‏ Philippians 4

Akpaihekha envalhok aniem’o nempasmekha Apveske

1Ka m’a astakha lhkek askellano, ntasek etlhengkesek akiennaktema nkek apkelleliehekho Apveske ketlhengkap elialheng’a askellasekhai’o, heliepvaiakmek nahan, apkelpaiesekha mota evalhok, malha akianmoma la alhevai’a asnaksepma askelhanma epatek ketlhengkap.

2Askeltavek ko’o angvapiosama alanhok Evodia kakpota nhan Sintique nkotnangkokhak aknemo mo’ok atlheianma av‘alho’ok ngkanek engelialheng’a aniem’o Apveske. 3Lheiap apto alhelhma heiasekhai’o aptema nengaqte mota asmakmekama, askapiosema askelan’o lheiap askeltemo elpasmok ham ngkelvana’ak anak ngkanek helpasmongke lhta mota aspaieskamo ania’a aktaqmanma. Clemente lhta nhan netlhelhma’ak ma’a kanhan aplhamakha alhta, nnaiangkek koka apkelvesai’a m’a lhema vakkahak akiennaktema enneniek nkotnengvaianlha nnelha.

4¡Kolpaihekha ta mota apvalho’ok aniem’o apkelpasmekha Apveske, hai, kolpaihekha ta mota apvalho’ok! 5Kakpota elvetak enenlhet apkellelto apkeliamolhma ketlhengkap ¡Apkanketvaktek apveske!

6Mankoltama nke mota apvalho’ok qaselha nak, eleltennes hata mota Eniapom Neten alaimelhko la qaselha apanko’ok, etnamok hata nhan gracias. 7Netamen ellangkok hata nhan Eniapom Neten akiavai’a nkek manvaiam annelha altaqmelaikama apvalho’ok, eltaqmelkeskesek hata nhan apvalho’ok kakpota nhan alketansema apvalho’ok aniem’o nhan Cristo Jesús ma’a.

8Ketlhengkap elialheng’a, asmak’ak aleltennaksek mokhom aktakha nnelha, kotlhen hata apkelvalho’ok lhamakho qaselha akto nak have niapak anke, nentemakha nhan akto akietemo nkek nengai’o emmo’ok anak, qaselha akpeivomo, qaselha alhnai’o nkek, qaselha akleklema engvalhok, kanhan aklhenammalhka nak qaselha altaqmelo. Hai, lhamakho qaselha lhkek altaqmanma alheianma, qaselha aklhenammalhkak altaqmelo, ntasek nkotnangkok hata mota atlhenaikama apvalho’ok ma’a.

9Ellanamok hata mota lhamakho astemakha lhta mota asketlhekmoskama apkelvetai’o lhta askellanai’a, elvanamok hata mota astemakha nak, netamen Eniapom Neten apto nak aktaqmelaikama envalhok aniapom etnangkok hata mota apketlhelhma’ak ma’a.

Ko filipenses apkellaikamok patakkom Pablo

10Avanhek akpaihekha evalhok atlheianmo apvalho’ok asnakha ko’o hengke’e, helpasmek mokhom. Manalhmok la helelvangkamaiangkok ketlhengkap, kelha nhan nkeniemai’ak ma’a mamma eltemeskesek apkellapaskama la’a. 11Niekhe aimommalhka qaselha ko’o, ntasek koka asiangvakmoie mpaihakhek evalhok ketsek la’a, evankek koka aiensepankok ketsek. 12Evankek na aloka neksa mek heiaqhema, kakpota nhan neksa asiapqaneiakmo la’a, neksa metka qaselha ehenkok kakpota nhan qaselha heiekangveiakmo la’a. 13Evankek koka mota nhan avaskapok aniem’o Cristo heiaikamok asiennaktema, 14koka ntasek na helpasmomo ketlhengkap neksa akientalhnema. 15Askempai’akha lhta sekhek ankek alhengama akieto m’a Macedonia kakpota apaiaksek ania’a aktaqmanma, vanlha lhta mota ketlhengkap ko Filipos hellapaskeskama hepasmoma la’a, mamma lhta mo’ok la iglesia hellapaskeskama m’a. 16Ka asnemo lhta nhan ma’a Tesalonica nlhamakme lhta nhan hellapaskeskama helpasmoma asteniai’o lhta nhan alaimommalhkelha lhta ko m’a. 17Have ko’o asteniai’a mokhom qaselha hepasmoma la’a, vanlha koka asteniak etlhevangkok nema akiaqmongkasekha ta aniem’o helpasmoma ko’o. 18Alhevangvaktek qaselha hellapaskeskama ketlhengkap apsenta koka Epafrodito hengke’e, heiekangvakme’, nlekama nhan evalhok malha nta kto nak akmases la aimes nema akmeskama nak Eniapom Neten kakpota nkolkama nhan apvalhok ma’a. 19Eniapom Neten apto nema netsekama niapom akiavai’a nkek, ellangkok hata lhamakho qaselha alaimommalhkelha la ketlhengkap aniem’o nhan Cristo Jesús, have niapak ankek hata ngkotnek ma’a. 20Angeltemeskesangkok hata mota gloria apto Eniapom Neten metka akvaiam annelha aliekaikamok iantelhkapa. Amen.

Aktakha nnelha apaivoma Pablo kanhan aklheianma apvalhok

21Askeltavek na angvapaksek aklheianma evalhok aplhamakho apkelpokkenammap meliaskeiam Jesucristo ham, apkellapaskek na atlheianma apvalho’ok engelialheng’ak asketlhelhma’ak anak hengke’e, 22ka nhan apkellapasak atlheianma apvalho’ok aplhamakho apkellelto apkelpokkenammap apkellava nak hengke’e, apkellelto nak na apkenmakmesaikama apiav’akha apveske Roma apkellapaskamo na mota atlheianma apvalho’ok ketlhengkap.

23Hai’, ntase. Askenmalhneskaske mota Apveske Jesucristo kakpota eltaqmelkeskesek apkellaniemhaikama ketlhengkap ham.