkeskama m’a apto la mesavhomo apieplavkeskama ley ▼

▼Deuteronomio 27:26

».

11Ka akto nak ma’a, mankavankek ley nkotneskesek apeivomo lhema la enenlhet, ka ntemak na vakkahak Eniapom Neten apaivoma:

«Enenlhet apeivomo ngkoitek hata akiennaktema apneniek aniem’o mei’askeiam».

12Koka ley anak mankopasmekhek ma’a mongiaskeiam anak, ka ntemak ley:

«Enenlhet ngkoitek hata akiennaktema apneniek aniem’o m’a apieplavkeskama ley ▼

▼Levitico 18:5

», lhna ntemak.

13Hengel·hatsoskakhe lhta Cristo apianmongkeskekho akianmoma neksa hennaqtevaskama ley, malha nha ntemak apatmekha la nema hennaqtevaskama m’a. Ka ntemak na aklheianma vakkahak Eniapom Neten apaivoma hengke’e:

«Nema akiematkeskama apto la apketsepma apiepetkasemmap neten iamet poste ▼

▼Deuteronomio 21:23

».

14Ntemenke lhta m’a kakpota nkovak na takhaplhet’ok metnangko nak judios apaivoma apeneskamo lhnak nanek Eniapom Neten eltaqmelkeskesek apkellangiemhaikama Abraham, netlhevai’ak ma’a Espíritu apankok Eniapom Neten aniem’o mongeliaskeiam Cristo Jesús.

15Ketlhengkap elialheng’a, smak’ak aietkesek lhema qaselha aktemo nak nenieseksa ennengko’o. Apto la lhema enenlhet apkelanai’a vakkahak aktemakha apkelhpankesekha qaselha apanko’ok, netamen na etnek firma kakpota ngkolhek aiempek ma’a, netamen mankollapvankek na enmaskeksek ma’a kakpota nhan etalhesekhak mo’ok alqama la’a. 16Lhnak nanek na aptemak Eniapom Neten ma’a apeneskamo aplheianma lhema apaivoma nkovak hata takhaplhet Abraham kanhan aptaven neptamen, have aplheianmo m’a aplhamakho aptavana’ak anak, vanlha lhema, lhna aptemak: «Lheiap aptaven ▼

▼Genesis 12:7

», lhna aptemak ma’a.

Koka m’a Cristo.

17Askeltavek ko’o eliohok ketlhengkap ley anak mankavankek nkomaskeksek aktemakha apaivoma apeneskamo aplheianma Eniapom Neten ellangkok qaselha Abraham. Amanie nkek nak akvaiam apaivoma apeneskamo aplheianma Eniapom Neten, netamen 430 anio lhna ngvaiakmok ma’a, akvai’o nhan ley, ka ngkanek ley anak mankavankek nkomaskeksek ma’a. 18Ka qaselha apeneskamo lhnak nanek aplheianma hengellangkok hata Eniapom Neten have aniem’o m’a ley anak, koka nkeniemai’ak ma’a apaivoma apeneskamo aplheianma Eniapom Neten apkeltennaskamo m’a Abraham.

Aktemakha akmakmekama ley

19Nlhevai’ak nak nanek ley, akmovana ngkoteskesek meliehekho enenlhet, malha niekhe nha ntema nnelha m’a apvai’o aptaven neptamen Abraham apeneskamo lhnak nanek aplheianma m’a. Ángeles nak nanek apkenmama takha ley, apkelletsavkeskamo m’a Moises, aptemo nhan Moises apketsavkeskamo ley enenlhet’avok ma’a. 20Koka Eniapom Neten apiokho pankek apkeltennaskamo Abraham lhema apaivoma, mang nanek eniapaskama apkennengkasekama m’a.

21¡Molhenak ko’o ley anak ammelhma apaivoma apeneskamo lhnak nanek Eniapom Neten ellangkok hata, have niapak molhenak ma’a! Vanlha alhenak ko ley anak mankavankek hengankok akiennaktema enneniek ka ngkanek mankavankek na hentemeskesek nempeivomo.

22Aklheianma Eniapom Neten apaivoma nenlhamakho nengelelto hengenmaikamok ngkollatsekama, vanlha koka envanka’ak angetlhevangkok hata qaselha apeneskamo aplheianma Eniapom Neten aniem’o mongeliaskeiam Jesucristo. 23Hengenmaikama lhta ley anak akvakmo akvai’o m’a mongiaskeiam anak, malha nennaktemommalhka lhta ntemak akvakmo m’a akno hengelvetaskeso mongiaskeiam. 24Ka ley anak malha hengetlhekmoskama, hentaqmelkeskama nhan aktemakha neksa nellaniemhaikama m’a akvakmo apvo’o Cristo, kakpota hengeltemeskesangkok nengelpeivomo aniem’o mongiaskeiam. 25Kolhva koka mankaimelhkak hengeltaqmelkeskama la’a ngkanek ngvai’ak ma’a mongiaskeiam anak, 26nnengkek hengeltemeskeskamo Eniapom Neten apketkak aniem’o mongiaskeiam Cristo Jesús.

27Neksa malha nema allavkeskama lhta apieplomo Cristo ketlhengkap, malha lhta nha ntemak apkelapma la Cristo, 28kolhva koka aptaiangkok ketlhengkap apkelpasmekha Cristo Jesús, judios, griegos, nema allasennaikama nema apkelianmoma, metnangko nak nema apkelianmoma, apkelennava’ak, ngkelvana’ak, aplhamakho apankavek. 29Hai, apkelpasmakhek ketlhengkap Cristo ka ngkanek etnangkok na aptavana’ak neptamen Abraham, etlhevangkok hata nhan qaselha apeneskamo apaivoma Eniapom Neten ellangkok hata.