‏ Hebrews 13

Aktemakha apkellanemmakpelha etnangkok Jesucristo apkennemolhema

1Etlhengkes hata mota apkellasekhammakpo apankavek apieseksek anak ketlhengkap ham, malha aptonak apkelialheng’a apankavek la’a. 2Eltaqmelkaso ta nhan apkenmaikamok takha aptaikamok la amaika’a apkakhaiangkelha. Kotlheianvakho ta mota apvalho’ok moklhem’a lhnak apkenmaiangkok takha ángeles neksa meliamo m’a. 3Elpasem hata nhan aplhatmommap anak kakpota nhan metka nak ngkolhek altakmelkaso, ketlhengkap hatelha nhan ngkotnek ma’a. 4Eleliehekho ta mota apnaqteiangka’a, etlhengkes hata mota aktaqmanma nkek apkelpathetaikamo mota apnaqteiangka’a ngkanek eiekpelkok hata apkeltemakha Eniapom Neten apkellelto la apkellanaktema kanhan aptevaskama la aliemhapma. 5Meliaspamo nke mota apkankesaikamok nkeskama qaselha apanko’ok. Kolpaihekha toka mota apvalho’ok aknangkolha la’a qaselha apankok ngkanek lhna aptemak Eniapom Neten hengke’e:

«Moieniekhek hata lheiap, molvataksek hata nhan askelanekama», lhna aptemak.

6Hai, envanka’ak angetlhenek metka altaikama engelvalho’ok: «Apveske apto hepasmoma, mongvakiek enenlhet apmahai’a la hetvaksek», antangkok ma’a.

7Kotlheianvakho ta mota apvalho’ok ketlhengkap apkeltemakha lhta apkelemhama apmaniaie apanko’ok apkellelto lhta apkelpaieskama ania’a aktaqmanma ham aniem’o Eniapom Neten, kotlhen hata nhan apvalho’ok ma’a ko la lhta aptaiangkolha apkellangiemhaikama, elvanamok hata nhan ketlhengkap aptaiangkolha lhta meliaskeiam ma’a.

8Metka apiaqmongkasekha mo’ok aptemakha Jesucristo, nheklhe mota aptemakha knem alhta, knem anak kanhan emanie nak mangkotnengvaiam annelha nhan. 9Ka ngkanek na ntasek ketlhengkap meliaqmongkasekhek mo’ok aktemakha hengetlhekmoskama la’a, ngkanek lhamakho henganemakha nak alleskama mota etavangkok lhamakho nentoma la’a ketlhengkap man koka nkoliennakteskasak apvalho’ok ketlhengkap ma’a. Vanlha koka m’a nengamelaiam anak aniem’o m’a Eniapom Neten avankek nkoliennakteskesek apvalho’ok ma’a.

10Nietnek ennengko’o kolhvave nak malha niekhe alvanlhemmalhkelha qaselha koka mankollapvankek etavangkok ma’a sacerdotes apkelelto la apkenmakmekama konne akpaklhenammalhka kaselha aiempek anak. 11Nkanek apiav’akha la sacerdote apsekho nhan ema ankok apnaqtoskama akieto m’a konne pa’at akpokkenammalhka kakpota engkeskakhak Eniapom Neten ma’a akiaqmoiekha apkellanekamok ngkollatsekama aplhamakho enenlhet’avok. Netamen ma’a ngkolhek akvanlho apnaqtoskama apkennapekamok akieto m’a aptek pa’at akpokkenammalhka. 12Nnavek na m’a Jesús apmatengvekhek nepiava’ apiav’akha temma kakpota etneskasangkok enenlhet’avok apkelpokkanma Eniapom Neten aniem’o ema apankok ma’a. 13Ennengko’o nhan nkaimelhkek antangkok malha nelenteiapma m’a apiav’akha temma, angenmangkok na takha akientalhnema aniem’o neltaqnommalhka malha aktemo lhta apkaniemhaikama Jesús ma’a. 14Ngkanek nengavakha nak hengke’e nalhepop anak nkomaskengvomok hata m’a, nkelatseskaskek engelvalhok ennengko’o apiav’akha temma ta m’a. 15Eliavenkaso ta mota apvesai’a Eniapom Neten aniem’o nhan Jesucristo, malha ntak ma’a akmatnama nak nentoskama nengaikamok la m’a kakpota nkolekkasama apvalhok ma’a. ¡Hai, eliavenkaso ta mota nhan Eniapom Neten akieplomo apkelpaqmetekama! 16Melvatesamo nkek na apkellanekamo mota qaselha altaqmelo, apkelpasmoma nhan po’ok, ngkanek qaselha nak ma’a akleklemelha apvalhok Eniapom Neten, malha nengaqhema la nentoskama nengaikamok anak ma’a.

17Eleliehekho ta mota apkelemhama apmaniaie apanko’ok ketlhengkap ngkanek apkeltakmelkaske mota ma’a metka apkeliamposammap, netamen elheianvakhak hata m’a aktemakha apkelanei’o m’a napaqtek apveske. Hai, eleliehekho ta m’a kakpota nkolpaihekhak apvalho’ok na neksa apkeltakmelkeskama ketlhengkap ma’a, kakpota nhan metlhenek hata apkelvesai’a meliamolhma ketlhengkap ma’a, ngkanek mankolatsama ta apketlheno la ketlhengkap ma’a.

18Hengellelmalhneskes hata nhan ennengko’o ham, kakpota hengelpasmo mota Eniapom Neten ngkanek alhnai’o akietnaikama engaqto’ok, vanlha mota nelienlhanmekamok angeltakmelkasalhko mota. 19Koka nhan akto aktaqmelakho nkek helelmalhneskesek ko lha Eniapom Neten kakpota eltok aniantak astaikama la amaika’a kolhvave nak ham.

Aktakha nnelha apaivoma Pablo kanhan aklheianma apvalhok

20Eniapom Neten apto aktaqmelaikama envalhok aniapom, apto lhta nhan aplhatekhaskeiam apieseksek apkenmaskengvaiakmo apveske engankok Jesucristo, apto aptaqmanma apkellanekama nepkesek, aniem’o ema apankok aiangko nhan ma’a akiennaktema annemo mo’ok anak apvalho’ok apkenmahai’akha ta etnangkok ma’a mangkotnengvaiam annelha. 21Askeltavek ko’o Eniapom Neten elentepkeskesek apvalho’ok ketlhengkap lhamakho aktemakha altaqmanma akleklemelha la mota apvalhok ma’a, aniem’o nhan Jesucristo, apto akietemo nkek neniavenkeskamo apvesai’a m’a metka akvaiam annelha aliekaikamok iantelhkapa.

22Elialheng’a, ntasek eltaqmelkaso apkellailhemo akiakvatema nke niekhe askeliatekho nak asnaktalheskeskama ketlhengkap. 23Askeltavek na aleltennasama ania’a engelialheng’a lhta Timoteo aptepakhe lhta m’a nenmammalhkelha m’a, hata apvaktamo ta hengke’e angenmeiantak hata ham nentaikamok amaika’a. 24Smak’ak asaksek aklheianma evalhok aplhamakho apkelemhama apmaniaie apanko’ok ham kakpota nhan aplhamakho apkellelto apkelpokkenammap, nketlhenkek na apvalho’ok engelialheng’a ko Italia. 25Hai, askeltavek Eniapom Neten hata eltaqmelkeskesek apkellaniemhaikama aplhamakho ketlhengkap ham.