‏ Galatians 4

Akmaskema nentaikamok nema allasennaikama nema apkelianmoma, kolhva neltokhek apketkak

1Apkeliavek ketlhengkap apnek hata nkek apketka enenlhet apselhiek la’a mevanemo mokhom, mankapvanke enmekhak apketsekama apiapom apanko’ok ngkanek apketketsek mokhom, mankapvankek etne panke’ aplhepkennenga, malha nema asennaikama nema apianmoma niekhe m’a. 2Nkaimelhkek elhengkesek mokhom apketlhekmoskama lhema enenlhet kakpota nhan lhema enenlhet aptaqmelkeskama akvakmo apvanemo kakpota ngkovomok aknem aplheianmakha apiapom. 3Nnavek na ennengko’o malha nematkak alhta hengenmaiangka lhta akmovana neniava nak. 4Koka nietemavek akvai’o aknem Eniapom Neten aplheianmakha, apkapaskamo apketka apanke’, malha lhta aptemak enenlhet apankek apteiaiakmo m’a, neksa alhta nhan akientalhnema ley. 5Apvai’a lhta m’a apianmongkeskekho akianmoma hengel·hatsoskekho nhan neksa hengenmaikama ley, kakpota hentangkokhak apketkak Eniapom Neten. 6Ka nkeniemai’ak hengellapaskeskamo Espíritu apankok Apketka apkellaneiangkok engelvalho’ok, apaqmetkeskama nhan Eniapom Neten, ka aptak hengke’e: “Ta” ▼

▼Abba padre.

7Koka kolhvave nak ketlhengkap have nema allasennaikama nema apkelianmoma, apkellelto koka Eniapom Neten apketkak, etlhevangkok hata qaselha apanko’ok aniem’o Eniapom Neten.

8Lhennenga lhta ketlhengkap apkellasennaikama qaselha neniava nak mankotno Eniapom Neten, ma lhta eliamok na aptemakha Eniapom Neten, 9koka kolhvave nak apkeliavek aptemakha m’a aniem’o apmahai’a apanke lhta etnek apkeliekpelkemo napaqtavek ketlhengkap ma’a. ¿Se lha ntemak na ketlhengkap apkeleliehekho nak mokhom qaselha neniava nak mangkoliennaktema, metka akmovana nhan, he? ¿Se lha ntemak na apkenmahai’o nak mokhom etnangkok allasennaikama ankok nema apkelianmoma, he? 10Apketlhengkaskek mokhom aknem ankok apkelpokkenkeskama, pelten, aknem kanhan iantelhkapa. 11¡Ntaikama evalhok malha aqhemo ntemak akientalhnema alhta asketlhekmosekamok ham!

Aklheianvekho apvalhok Pablo aptemo sekha amaika’a

12Ketlhengkap elialheng’a askeltavek etnangkok astemakha nak ko’o, ka stemak ko’o aptaiangkolha nak ketlhengkap.

Ma lhta henaqtevaskamak ko’o 13sekha asvaiam alhta ham asketlhekmoskama ania’a aktaqmanma, nientelhe kanke lhta nemmaskema heiaqhema, lhta ngkanek alhnakhak iama akvangkakho ham. 14Malha aliasekamo lhma lhta ntemak nemmaskema ehenkok ketlhengkap ma’a, mokhom alhto ka heltaqmelkeskama m’a, mang na heltaknongkomak, henmankek takha malha stonak ángel Eniapom Neten la apkapaskama, malha niekhe nhan Cristo apanke’. 15Avanhek ankek lhta alpaihekha apvalho’ok ma’a, akvakho lhta niekhe apkenmahai’a hellangkok apaqto’ok ¿Se lha ntemak na akmaskemo nak alpaihekha apvalho’ok, he? 16Malha kelha astaiekhak ko’o nkotno emmo’ok ngkanek askelpaqmetkeskama mota napaqtavek aktemakha hengetlhekmoskama akto have niapak anke.

