Gal 6 | TmfSC | STEP | Ketlhengkap elialheng’a apkellelto apkenmaikama Espíritu, ntasek ennavakse mota po’ok apkellan’o la qaselha ngkollatsekama, koka have apkeliennai’oho. ¡Ellaho ta nhan ketlhengkap ngkotnek kelha apkeliepkonammap nahan!

‏ Galatians 6

1 Ketlhengkap elialheng’a apkellelto apkenmaikama Espíritu, ntasek ennavakse mota po’ok apkellan’o la qaselha ngkollatsekama, koka have apkeliennai’oho. ¡Ellaho ta nhan ketlhengkap ngkotnek kelha apkeliepkonammap nahan! 2 Elpasmakpo ta pankavek elpatmekhak malha apkelpatama apieseksek anak ham, ka aptangko la ketlhengkap ma’a, apkelieplavkaskek ley apankok Cristo.

3 Apto la enenlhet metka neten apiaspommap, koka nkolhenek apvalhok akto neten apankek apiaspommap ma’a, koka apiennengkasekpe pankek na m’a. 4 Ntasek koka moklhem’a nkotlhenalhko nkek apvalho’ok apkellanekamok kelha ngkolatsekama, aktaqmanma, netamen hata m’a nkollaqhama kelha apvalhok. Koka mangkolatsema m’a elietkeskamok aptakha la apkelanai’a po’ok, 5 ngkanek moklhem’a nnankek metka apkeliekaskama elpatmekhak malha apkelpatmekama.

6 Enenlhet apto la nema atlhekmoskama ania’a aktaqmanma, ntasek epasmekhak lhamakho qaselha aimelhkelha la m’a apto apketlhekmoskama m’a.

7 Mamma enenlhet eiennengkasama Eniapom Neten, meliennengkasakpo nkek na ketlhengkap ngkanek apkenokho la lhema aktek, enaklhangkok hata nhan akielhna aniem’o m’a aktek lhek apkenaikamok. 8 Malha apkenekha apankek apvalhok la aktek akvesai’a akiaspongkomakha nak engvalhok, enaklhek hata akielhna akvesai’a nengetsepma, koka apkenakho la aktek apvesai’a Espíritu, enaklhek hata akielhna akvesai’a akiennaktema enneniek mankotnengvaianlha nnelha. 9 Ka ngkanek na ketlhengkap mel·halhiengvomek apkellanekamok qaselha altaqmelo netamen hata m’a akieto la aktaqmelakha aknem avanhek hata ngkotnek apnaklhekamok akielhna altakmanma metko la alvannammalhka apvalho’ok. 10 Etnamo ta alietakho la mota ellanangkok qaselha altaqmelo aplhamakho pankek enenlhet, koka nhan tep ankek alietemo m’a apkellelto nak apkelialheng’a aknaikamok anak meliaskeiam.

Apkellaskama qaselha Pablo kanhan aktakha nnelha apaivoma

11 Eltaqmelkaso ta apkelietsatekamok alkama nak aliavai’a astalheskama. 12 Ka enenlhet’avok apkenmahai’o lhta eliatangkok ketlhengkap eliaqtemenkeskesek nekhatkok apkellammelhakha, vanlha koka apkeleltemo nkollekok apvalho’ok enenlhet, mankonmahai’ak ellengangkok akientalhnema neksa apketlheianma ania’a apketsepma lhta neten iamet aktenneskama Cristo m’a. 13 Apkelpeneskangkek enenlhet anak apkeliaqtemenaikamok nekhatkok apkellammelhakha m’a, mang koka elieplavkeskama aklhamakha ley Moises. Apkelleltemavek eliaqtemenangkok nekha atkok apkellammelhakha ketlhengkap ma’a kakpota ellakpok aniem’o apkellasekhai’o ketlhengkap ma’a. 14 Vanlha koka ko’o anmalhko evalhok aniem’o Apveske engankok Jesucristo apto lhta apketsepma neten iamet aktenneskama, ka nkeniemai’ak astaqnongvekho qaselha ngkollatsekama neniava nak, kanhan hetaqnongvekho m’a neniava nak. 15 Kolhva alhnankok nentaiangkolha nak koka akto neten ankek akiaspommalhka m’a, mangkolhnok aliaqtemenammalhka nak nekhatkok apkellammelhakha, nlho ka la nhan metka nak aliaqtemenammalhka m’a.

16 Askeltavek ko’o nkovaiventak altaqmelaikama engvalhok kanhan nenietnai’o nenga’at takhaplhet’ok apkellelto apkeleliehekho m’a aspaioma lhkek, kanhan takhaplhet’ok Eniapom Neten apkennemolhema Israel.

17 Koka kolhvave nak moltok ngkolhek heliasolhma, mantek ko’o eskepok ehenkok eiempek ma’a aniem’o aslengaiangko sekhe lhta akientalhnema aspasmekha apveske Jesús.

18 Ketlhengkap elialheng’a, askeltavek ko’o Apveske engankok Jesucristo eltaqmelkeskesek apkellaniemhaikama ketlhengkap ham. Amen.