Jam 5 | TmfSC | STEP | ¡Ellailhonoho ketlhengkap nkeskama nak apkelletsekama, eliapqalhek hata, elleklhangvama ta nhan ngkanek nkovak hata akientalhnema taphaplhet’ok ketlhengkap!

‏ James 5

Nema hennavesaikama nkeskama nak netsekama

1 ¡Ellailhonoho ketlhengkap nkeskama nak apkelletsekama, eliapqalhek hata, elleklhangvama ta nhan ngkanek nkovak hata akientalhnema taphaplhet’ok ketlhengkap! 2 ¡Nkokpelkalhkak hata m’a qaselha apanko’ok anak, nkotvok hata veneng apketsekama! 3 ¡Nkolentepok hata anie m’a patakkom oro nak kanhan qaselha alienmomo plata aniem’o apkellankesaikamok ma’a! Akhemo koka ngkanek ketse nkaimelhkak aktemakha nnelha aknem lhmankek ham, koka anie’ nak ma’a nkotlhenekhak hata nke meliamolhma, nkonaqtevasekhok hata nkek ketlhengkap nahan malha talha nak ma’a. 4 Apkakhangkek ketlhengkap apkenmakmesaikama apanko’ok apnaklhekamok akielhna, apketlheianme niekhe apkelvannaikamok akianmoma ngkanek melianmonkasak apkenmakmekama akianmoma m’a, apleng’ak koka nhan Apveske aknema apmopvana apankek ma’a. 5 Nnangkek na ketlhengkap nkeskama qaselha apanko’ok apmennave, nnaiangke songkek akianmoma apkenmak’akha la eteniangkok, nnakmelaskangkek na aniem’o nkeskama aptekamok m’a malha aktonak nennaqtoskama la’a nenmelasekha nak kakpota angaqhek akvakmo ta aknem nengaqhemakha. 6 Apketlheianmek ketlhengkap apketselhnanemmap enenlhet meltemengvaiakmo lhma, apkellaqhengkek nahan, koka apkellaiangkavek apnaqtevaskamo m’a.

Nelailhema qaselha metka nempekheskama

7 Ketlhengkap elialheng’a, ellaielh hata aknem metka apkelpekheskama apvektanlha ta Apveske, malha aptonak ma’a aniep aniapom la’a metka apekheskama nak apkelailhema aknem akmamai’akha nak kakpota nhan netamen enaklhek akielhna m’a. 8 Nnavek na ketlhengkap ma’a elienna ta apkellailhema m’a metka apkelpekheskama ngkanek ketse nkaimelhkak apvektanlha ta Apveske.

9 Ketlhengkap elialheng’a, melentepkasama nkek apkelvesai’a po’ok la’a ngkanek ketse nkaimelhkak apvektanlha ta hengiekpelkemo niapom, hata eliekpelkok apkeltemakha ketlhengkap ma’a.

10 Elialheng’a, ntasek koka antangkok ennengko’o m’a aptaiangkolha lhnak nanek apkeleltennaskama ania’a aniem’o apkellapaskama Eniapom Neten, apkellengaiangko lhnak nanek na akientalhnema m’a, koka apkelvaskapmek na m’a metka apkelieniekha kolhvavek apkenmakmekama. 11 Neliavek ennengko’o m’a apkelleniemavek enenlhet’avok la’a apteniaiangko apiempeiok apkelvaskapma neksa akvai’a la akientalhnema. Apkellengai’ak ketlhengkap nema altennaikama aptemakha Job, apvaskapmo lhnak nanek neksa aplengaiangko akientalhnema, netamen aptaqmelkeskeskaiakmo lhnak nanek na apkaniemhaikama Apveske apto apiamolhma apanke’, apietnai’o nhan napa’at ma’a.

12 Ketlhengkap elialheng’a, smak’ak alhenek mokhom hengetlhekmoskama nak akto neten ankek akiaspommalhka, metnamok juramento akieplomo neten, nalhepop, metka lhamakho qaselha nak. Hata apketlheno ta apkenmahai’a ellanangkok lhema qaselha, ellanamok hata m’a, hato ka apketlheno ta mankonmahai’a ellanangkok ma’a, mellanamo nkoie’. Ntasek elieplavkesek aptangkolha la apketlheianma kakpota mankolhek atlheno apketselhnanemmap ketlhengkap ma’a.

Aktemakha nenmalhnongkoma

13 Apno la lhema enenlhet aplengaiangko akientalhnema apieseksek anak ketlhengkap, ntasek elmalhnak ma’a, apno la nhan lhema enenlhet akpaihekha apvalhok, ntasek ennekmaksek ma’a apvesai’a Eniapom Neten. 14 Apno la nhan lhema enenlhet akmaska apiempek, ntasek ellavama metno apketko’ok anak iglesia kakpota elmalhneskasangkok ma’a, eleltelhnangkok nahan aceite akmaska eniempek ankok akieplomo apvesai’a Apveske. 15 Ka apkelelmalhno la akieplomo meliaskeiam ma’a, etaqmalvomok hata akmaska apiempek anak. Apveske Jesús hata emaskeskesek aplengaiangko m’a, akietno la nhan ngkolatsekama apkelanai’a, etneskesama ta nhan apankek ma’a.

16 Ka ngkanek na ntasek etlhenek moklhem’a apnaqtevaskama la po’ok apieseksek anak ketlhengkap ham. Elelmalhneskes hata nhan po’ok ham kakpota ngkolhek altakmelkeskakmo m’a neksa apkellengaiangko anmaska apiempeiok, ka enenlhet la apeivomo nietnek akmovana apkenmalhnongkoma. 17 Ka aktemo lhnak nanek na Elias annenga m’a, nennemo nhan ennengko’o enenlhet apanke, apteniai’o nhan apiempek neksa apkenmalhnonkoma apkenmalhneiangka Eniapom Neten meltemo mankonmakiek akvaiakmo nalhet hanetolhema iantelhkapa, ntemengkek nak nanek na m’a. 18 Netamen nak nanek na m’a apkenmalhneiekho mokhom Eniapom Neten kakpota nkomama, ka akmamekho lhnak mokhom ma’a, aktepkesekho nhan akielhna lhepop aktek anak.

19 – 20 Ketlhengkap elialheng’a, moklhem’a la apkellanengko la qaselha ngkollatsekama apieseksek anak, malha aphaivongvaiam amai la ngkolatsenkelha, ka apvet’o la po’ok enialheng ma’a, apiantemantamo la mokhom amai aktaqmanma, malha apvongkeskama tep apketsepma niekhe m’a, aptemeskaskek na po’ok apmeskesekho takha Eniapom Neten neksa apkelanai’a nkeskama ngkollatsekama.