‏ James 1

Aklheianma apvalhok Santiago

1Ko’o Santiago asto heiasennaikama Eniapom Neten kanhan apveske Jesucristo nlhenkek evalhok apkellelto 12 apkelpasmekhak apketkak neptamen Israel, apkakhengveiakmo lhma nkek ham lhamakho apkellavakha.

2Ketlhengkap elialheng’a, nkolpaihekha ta apvalho’ok neksa akvai’a la akientalhnema koka akmahai’a nkoiepkonek 3meliaskeiam ketlhengkap ma’a. Ka apkelvaskapo la ketlhengkap ma’a, netamen nkotiepok hata apkenmopvanka’a elvaskapok lhamakho aktemakha akientalhnema la’a apkelvetai’a. 4Koka nkaimelhkak elvaskapok akvakmo aktakha nnelha akientalhnema apkelvetai’a, netamen hata m’a nkovak aptaikamok apketsavhongvaiakmo apkeliangveiakmo m’a, nkolhnangkok hata nhan lhamakho aktemakha apkeltaqmanma.

5Koka moklhem’a la ketlhengkap metka apkeliangveiakmo, ntasek elelmalhnama mota Eniapom Neten ngkanek apto nhan ma’a akleklemo mota apvalhok hengankok qaselha, metnak na hentaqheskamo la’a. 6Elelmalhnama ta nhan akieplomo meliaskeiam etlhevak hata m’a, metka koka nhan ma’a allelpengkammalhka apvalho’ok etlhevangkok hatelhaha, nlho ka la m’a. Ka enenlhet apto la m’a malha ta etnek alakhaiam anak iemmen alvata, nsavke mota alhkaiam amnoma akmak’akha la nkosvok. 7– 8Ka aptemak na enenlhet hanet la aklhenaikama apvalhok, amanie niekhe nlhenkek apvalhok lhema qaselha, netamen niaqmokhe koka mota mo’ok aklhenaikama apvalhok, aptemakha pankek koka mota m’a, ka ngkanek melhkek hata qaselha aniem’o m’a Apveske.

9Enialheng la metka qaselha apankok ntasek nkotaqmelama apvalhok ma’a ngkanek apto neten apankek napaqtek Eniapom Neten. 10Kanhan apto la aknema apketsekama ntasek na nkotaqmelama apvalhok ma’a neksa aptemeskesekha koneng la Eniapom Neten, ngkanek emaskengvomok hata nhan lhema aknem ma’a malha elhnemok anak panaktema la aktekteiapma amhamakha nke nak iokhalhma, akiakvatakho nkek aktaqmanma. 11Niemak’ak ma’a aktepo la aknem akieplomo nhan akmate, mpallakmek elhnemok na m’a, mmaskengvakmek na aktaqmanma lhkek ma’a. Nnavek na m’a enenlhet la aknema nak apketsekama, emaskengvomok hata nhan m’a kanhan qaselha apanko’ok.

12Aktaqmelakho nkek enenlhet meliehekho la akiatekamok akiaspongkomakha apvalhok ngkolatsekama. Apvaskapo la nhan, elhkak hata akianmoma apnaksepma akiennaktema apkaniemhaikama apkelpeneskeskamo lhta apaivoma Eniapom Neten ellangkok hata m’a apkellelto la apkellasekhai’o. 13Akvo’o la ngkolatsekama aklhenaikama apvalhok, meltamo nke aniemai’a Eniapom Neten ma’a, melaneskasak Eniapom Neten ngkolatsekama aklhenaikama apvalhok enenlhet, mang na nkoietnak aklhenaikama apvalhok la ngkolatsekama m’a. 14Enenlhet koka nkeniemai’ak ma’a ngkolatsekama aklhenaikama apvalhok anak apankok apanke, malha akiatekamok la apvalhok kakpota nkolekvomok ma’a, 15netamen apkelan’ak ngkolatsekama m’a, nkoiangvomok hata m’a apkelanai’a ngkollatsekama akvakmo apketsepo ta ngkotnek.

16Elialheng’a askellamelaiam, mangkollatsekama alketamekama apvalho’ok ketlhengkap, have aniemai’akha Eniapom Neten ma’a ngkolatsekama nak aklhenaikama engvalhok. 17Eniapom Neten koka nkeniemai’ak ma’a aktaqmanma, kanhan akiokho nkek apkeliangveiakmo ngkanek apto nhan Niapma’ak ma’a alapommatemo nak neten, mamma nkek na akiaqmoiekha la mo’ok apvalhok ma’a.

18Hengeltemeskeskangke lhta malha alhnankok nelpalleiam Eniapom Neten aniem’o ania’a aktaqmanma nak akto have niapak ankek akvakmo nentangko malha qaselha apankok la allelto neten ankavek altakmanma aiseksek ma’a lhamakho qaselha apkelentepkeskama lhta.

Aimommalhko angailhoho’, angelleliehekhok na Eniapom Neten apaivoma

19Ketlhengkap elialheng’a askellamelaiam, eltaqmelkaso ta apkellailhemo asmak’akha nak atnek alheianma, ntase mota ketlhengkap ellailhok eniangkok sekhe’ eliatak po’ok la’a, have elelientemmakpok apmaniaie’ ketlhengkap, metnamok na nav’a apvaheiok apkenmak’o la ello’ok, 20ngkanek enenlhet aplavo la mota koka akto have qaselha akpeivomo napaqtek Eniapom Neten ma’a. 21Ntasek koka elvatesangkok ketlhengkap ma’a malha qaselha alpaiseiam anak kanhan ngkollatsekama nak, mantek ankek qaselha ngkollatsekama nak, ntasek koka enmankok takha m’a ania’a aktaqmanma nak nalhep’avek apvalho’ok nema atlhekmosekamo lhta, ngkanek nietnek akmovana m’a nkolvongkesek tep.

22Apkeliennengkasekpek apankavek napokha ketlhengkap nketlhenke mota apvalho’ok ntasek etnangko mota vanlha apkellailhemo ania’a aktaqmanma. ¡Have koka niekhe nentemakha m’a, nkaimelhkek koka nhan ngkoitek apkelleliehekho ania’a apkelleng’o la’a! 23Enenlhet apto la vanlha apkailhemo ania’a aktaqmanma, koka meliahakho, malha niekhe enenlhet anak apkelanei’o napa’at ieiam appok 24kakpota elanho pankek napa’at aptakha la’a, koka apmasko la apkelanei’o napa’at, apkelvangkakmek aptemakha napa’at apankek ma’a. 25Koka aktakmelakho nkek enenlhet anak metka apkelvangkaiam aktakha la apkailhemo, apsekho nhan alketamekama apvalhok aktakha aklheianma ley Eniapom Neten akto akiokho nkek aktaqmanma m’a, akmovana nkolvongkesek tep apkellelto nak apkelleliehekho mota m’a.

26Moklhem’a ketlhengkap apieseksek anak ham nketlhenke mota apvalho’ok apkellelto apkeliamolhma meliaskeiam Eniapom Neten, koka apkeliennengkasekpek apankavek ma’a ngkanek mankollapvanka’ak enmangvomok apkelpakmeiasma ngkollatsekama, akhemo apkelleltammap apkeliamolhma meliaskeiam ma’a. 27Koka akto aktaqmelo nentaqmelkasemmalhko engankek napaqtek Eniapom Neten nentaikama mota amaika’a apkelieihekama kanhan lhentampak’a neksa alvetai’a akientalhnema, kanhan mongellankehe na hengellekhoho ngkolatsekama la enenlhet meliamolhma.