17¡Ellaho ta ketlhengkap enenlhet’avok apkenmahai’a nak eliennengkesek! Malha niekhe apkenmahai’o pankek la elpasmok ma’a, vanlha koka apkeleltemo hengelienieskasekhak ketlhengkap ma’a, elieplakhak na apketlhekmosekamok ma’a.

18Ntase niekhe elpasmo mota m’a, have vanlha helvet’o la asvekha ham apieseksek anak ketlhengkap aniem’o nhan apkenmahai’a helietkesamaha. 19Ketlhengkap eietkak, mokhom aslengaiangko akientalhnema aniem’o ketlhengkap, malha kto nak engken la aklengaiangko akmaska av’alhok aniem’o apmahai’a etiemok atka. Hata nhan ngkotnek aslengaiangko akientalhnema akvakmo aknem etnangkok ketlhengkap malha Cristo. 20Avanhe skeltemo mota alhek niekhe ham kakpota alpaqmetkesama metka askeliennai’oho, niemaskangkek koka evalhok aslengai’o ania’a apkeltemakha ketlhengkap.

Alietkesammalhka Sara kanhan Agar

21Eltaqmelkaso no apkellailhemo ketlhengkap apkellelto apkenmahai’a elieplavkesek ley Moises ¿Ma nlho ellengai’ak ketlhengkap aktemakha aklheianma ley nak, he? 22Apkanet nak nanek apketkak Abraham, lhema lhnak apkengiem’ak ngkelvana nema asennaikama nema akianmoma, po’ok nak apkengiem’ak ngkelvana nkotno nema akianmoma. 23Atka nkotno nema akianmoma apto aplheianmo lhnak nanek lhema apaivoma apeneskamo Eniapom Neten etak hata Abraham, koka atka apkeniemo ngkelvana nema akianmoma koka m’a anmahai’elha ankavek ngkana’ak. 24Koka hanet ngkelvana’ak anak alietkesammalhka malha hanet aknemo mo’ok apvalho’ok apkenmahai’akha etnangkok ma’a. Agar koka malha m’a aniem’o akieto metaimong akhaiam Sinai, apkakhaiangkek nak nanek atkak apkellelto nema allasennaikama nema apkelianmoma. 25Agar koka akietkesammalhka m’a metaimong akhaiam Sinai akieto Arabia, akietkesammalhka nhan malha temma Jerusalen nenvanlha nak, nema asennaikama nema akianmoma apkelieplomo nhan atkak ma’a. 26Koka natemma Jerusalen akietnemo m’a neten, koka akto engkana’ak ma’a, have nema asennaikama nema akianmoma. 27Ka ntemak na aktalhesammalhka vakkahak Eniapom Neten apaivoma hengke’e:

«Kopaihekha av’alhok lheia’ ngkelvana akiennaktema naie’, metka nke nak akvetai’a atka, kovenkesamaha akieplomo akpaihekha av’alhok lheia mankotei’o aklengaiangko akmaska aniem’o apmahai’a etiemok atka, akieniommalhka lhta lheia koka nkollvetak hata atkak apentalhnema, mankolhehek hata m’a apnema nak anakteiangka’a», ntemak ma’a.

28Ellailhono elialheng’a, ketlhengkap apkellelto malha Isaak, apkellelto apketkak Eniapom Neten apeneskamo apaivoma aplheianma elvetak hata. 29Nematka apto lhnak nanek apteiam anmahai’elha nkek ngkana’ak, apiaqmasekama lhnak nanek ma’a nematka apto apteiam Espíritu, nnavek nenvanlha nak. 30Koka nietnek aktalhesammalhka vakkahak Eniapom Neten apaivoma hengke’e:

«Eniapes ngkelvana nema asennaikama nema akianmoma nak kakpota nhan atka, ngkanek mankoietok etlhevekhak lhemek atka nkotno nema akianmoma qaselhaha apankok» ▼

▼Genesis 21:10

—lhna ntemak ma’a.

31Elialheng’a, have ennengko’o nengelelto atkak ngkelvana nak nema asennaikama nema akianmoma, vanlha koka m’a nentangko atkak nkotno nema akianmoma.