Hebrews 3
Jesús apto neten apankek melhnok Moises
1Ketlhengkap elialheng’a, apkelpokkanma, apkellavekama lhta nhan Eniapom Neten, ka nkeniemai’ak ntasek nkolietnama apaqto’ok amota aptemakha lhta Cristo Jesús. Netlheianmo na mota ennengko’o apto apkapaskama Eniapom Neten kakpota nhan apto apiav’akha sacerdote m’a. 2Apkeliehekhave lhta nhan aptemakha apkanemo Eniapom Neten apkeltemo hengelpasmok hata, apnave lhta nhan Moises apkeliehekhavek nak nanek na aptemakha apkanemo Eniapom Neten apkeltemo eltaqmelkesek pa’at apankok. 3Koka Eniapom Neten apkanke lhta Jesús neten apankek nemo ai’o, aselhtek ma’a Moises. Nnavek na m’a enenlhet la apmopvana elanak pa’at aplhok’ak nemo ai’o, aselhtek ma’a pa’at anak alanemmalhka. 4Lhamakho pa’at anak apkellanai’a nak enenlhet, koka Eniapom Neten na apkellanai’a lhamakho qaselha nenvetai’o nak. 5Moises nak na apto nema asennaikama apiamolhma, apkeltakmelkeskamo lhnak na Eniapom Neten apnemakha, apkelvetaskeskamo lhnak na lhamakho qaselha aktemakha apkelanai’a napaqtavek ma’a, nkolhok hata nhan akvai’a qaselha apmaniaie m’a apmak’akha ta etnek Eniapom Neten. 6Cristo koka apto Apketka, apiamolhma apkeltakmelkeskamo mota pa’at apanko’ok Eniapom Neten, ennengko’o m’a malha pa’at netlhengkaso la mota nentaikamok mongeliaskeiam metka nengelvateskaiam, kanhan nkolel·halhnama engelvalho’ok qaselha altaqmelo nkolvak hata.Ngkolatsekama antek akiennaktema engvalhok
7Ka nkeniemai’ak na ntasek angelleltakmelkaso angellailhok aktemakha aplheianma Espíritu Santo aktalhesammalhka Vakkahak Eniapom Neten apaivoma, ka aptemak hengke’e: «Apkelleng’o la Eniapom Neten apaivoma aknema anak, 8meliennaktesankek apvalho’ok ketlhengkap, have malha m’a aptaiangkolha lhnak nanek enenlhet’avok menmahai’a ellailhok, apkeliepkonmo lhnak nanek na Eniapom Neten ma’a akieto iokhalhma metkelha temma, ka aptemak ma’a. 9Heliepkonmek nak nanek na apkelieihengka ketlhengkap ma’a, apkelvetai’ak nak nane niekhe qaselha mongvetai’o askelanai’a ko’o metka nnelha akvakmo 40 iantelhkapa, nkaqhok koka m’a. 10Ka nkeniemai’ak ma’a aslomo nanek askellanei’o kolhva apkaktengaikamok neptamna’ak ma’a, lhnak nanek astemak askellanemo hengke’e: “Vanlha mota allaniemhaikama apvalho’ok malha atlheneiam la’a, mankonmahai’ak nkoliangvomhok amai ehenkok anak”. 11Ka nkeniemai’ak ma’a aslomo nanek na akiavai’a, aspeneskamo lhnak nanek na aspaioma melentelhek hata m’a iokhalhma apkeliamposammakpelha», lhnak nane aptemak. 12¡Ellaho ta elialheng’a! Metnamo nkek na ngkollatsekama apvalho’ok nkeltemeskaskek na apkeliaskeiam ma’a kakpota nkolienieskasekhak na Eniapom Neten apto mangkotnengvaiam annelha apkaniemhaikama. 13Ntasek na eliatakpok apieseksek anak ketlhengkap neksa mankovai’a mokhom aktakha nnelha aknem kakpota mankoliennenkesek ngkollatsekama nak, mankoliennakteskesek na apvalho’ok. 14Ampakhasekha nke lhta mongeliaskeiam ennengko’o Cristo m’a, ka nelvaskapo la nhan akiennaktema mongeliaskeiam akvakmo aktakha nnelha aknem, netamen angelpasmekhak hata ma’a nenlhamakho qaselha apankok Cristo m’a. 15Ka aknemo nak na aktemo hengke’e: «Apkelleng’o la Eniapom Neten apaivoma aknem anak, meliennaktesankek apvalho’ok malha aptaiangkolha lhnak nanek ma’a apkellelto menmahai’o eleliehekhok». ▼▼Salmos 95:7-8
16¿Se lha enenlhet’avok m’a ie mankonmahai’o eleliehekhok apaivoma Eniapom Neten, he? Koka aplhamakho m’a apkellelto lhnak nanek apkel·hatsoskekha Moises akieto m’a iokhalhma Egipto. 17¿Se lha nhan enenlhet’avok m’a ie aplomo apkellanei’o Eniapom Neten akvakmo 40 iantelhkapa, he? Koka nhan apkellelto lhnak nanek apkellanekamok ngkollatsekama m’a, apkeletsepmo nhan aplhamakho akieto m’a iokhalhma metkelha temma. 18¿Se lha nhan enenlhet’avok m’a ie apkellaiangko lhnak nanek apaivoma akto have niapak ankek Eniapom Neten melentelhek hata iokhalhma neniamposammalhkelha, he? Koka vanlha m’a apkellelto nak meleliehekhok ma’a. 19Hai’, lhnak nane ntemak ma’a, neliavek ennengko’o mankonmopvanko nak apkelentalhnemo m’a aniem’o apkeliaskeiam.
Copyright information for
TmfSC